Nani 8 - Ndebele Bible (iBhayibhili Elingcwele) 1978

UAroni umisa izibane

1INkosi yasisithi kuMose:Eks 25:31–40; 37:17–24

2Tshono kuAroni uthi: Nxa umisa izibane eziyisikhombisa, zizakukhanyisa phambi koluthi lwesibane.

3UAroni wenza njalo, wamisa izibane zalo ukuba zikhanyise phambi koluthi lwesibane, njengokutsho kweNkosi kuMose.

4Loluluthi lwesibane lwenziwa ngegolide elikhandiweyo kusukela esidindini salo kusiya emalubeni alo. Uluthi lwesibane lwenziwa njengesifanekiso iNkosi emtshengise sona uMose.

Ukwahlukaniswa kwamaLevi

5INkosi yathi kuMose:

6Yahlukanisa amaLevi kubantu bakoIsrayeli, uwahlambulule;

7wenze lokhu kuwo ukuwahlambulula, uwachele ngamanzi okuhlambulula, aziphuce umzimba wonke, agezise izigqoko zawo, azihlambulule.

8Athathe inkunzi kanye lomnikelo wempuphu oqondene layo, impuphu ecolekileyo ixubene lamafutha, uthathe wena enye inkunzi ibe ngumnikelo wesono.

9Uzakuwamisa amaLevi phambi kwethente lokuhlangana, ubuthanise lonke ibandla labakoIsrayeli.

10Nxa umisa amaLevi phambi kweNkosi, abakoIsrayeli bazakubeka izandla zabo phezu kwamaLevi,

11loAroni anikele amaLevi eNkosini, abe yisipho esikhulu esivela ebantwini bakoIsrayeli, ukuba abe yilabo abawenzayo umsebenzi weNkosi.

12AmaLevi azakubeka izandla zawo enhlokweni zezinkunzi; wena unikele enye ibe ngumnikelo wesono, lenye ibe ngumnikelo wokutshiswa eNkosini, ukuba wenzele amaLevi indlela yokubuyisana.

13Uzakuwamisa amaLevi phambi kukaAroni lamadodana akhe, uwanikele eNkosini abe yisipho esikhulu.

14Ngakhoke uzakwahlukanisa amaLevi kubantu bakoIsrayeli, ukuba wona abe ngawami,

15Emva kwalokho amaLevi azakungena ukwenza umsebenzi wawo ethenteni lokuhlangana. Uzakuwahlambulula, uwanikele abe yisipho esikhulu,

16ngoba aphiwe mina phakathi kwabantu bakoIsrayeli. Ngizithathele wona endaweni yawo wonke amazibulo abesifazana bakoIsrayeli.

17Ngoba wonke amazibulo phakathi kwabantu bakoIsrayeli ngawami, awabantu lawezifuyo. Ngalolosuku engabulala ngalo wonke amazibulo eGibithe ngazahlukanisela wona;Eks 13:2

18sengithethe amaLevi endaweni yawo wonke amazibulo phakathi kwabantu bakoIsrayeli.

19Phakathi kwabakoIsrayeli ngiwanikile amaLevi abe yisipho sikaAroni lesamadodana akhe, ukuba enzele abakoIsrayeli inkonzo ethenteni lokuhlangana, lokuba enzele abakoIsrayeli indlela yokubuyisana, ukuze kungabi lomkhuhlane phakathi kwabakoIsrayeli nxa besondela endlini engcwele.

20UMose loAroni lebandla lonke labakoIsrayeli benza njalo kumaLevi njengokutsho kweNkosi kuMose mayelana lamaLevi.

21LamaLevi azihlambulula, agezisa ingubo zawo; uAroni wawanikela aba yisipho esikhulu phambi kweNkosi, wawenzela indlela yokubuyisana ukuwahlambulula.

22Emva kwalokho amaLevi angena ukwenza umsebenzi wawo ethenteni lokuhlangana phambi kukaAroni lamadodana akhe. Njengokutsho kweNkosi kuMose ngamaLevi, benza njalo kuwo.

Iminyaka yokusebenza kwamaLevi

23INkosi yathi kuMose:

24Lokhu kuqondene lamaLevi; lawo aleminyaka engamatshumi amabili lanhlanu lengaphezulu azakungena ukwenza umsebenzi wenkonzo ethenteni lokuhlangana;

25lawo aleminyaka engamatshumi amahlanu lengaphezulu azakuphuma emsebenzini wenkonzo, angabe esasebenza;

26kodwa azakusiza abazalwane bawo ethenteni lokuhlangana ukuba kube lenkonzo, kodwa angabe esasebenza. Uzakwenza njalo kumaLevi ngemisebenzi yawo.