Hubo 78 - Ndebele Bible (iBhayibhili Elingcwele) 1978

Ukuthembeka kukaNkulunkulu lokungathembeki kwabakoIsrayeli

1Bantu bami, zwanini ukufundisa kwami,

lilalele amazwi omlomo wami.

2Ngizakuvula omlomo wami ngomfanikiso,

ngikhulume imfihlakalo yasendulo,

3izinto esizizwileyo lesizaziyo

okhokho abasitshela zona.

4Kasiyikuzifihlela abantwana babo,

kodwa sizakutshela isizukulwana esizayo izenzo ezimangalisayo zeNkosi,

lamandla ayo,

lezimangaliso ezenzileyo.

5Wamisa umthetho koJakobe,

wabeka umlayo koIsrayeli,

alaya ngawo okhokho ukuba bafundise abantwana babo,

6ukuze isizukulwana esizayo sazi, abantwana abangakazalwa

basuke batshele abantwana babo,

7ukuze bamise ithemba labo kuNkulunkulu,

bangayikhohlwa imisebenzi kaNkulunkulu,

kodwa bagcine imithetho yakhe;

8bangabi njengokhokho babo,

ababeyisizukulwana esimakhanda alukhuni lesilenkani,

isizukulwana esinhliziyo engaqinanga,

lesimoya waso wawungathembekanga kuNkulunkulu.

9AbakoEfrayimi sebehlomile ngemitshoko,

babaleka mhla wempi.

10Kabasilondolozanga isivumelwano sikaNkulunkulu,

bala ukuhamba ngokomlayo wakhe.

11Bakhohlwa imisebenzi yakhe

lezimangaliso ayebatshengisa zona.

12Wazenza izimangaliso phambi kwabokhokho babo

elizweni laseGibithe, emagangeni aseZowani.

13Wahlukanisa ulwandle, wabawelisa,

wamisa amanzi aba zinqwaba.

14Wabakhokhela ngeyezi emini,

lasebusuku bonke ngokukhanya komlilo.

15Waqhekeza amadwala enkangala,

wabanathisa amanzi amanengi kungathi avela ezinzikini.

16Wenza imifula yagobhoza edwaleni,

lamanzi ageleza njengemifula.

17Kodwa baqhubeka ekoneni kwabo,

bamvukela oPhezukonke enkangala.

18Bamlinga uNkulunkulu enhliziyweni zabo

ngokucela ukudla abakufisayo.

19Bakhuluma kubi ngoNkulunkulu besithi:

UNkulunkulu angasinika ukudla enkangala na?

20Yena owatshaya idwala, kwaphuma amanzi,

lemifula yagobhoza;

kambe angabanika ukudla

lenyama abantu bakhe na?

21Ngakho lapho iNkosi isizwa lokho yathukuthela;

kwavutha umlilo ngakuJakobe,

lolaka lwayo lwakhula kuIsrayeli,

22ngoba kabamkholwanga uNkulunkulu,

kabathembanga amandla akhe okukhulula.

23Kanti walaya isibhakabhaka phezulu,

wavula iminyango yezula,

24wabanisela imana ukuba badle,

wabapha amabele avela phezulu.

25Abantu badla ukudla kwezithunywa;

wabanika ukudla okunengi.

26Wenza umoya wasempumalanga wavunguza emazulwini;

ngamandla akhe waqhuba umoya waseningizimu.

27Wanisela phezu kwabo inyama njengothuli,

lenyoni eziphaphayo njengesihlabathi solwandle;

28wazehlisela phakathi kwezihonqo zabo,

kuyo yonke indawo ababehlezi kuyo.

29Badla basutha kakhulu,

ngoba wabapha abakufisayo.

30Kodwa bengakanelisi ukufisa kwabo,

ukudla kusesemilonyeni yabo,

31ulaka lukaNkulunkulu lwavutha kubo,

wabulala amaqhawe abo,

insizwa zekhethelo zakoIsrayeli waziwisela phansi.

32Kanti bajinge besona njalo;

kabakholwanga ngenxa yezimangaliso zakhe.

33Ngakho waziqeda insuku zabo ngeze,

leminyaka yabo ngenhlupheko enkulu.

34Lapho ebabulala abanye, abaseleyo bamdinga,

baphenduka, bamfunisisa;

35bakhumbula ukuthi uNkulunkulu ulidwala labo,

oPhezukonke ungumhlengi wabo.

