Jer 13 - Ndebele Bible (iBhayibhili Elingcwele) 1978

Umfanekiso webhanti lelembu

1INkosi yathi kimi: Hamba uyezithengela ibhanti lelembu, uzibophe ngalo okhalweni, ungalifaki emanzini.

2Ngasengithenga ibhanti njengokutsho kwelizwi leNkosi, ngazibopha ngalo okhalweni.

3Ilizwi leNkosi labuya lafika kimi ngokwesibili lathi:

4Thatha ibhanti olithengileyo, ozibophe ngalo okhalweni, usuke uye emfuleni iYufrathi, ulithukuze khona engoxweni yedwala.

5Ngasengihamba, ngalithukuza emfuleni iYufrathi njengokutsho kweNkosi kimi.

6Kwathi emva kwensuku ezinengi, iNkosi yathi kimi: Suka uye emfuleni iYufrathi, uyethatha khona ibhanti engakutshela ukuba ulifihle khona.

7Ngasengisuka ngaya emfuleni iYufrathi, ngemba, ngalikhupha ibhanti endaweni lapho ngangilifihle khona. Bonake, ibhanti laselonakele, lalingasasizi lutho.

8Laselifika kimi ilizwi leNkosi lisithi:

9INkosi ithi: Ngalindlela ngizakuchitha ukuziqhenya kukaJuda lokuziqhenya okukhulu kweJerusalema.

10Lababantu ababi, abala ukuzwa amazwi ami, belandela inhliziyo zabo ezilenkani, belandela onkulunkulu abanye ukuba babasebenzele babakhonze, bazakuba njengalelibhanti elingasizi lutho.

11Ngoba njengokuba ibhanti linamathela okhalweni lomuntu, ngokunjaloke ngenzile ukuba yonke indlu yakoIsrayeli lendlu yakoJuda zinamathele kimi, kutsho iNkosi, ukuba babe ngabantu bami, lebizo, lodumo, lokudunyiswa; kodwa kabalalelanga.

Umfanekiso wezimbiza ezigcwaliswa ngewayini

12Uzakutsho lamazwi kibo uthi: INkosi, uNkulunkulu kaIsrayeli, ithi: Zonke imbiza zizagcwaliswa ngewayini. Kodwa bazakuthi kuwe: Uthi kasikwazi yini ukuba zonke imbiza zizagcwaliswa ngewayini?

13Ubususithi kibo: INkosi ithi: Ngizabadakisa bonke abakhileyo kulelilizwe, ngitsho amakhosi ahlala esihlalweni sobukhosi sikaDavida, labapristi, labaprofethi, kanye labo bonke abakhileyo eJerusalema.

14Ngizakubatshayanisa, oyise lamadodana ndawonye, kutsho iNkosi. Kangiyikubahawukela, kangiyikubaxolela, ngibe lesihawu sokuba ngingababulali.

AbakoJuda bazathunjwa ngenxa yokungaphenduki kwabo

15Zwanini lilalele, lingaziqhenyi, ngoba iNkosi isikhulumile.

16Inikeni iNkosi udumo, uNkulunkulu wenu, ingakalethi umnyama,

lenyawo zenu zingakakhubeki ezintabeni ngoba sekuhlwile,

kuthi lisadinga ukukhanya, ikuphendule kube ngumnyama,

ikwenze kube ngumnyama omkhulu.

17Kodwa lapho lingalaleli, ngizakhala ensitha ngenxa yokuziqhenya kwenu,

ngizakhala kakhulu, lamehlo ami ehlise inyembezi,

ngoba umhlambi weNkosi uthunjiwe.

18Tshono enkosini lakunina wenkosi uthi:

Hlalani phansi ngokuzithoba,

ngoba umqhele wenu omuhle uwele phansi.

19Imizi yaseNegebi ivaliwe, kakho ongayivula,

wonke uJuda uthunjiwe ngokupheleleyo.

20Phakamisani amehlo enu libone labo abavela enyakatho.

Ungaphi umhlambi elaliwunikiwe, umhlambi wenu omuhle na?

21Lizakuthini uba belibekela labo elabenza abangane benu ukuba babe ngabaphathi benu na?

Kaliyikwehlelwa yibuhlungu obunjengowesifazana ohelelwayo na?

22Uba lisithi enhliziyweni zenu: Lezizinto zehleleleni phezu kwethu na?

Ngenxa yobukhulu bokona kwenu izidwaba zenu zambuliwe,

lehlelwa yikuhlupheka.

23UmEtiyopiya angasiphendula yini isigogo sakhe,

kumbe ingwe ingaphendula amabala ayo?

Ng’khonake lani lingenza okuhle lina elejwayele ukwenza okubi.

24Ngizalichithachitha njengamakhoba aphetshulwe ngumoya ovela enkangala.

25Lokhu yikho ukuphela kwakho,

lesabelo engikukhethele sona, kutsho iNkosi;

ngoba ungikhohliwe, wathemba onkulunkulu bamanga.

26Mina uqobo ngizakwembula izidwaba zakho, kubonakale ubuze bakho.

27Ngibonile amanyala akho, lobufebe bakho, lokuthokoza kwakho ngakho,

lendlela zokuphinga kwakho phezu kwezintaba egangeni.

Maye kuwe, wena Jerusalema!

Koze kube nini ungakahlambuluki na?