Jobe 20 - Ndebele Bible (iBhayibhili Elingcwele) 1978

Inkulumo yesibili kaZofari: uthi ukuthokoza kwababi kufitshane

1Wasephendula uZofari waseNama esithi:

2Ukukhathazeka kwengqondo yami kuyangifuqa ukuba ngiphendule,

yikho nje ngiphangisa ukukhuluma.

3Ngizilwe insolo elihlazo kimi,

umoya wami uyangifuqa ukuba ngiphendule.

4Kawazi yini ukuba lokhu kwasukela endulo,

selokhu kwaba khona umuntu emhlabeni,

5ukuthi ukuthokoza kwababi kufitshane,

lokujabuta kwabangamesabiyo uNkulunkulu kungokwesikhatshana nje?

6Loba ubude bakhe bufinyelela ezulwini,

lekhanda lakhe lithinta amayezi,

7uzabhubha kokuphela njengobulongwe bakhe,

kuthi labo abambonileyo bathi: Ungaphi na?

8Uzanyamalala njengephupho, angabe esafunyanwa,

axotshwe njengombono wasebusuku;

9lelihlo elake lambona lingaphindi limbone futhi,

lendawo yakhe ingabe isambona.

10Abantwana bakhe bazazidingela kwabangabayanga,

izandla zabo zibuyisele inotho yakhe.

11Amathambo akhe ayegcwele ubutsha,

kodwa azalala kanye laye emhlabathini.

12Lanxa ububi bumnandi emlonyeni wakhe,

ebufihla ngaphansi kolimi lwakhe,

13engavumi ukubuyekela,

ebubhodabhodisa emlonyeni wakhe,

14ukudla kwakhe kuyaphenduka esiswini sakhe,

kuphenduka kube yibuhlungu benyoka phakathi kwakhe.

15Uginya inotho, abuye ayihlanze;

uNkulunkulu uyayikhupha esiswini sakhe.

16Uzamunya ubuhlungu benyoka,

lolimi lwebululu luzambulala.

17Angeke ayibone imifula yochago,

lezifula zoluju lolaza.

18Uzabuyisela izithelo zomsebenzi wakhe, angaziginyi;

kayikuthokoza ngenzuzo yomsebenzi wakhe.

19Ngoba ubacindezele wabalahla abayanga,

wathatha indlu abengayakhanga.

20Lokhu ubuhwaba bakhe babungelamkhawulo,

kayikulondoloza ulutho kulokho akufisayo;

21kakusalanga lutho emva kokudla kwakhe;

ngakhoke ukuphumelela kwakhe kakuyikuma.

22Ekupheleni kokuphumelela kwakhe uzakuba sebunzimeni,

ukuhlupheka konke kuzamfikela.

23UNkulunkulu ehlisele intukuthelo yakhe phezu kwakhe,

amtshaye ngobuhlungu.

24Lapho evika isikhali sensimbi,

uzahlatshwa ngomtshoko wethusi,

25uphutshe emhlana wakhe,

umcijo udabule inyongo yakhe;

26alindelwe ngumnyama omkhulu.

Umlilo ongavuthelwayo umqede,

lokuseleyo ethenteni lakhe kuzaphela.

27Izulu lizakwambula ububi bakhe,

lomhlaba umvukele.

28Impahla yendlu yakhe izathathwa,

ikhukhulwe osukwini lwentukuthelo kaNkulunkulu.

29Yiso leso isabelo somuntu omubi esivela kuNkulunkulu,

lelifa alimiselwa nguNkulunkulu.