36Kodwa bamkhohlisa ngemilomo yabo,

baqamba amanga kuye ngenlimi zabo.

37Inhliziyo yabo yayingabambelelanga kuye,

bengathembekanga esivumelwanweni sakhe.

38Kodwa yena elesihawu wabathethelela ukona kwabo,

kababhubhisanga;

walunqanda kanengi ulaka lwakhe,

kakuvusanga konke ukuthukuthela kwakhe.

39Wakhumbula ukuthi bangabantu nje,

bangumoya odlulayo ongabuyiyo.

40Kwaba kanengi kangakanani bephambana laye enkangala,

bemdabukisa enkangala.

41Bamlinga futhifuthi,

bamthukuthelisa oNgcwele kaIsrayeli.

42Kabawakhumbulanga amandla akhe,

losuku abahlengwa ngalo ezitheni,

43esezenza izibonakaliso zakhe eGibithe,

lezimangaliso zakhe endaweni yaseZowani.

44Waphendula imifula yabo abaseGibithe yaba ligazi,

ukuze banganathi amanzi ayo.

45Wathumela phakathi kwabo izibawu ezabalumayo,

lamaxoxo achitha ilizwe labo.

46Wanika imihogoyi amabele abo,

lesithelo semisebenzi yabo isikhongwane.

47Wabulala amavini abo ngesiqhotho,

lezihlahla zabo ngongqoqwane.

48Wanikela inkomo zabo esiqhothweni,

lemihlambi yabo kuyo imibane.

49Wehlisela phezu kwabo ukuvutha kolaka lwakhe,

lokuthukuthela, lokuconuka, lokuhlupheka,

ixuku lezithunywa ezibulalayo.

50Waqhubeka ekubathukutheleleni,

kabaphephisanga ekufeni,

kodwa wabanikela emikhuhlaneni.

51Wawabulala wonke amazibulo aseGibithe,

okokuqala kwamandla abo emathenteni kaHamu.

52Wasebakhupha abantu bakhe njengezimvu,

wabahola enkangala njengomhlambi.

53Wabahola kuhle ukuze bangesabi;

kodwa ulwandle lwasibekela izitha zabo.

54Wabafikisa elizweni lakhe elingcwele,

ezintabeni ayezinqobile.

55Wazixotsha izizwe phambi kwabo;

wabahlukanisela ilizwe lazo laba yilifa labo,

wahlalisa izizwe zakoIsrayeli emathenteni azo.

56Kanti bamlinga, bamvukela oPhezukonke,

kabazigcinanga izimiso zakhe,

57babuyela emuva, bakhohlisa njengabokhoko babo,

baba njengedandili elitshilekileyo elikhohlisayo.

58Bamthukuthelisa ngezindawo zabo eziphakemeyo zokukhonzela,

bavusa umona wakhe ngezithombe zabo.

59Lapho uNkulunkulu ekuzwa lokhu wathukuthela,

wamlahla impela uIsrayeli.

60Wayitshiya indlu yakhe eShilo,

ithente ayehlala kulo phakathi kwabantu.

61Wanikela umtshokotsho wakhe ekuthunjweni,

isibonakaliso senkazimulo yakhe ezandleni zezitha.

62Wanikela abantu bakhe ekubulaweni,

wakhuphela intukuthelo yakhe phezu kwelifa lakhe.

63Umlilo waqeda insizwa zabo,

lezintombi zabo kazendanga.

64Abapristi babo babulawa ngomkhonto,

labafelwakazi babo kabaze babalilela.

65Yasivuka iNkosi njengokade elele,

njengomuntu olamandla oklabalaliswa liwayini.

66Yazixotsha izitha zayo,

yazithela ihlazo elingapheliyo.

67Yayilahla inzalo kaJosefa,

kayisikhethanga isizwe sakoEfrayimi,

68kodwa yakhetha isizwe sakoJuda,

lentaba yaseZiyone eyithandayo.

69Yayakha indlu yayo engcwele njengamazulu aphakemeyo,

yayiqinisa njengomhlaba ewusekeleyo kuze kube nininini.

70Yakhetha uDavida inceku yayo,

yamthatha ezibayeni zezimvu;

71ekwaluseni izimvukazi ezenyisayo yamthatha,

ukuba ngumalusi wabantu bayo uJakobe,

lelifa layo uIsrayeli.

72Yena wabelusa ngobuqotho benhliziyo,

wabahola ngenhlakanipho yesandla sakhe.