2 Lan 7 - Ndebele Bible (iBhayibhili Elingcwele) 1978

1Kwathi uSolomoni eseqedile ukukhuleka, kwehla umlilo ovela ezulwini, watshisa umnikelo wokutshiswa lemihlatshelo, lenkazimulo yeNkosi yagcwalisa ithempeli.

4USolomoni labo bonke abantu banikela imihlatshelo phambi kweNkosi.1 Kho 8:62–66

5Inkosi uSolomoni yanikela imihlatshelo, izinkabi ezizinkulungwane ezingamatshumi amabili, lezimvu ezizinkulungwane ezilikhulu lamatshumi amabili. Inkosi labo bonke abantu bamahlukanisela uNkulunkulu indlu.

6Abapristi bema endaweni zabo; lamaLevi lawo ephethe izinto zokuhlabelela inkosi uDavida ayezenzele ukudumisa ngazo iNkosi uNkulunkulu lapho edumisa ngenkonzo yabo — ngoba uthando lwayo olungapheliyo lumi kuze kube nininini; maqondana lalabo abapristi bakhalisa impondo zabo, labakoIsrayeli bonke babemi.

7USolomoni wahlukanisela iNkosi indawo ephakathi kweguma elalingaphambi kwethempeli, ngoba lapho wanikela iminikelo yokutshiswa, lamahwahwa eminikelo yokuthula, ngoba ialtare lethusi uSolomoni ayelenzile lalilincinyane ukutshisela kulo umnikelo wokutshiswa lomnikelo wempuphu lamahwahwa.

8Ngalesosikhathi uSolomoni labo bonke abakoIsrayeli ababelixuku elikhulu, ababevela ekuyeni ngaseHamathi kusiya esifuleni seGibithe benza umkhosi insuku eziyisikhombisa.

9Ngosuku lwesificaminwembili benza inkonzo yokucina, ngoba ukwahlukaniselwa kwealtare kwenziwa insuku eziyisikhombisa, lomkhosi wenziwa insuku eziyisikhombisa.

10Enyangeni yesikhombisa, ngosuku lwamatshumi amabili lantathu lwenyanga, wabadabulela abantu, baya emizini yabo bethokoza bejabula ngokuhle iNkosi uNkulunkulu eyayikwenzele uDavida loSolomoni labantu bayo uIsrayeli.

INkosi izibonakalisa kuSolomoni ngokwesibili

11USolomoni waqedake ukwakha ithempeli lokwakha indlu yakhe; konke ayelungise ukukwenza endlini yeNkosi lakweyakhe indlu kwaphela kuhle.1 Kho 9:1–28

12INkosi yabonakala kuye ebusuku yathi kuye: Ngizwile ukukhuleka kwakho, sengizikhethele lindawo ukuba ibe yindlu yemihlatshelo.

13Uba ngivala iphezulu ukuze kungabi lazulu, loba ngithumela intethe ukuchitha ilizwe, ingabe ngithumele umkhuhlane phakathi kwabantu bami,

14uba abantu bami ababizwa ngebizo lami bezithoba, bakhuleke bengidinga, betshiya indlela zabo ezimbi, mina ngizakuzwa ngisezulwini, ngithethelele izono zabo, ngikhulule ilizwe labo.

15Amehlo ami azavuleka, lendlebe zami zizalalela umkhuleko owenziwa kulindawo.

16Sengiyikhethile ngayihlambulula lindlu ukuze ibizo lami lidunyiselwe khona kuze kube nininini, amehlo ami lenhliziyo yami kuzakuba kuyo isikhathi sonke.

17Wenake, uba uhamba phambi kwami njengoyihlo uDavida, usenza konke engikulaye khona, ugcine izimiso zami lemithetho yami,

18ngizaqinisa umbuso wakho, njengesivumelwano engasenza loyihlo uDavida ngisithi: Kawuyikuswela muntu ozabusa uIsrayeli.1 Lan 2:4

19Kodwa uba liphambuka, litshiya izimiso zami lemilayo yami engililaye yona, lisuke liyekhonza abanye onkulunkulu,

20ngizakulisiphula elizweni engalinika lona, lalindlu engiyahlukanisele ibizo lami ngiyichithe phambi kwami, ngiyenze ibe yisiga lento yokuhaywa phakathi kwezizwe zonke.

21Lindlu edumileyo wonke umuntu odlulayo amangale ngayo athi: INkosi ikwenzeleni okunje kulelilizwe lakulindlu na?

22Impendulo izakuthi: Kungoba bayidelile iNkosi uNkulunkulu waboyise eyabakhupha eGibithe, banamathela kwabanye onkulunkulu, babakhonza babasebenzela; ngalokhoke iNkosi uNkulunkulu ibehlisele bonke lobububi.