Zaga 23 - Ndebele Bible (iBhayibhili Elingcwele) 1978

1Nxa uhlala ekudleni lesikhulu,

qaphelisa kuhle ukuthi kuyini okuphambi kwakho;

2uba uyisiminzi, uzinqande kakhulu.

3Ungafisi izibondlo zakhe,

ngoba ziyinkohliso.

4Ungatshikatshikeli inotho,

kodwa hlakanipha, uyekele.

5Uba uyiphisekela inotho,

ingamila izimpiko isuke,

iphaphele phezulu njengokhozi.

6Ungadli ukudla komuntu oncitshanayo,

ungafisi izibondlo zakhe,

7zizakukuhitsha njengenwele.

Yena uzakukucela ukuba udle unathe,

kodwa engathandi;

8uzakuhlanza okudlileyo,

ubusubona ukuthi amazwi akho amnandi abe lize.

9Ungakhulumi koyisithutha,

ngoba uzadelela amazwi akho ahlakaniphileyo.

10Ungasusi elizweni isikhonkwane esidala,

ungazithatheli amasimu ezintandane;

11ngoba zilomhlengi olamandla,

ozamela indaba yazo kuwe.

12Lalela ukufundiswa,

uzwe amazwi okwazi.

13Ungayekeli ukulaya umntwana;

ukumtshaya ngoswazi kakuyikumbulala.

14Yebo, uba umtshaya ngoswazi,

uzamkhulula ekufeni.

15Mntanami, uba uhlakanipha,

lami ngizakuthokoza;

16lenhliziyo yami ithokoze ekukhulumeni kwakho okulungileyo.

17Ungazifeli umona izoni;

kodwa uqhubeke ngokuyesaba iNkosi insuku zonke.

18Yenza lokhu ukuba uphile eminyakeni ezayo,

kungapheli masinyane ukuphila kwakho.

19Lalela, mntanami, uhlakaniphe,

uqondise inhliziyo yakho endleleni elungileyo.

20Ungahlangani lezidakwa, lezihwaba zenyama;

21ngoba izidakwa lezihwaba zizakuba ngabayanga,

lomuntu owozelayo ngenxa yokunatha uzagqoka amadabudabu.

22Lalela uyihlo owakuzalayo,

ungamdeleli unyoko lapho esemdala.

23Thenga iqiniso, ungathengisi ngalo;

thenga ukuhlakanipha lokufundiswa lokuqedisisa.

24Uyise wolungileyo uyathaba impela;

umzali wendodana ehlakaniphileyo uyathokoza ngayo.

25Uyihlo lonyoko kabathokoze ngawe,

yebo, unyoko kathabe sibili.

26Mntanami, ungilalele,

uzigcine uzilandele indlela zami.

27Iwule lingumgodi otshonayo,

lowesifazana omubi ungumthombo oyingozi.

28Ucathama njengomphangi,

andise abangathembekanga.

29Ngubani othi: Maye mina!

Ngubani olosizi?

Ngubani olenkani, losolayo?

Ngubani olamanxeba ngeze na?

Ngubani olamehlo afipheleyo na?

30Yilabo abalibala ekunatheni,

abathanda ukugambalezela iwayini elisand’ ukuvutshelwa.

31Lingakuhugi iwayini, loba selibomvu kakhulu,

loba selikhazimula esiphungweni, selimnandi kakhulu;

32ekucineni liyaluma njengenyoka, lilume njengebululu.

33Amehlo akho azakubona izinto ezimangalisayo,

ucabange ukhulume izinto eziphambeneyo.

34Uzakuba njengomuntu ondendayo olwandle,

njengolele esihlokweni sensika yomkolo.

35Uzakuthi: Bangitshayile, kodwa kangilimalanga;

balwa lami, kodwa kangizwanga buhlungu.

Ngifuna ukuvuka ukuba ngiphinde nginathe futhi.