Jer 31 - Ndebele Bible (iBhayibhili Elingcwele) 1978

1Ngalesosikhathi, kutsho iNkosi, ngizakuba nguNkulunkulu wemizi yonke yakoIsrayeli; bazakuba ngabantu bami.

2INkosi ithi: Abantu abasile empini bafumana umusa enkangala.

UIsrayeli wathi edinga ukuphumula,

3iNkosi yabonakala kuye ikhatshana.

Ngikuthandile ngothando olungapheliyo,

ngakhoke ngithembekile kuwe.

4Ngizakubuya ngikwakhe, wakheke, wena ntombi Israyeli.

Uzavunula, uthathe amachacho akho, ungene ekugideni kwabathokozayo.

5Uzakulima izivini phezu kwezintaba zeSamariya;

abahlanyeli bazahlanyela, badle izithelo zazo.

6Ngoba luzakuba khona usuku lapho abalindi bezamemeza emaqaqeni akoEfrayimi,

bathi: Sukani, siye eZiyone, eNkosini uNkulunkulu wethu.

7Ngoba iNkosi ithi: Mhlabeleleni uJakobe ngokuthokoza,

liyimemezele induna yezizwe;

limemeze, lidumise lithi: INkosi yabakhulula abantu bayo abaseleyo koIsrayeli.

8Khangelani, ngizabakhupha elizweni lasenyakatho,

ngibabuthe emikhawulweni yomhlaba;

phakathi kwabo kukhona iziphofu labaqhulayo,

labesifazana abakhulelweyo kanye labahelelwayo,

belixuku elikhulu bazabuya lapha.

9Bazabuya bekhala, ngibaduduze ekubaholeni kwami,

ngibalethe emifuleni yamanzi,

ngendlela enhle abangayikukhubeka kuyo;

ngoba nginguyise kuIsrayeli,

uEfrayimi ulizibulo lami.

10Zwanini ilizwi leNkosi, lina zizwe,

lilizwakalise ezihlengeni ezikhatshana,

lithi: Yena owachitha uIsrayeli uzakumbutha,

amaluse njengomalusi eselusa umhlambi wakhe.

11Ngoba iNkosi imhlawulele uJakobe,

yamhlenga kwabalamandla kulaye.

12Bazakuza bahlabele entabeni yaseZiyone,

bazathokoza kakhulu ngokuhle kweNkosi,

ngamabele lewayini, langamafutha,

bathokoze ngamazinyane ezimvu, langamathole enkomo;

ukuphila kwabo kube njengensimu ethelelwayo,

bangabe besaba losizi futhi.

13Kuzakuthi izintombi zithokoze ekusineni,

amajaha labadala bajabule kanyekanye.

Ngizaphendula ukukhala kwabo kube yikuthokoza,

ngizakubaduduza, ngibanike ukuthokoza endaweni yosizi;

14nginike abapristi ukudla okumnandi,

labantu bami bazakholiswa yikulunga kwami, kutsho iNkosi.

15INkosi ithi: Ilizwi liyezwakala eRama,

ukulila lokukhala okubuhlungu.

URaheli ukhalela abantwana bakhe,

uyala ukududuzwa ngabantwana bakhe, ngoba bengasekho.

16INkosi ithi: Thula, ungakhali,

lamehlo akho angabi lezinyembezi;

ngoba umsebenzi wakho uzakuba lomvuzo,

bazabuya bevela elizweni lesitha, kutsho iNkosi.

17Kuzakulunga esikhathini esizayo, kutsho iNkosi;

abantwana bakho bazabuya elizweni lakibo.

18Ngimzwile uEfrayimi ekhala esithi:

Ungitshayile, ngatshaywa njengethole elingathambanga;

ngibuyisa ukuze ngibuye,

ngoba wena uyiNkosi uNkulunkulu wami.

19Lapho sengiduhile ngaphenduka,

lalapho sengilayiwe ngaba losizi olukhulu;

ngaba lenhloni, ngadana,

ngoba ngathwala ihlazo lobutsha bami.

20Kambe uEfrayimi uyindodana yami yini eligugu kimi,

ungumntwana wami othandekayo na?

Ngoba lapho ngikhuluma ngokubi ngaye, ngiyamkhumbula.

Ngakho inhliziyo yami iyamlangatha;

impela ngizakuba lesihawu kuye, kutsho iNkosi.

21Zimisele izitshengiso, uzimiscle iziqondiso zendlela,

uqaphelise kakhulu indlela, umgwaqo owahamba ngawo.

Buya, wena ntombi Israyeli, ubuyele emizini yakini.

22Koze kube nini uzilazila, wena ndodakazi engathembekanga na?

INkosi idale into entsha emhlabeni, owesifazana uvukela indoda.

23INkosi yamabandla, uNkulunkulu kaIsrayeli, ithi: Bazabuya batsho lamazwi elizweni lakoJuda lasemizini yakhona, lapho sengibabuyisile abantu bakibo bathi:

INkosi ikubusise, wena khaya lokulunga, lawe ntaba engcwele.

24UJuda layo yonke imizi yakhe izahlala khona, abalimi labahamba lemihlambi yabo.

25Ngizabanelisa bonke abakhatheleyo, ngiqinise labo bonke abasosizini.

26Ngasengiphaphama, ngakhangela; ubuthongo bami babumnandi kimi.

27Khangela, insuku ziyeza, kutsho iNkosi, lapho ngizahlanyela indlu kaIsrayeli lendlu kaJuda ngenhlanyelo yabantu lenhlanyelo yenyamazana.

28Kuzakuthi njengalokho ngibalindile ukuba ngisiphune lokuba ngidilize lokuba ngichithe lokuba ngibhubhise, ngilethe okubi, ngokunjaloke sengizakubalinda ukuba ngakhe, ngihlanyele, kutsho iNkosi.

29Ngalezonsuku kabasayikutsho ukuthi: Oyise badlile izithelo zevini ezimunyu, amazinyo abantwana asetshelela.

35INkosi enika ilanga libe yikukhanya emini,

emise inyanga lezinkanyezi zibe yikukhanya ebusuku,

evusa ulwandle ukuba kuhlokome amavinqo alo,

ebizwa ngokuthi yiNkosi yamabandla, ithi:

36Uba ukumiswa kwalezizinto kungasuka phambi kwami, kutsho iNkosi,

lenzalo yakoIsrayeli izakuphela,

ingabe isaba yisizwe phambi kwami kuze kube nininini.

37INkosi ithi: Uba iphezulu lingalinganiswa,

lomhlaba phansi ungahlolwa,

ng’khona mina ngingayilahla yonke inzalo yakoIsrayeli ngakho konke abakwenzileyo.

38INkosi ithi: Insuku ziyeza lapho umuzi weNkosi uzakwakhiwa, kusukela eMphotshongweni kaHananeli kuze kufike eSangweni leNgonsi.

39Lentambo yokulinganisa izasuka ize iyefika oqaqeni lwaseGarebi, iphenduke lapho iye eGowa.

40Sonke isihotsha sezidumbu lesomlotha, lawo wonke amasimu kuze kufike esifuleni seKidroni, kuze kufike engonsini yeSango leBhiza ngasempumalanga, kuzakuba yindawo engcwele yeNkosi. Kakusayikusitshunwa, kudilizwe futhi, kuze kube nininini.