1Kwathi emva kwalokho uNahashi inkosi yamaAmoni wafa, indodana yakhe yaba yinkosi esikhundleni sakhe.2 Sam 10:1–19
2UDavida wathi: Ngizamenzela umusa uHanuni indodana kaNahashi, ngoba uyise wangenzela umusa. UDavida wasethuma izithunywa ukuyamkhalela ngoyise. Zafika kuHanuni elizweni lamaAmoni ukumkhalela.
3Izikhulu zamaAmoni zathi kuHanuni: Kambe ucabanga ukuthi ngoba uDavida ethumele abaduduzi kuwe, uyamhlonipha uyihlo na? Izinceku zakhe kazizanga kuwe ukuba ziphenye ilizwe, zilihlole, zilichithe na?
4UHanuni wasezibamba inceku zikaDavida, wazigela, waquma ingubo zazo zafika ezinqeni, wasezixotsha.
5Esekubikelwe lokho uDavida wathumela umuntu ukuzihlangabeza, ngoba ayeselenhloni kakhulu lawomadoda; wasesithi: Hlalani eJeriko zize zihlume indevu zenu, beselibuyake.
6Lapho amaAmoni esebonile ukuthi aseyisinengiso kuDavida, uHanuni lamaAmoni bathumela amathalenta esiliva ayinkulungwane ukuqatsha inqola zokulwa labagadi bamabhiza eMesopotamiya leAramu‐Mahaka laseZoba.
7Baqatsha inqola zokulwa ezizinkulungwane ezingamatshumi amathathu lambili kanye lenkosi yaseMahaka lempi yayo eyeza yamisa eduze leMedeba; lamaAmoni aphuma emizini yawo, eza ekulweni.
8Kwathi lapho uDavida esekuzwile lokho wathumela uJowabi layo yonke impi yamaqhawe.
9AmaAmoni aphuma amisa impi ngasesangweni lomuzi, lawomakhosi ayeze ekulweni amisa wodwa egangeni.
10Lapho uJowabi esebonile ukuba impondo zempi zimhanqile ngaphambili langemuva, wakhetha abanye babakhethiweyo bakoIsrayeli, wabahlela ukuba balwe lamaSiriya;
11abanye abaseleyo wabanikeza kuAbishayi umfowabo, owabahlela ukuba balwe lamaAmoni.
12UJowabi wathi kuye: Uba amaSiriya engahlula, uze ungisize; uba amaAmoni ekwahlula, ngizakuza ukukusiza.
13Mana isibindi, udode ngenxa yabantu bakithi langenxa yemizi kaNkulunkulu wethu; intando yeNkosi uNkulunkulu kayenziwe.
14UJowabi labantu ababelaye basebesondela ukuba balwe lamaSiriya; abaleka phambi kwabo.
15Lapho amaAmoni ebona ukuba amaSiriya ayabaleka, abaleka lawo phambi kukaAbishayi umfowabo kaJowabi, angena emzini. UJowabi wasebuyela eJerusalema.
16AmaSiriya esebonile ukuthi ahluliwe nguIsrayeli athuma izithunywa, abiza amaSiriya ayengaphetsheya komfula iYufrathi, eholwa nguShofaki owayengumphathi wempi kaHadadezeri.
17Lapho uDavida ebikelwa lokho, wabuthanisa wonke uIsrayeli, wachapha iJordani, wafika kibo, wahlela impi yakhe. Lapho ewahlasela amaSiriya, alwa laye.
18AmaSiriya abaleka phambi kukaIsrayeli; uDavida wabulala amaSiriya ezinqola zokulwa ayezinkulungwane eziyisikhombisa, labahamba ngenyawo abazinkulungwane ezingamatshumi amane, wabulala loShofaki umphathi wempi yawo.
19Lapho inceku zikaHadadezeri sezibonile ukuthi zehlulwe nguIsrayeli, zaxolisana loDavida, zathela kuye. Ngalokho amaSiriya asesesaba ukusiza amaAmoni futhi.
Who We AreWhat We EelieveWhat We Do
2025 by iamachristian.org,Inc All rights reserved.
