Mat 17 - Ndebele Bible (iBhayibhili Elingcwele) 1978

Ukukhazimuliswa kukaJesu entabeni(Mark 9:2–13; Luka 9:28–36)

1Emva kwensuku eziyisithupha uJesu wathatha oPetro, loJakobe, loJohane umfowabo kaJakobe, wakhwela labo entabeni ende bebodwa.2 Pet 1:17–18

2Waphenduka isimo phambi kwabo, ubuso bakhe bakhanya njengelanga, lengubo zakhe zaba mhlophe njengokukhanya.

3Kwasekubonakala kibo uMose loElija bekhuluma laye.

4Ngakho uPetro wathi kuJesu: Nkosi, kuhle ukuba sibe lapha. Uba uthanda, ngizakwakha amadumba amathathu, elinye libe ngelakho, elinye libe ngelikaMose, lelinye libe ngelikaElija.

5Kwathi esakhuluma, iyezi elikhanyayo labasibekela; kwezwakala ilizwi eyezini, lathi: Lo uyiNdodana yami ethandekayo engithokoza ngayo; zwanini yona.Gen 22:2; Dute 18:15; Hubo 2:7; Isa 42:1; Mat 3:17; 12:18; Mark 1:11; Luka 3:22

6Kwathi sebekuzwile lokho abafundi bawa phansi ngobuso babo, besaba kakhulu.

7Kodwa uJesu wasondela, wabathinta, wathi: Sukumani, lingesabi.

8Sebephakamisile amehlo abo kababonanga muntu, kuphela uJesu yedwa.

9Besehla entabeni, uJesu wabalaya wathi: Lingatsheli muntu ngalowombono ize ivuke kwabafileyo iNdodana yomuntu.

10Abafundi bakhe bambuza bathi: Pho, batsholoni ababhali ukuthi uElija ufanele ukufika kuqala na?Mal 4:5

11Wabaphendula wathi: UElija uzafika impela, uzakubuyisela izinto zonke.

12Kodwa ngithi kini uElija sewafika; kabamazanga, kodwa benza kuye lokho abakuthandayo. Kunjalo leNdodana yomuntu izakuhlutshwa yibo.Mat 11:14

13Abafundi basebeqedisisa ukuthi wakhuluma labo ngoJohane uMbhaphathizi.

Ukusiliswa komfana owayelesithuthwane(Mark 9:14–29; Luka 9:37–42)

14Kwathi sebefikile exukwini, kweza kuye umuntu, waguqa phambi kwakhe,

15wathi: Nkosi, akuhawukele indodana yami, ngoba ilesithuthwane, iyahlupheka kakhulu, ngoba iwele kanengi emlilweni, futhi kanengi lemanzini.

16Ngiyilethe kubafundi bakho, kodwa behlulekile ukuyisilisa.

17UJesu waphendula wathi: O sizukulwana esingakholwayo lesonakeleyo, koze kube nini ngilani na? Koze kube nini ngilibekezelela na? Iletheni kimi.

18UJesu wayikhalimela, umoya omubi waphuma kuyo; umfana wasila kusukela kulesosikhathi.

19Abafundi basebesiza kuJesu bebodwa, bathi: Kungani sahlulekile ukuwukhupha na?

20Wathi kubo: Kungenxa yokukholwa kwenu okuncinyane. Ngoba ngiqinisile ngithi kini: Aluba lilokukholwa okungangohlamvu lwemastade, lizakuthi kulintaba: Suka lapha, uye laphaya; izakusuka. Kaliyikwahlulwa lutho.Mat 21:21; Mark 11:23; 1 Kor 13:2

UJesu ukhuluma futhi ngokuhlupheka kwakhe(Mark 9:30–32; Luka 9:43–45)

22Besahambahamba eGalili, uJesu wathi kibo: INdodana yomuntu izakunikelwa ezandleni zabantu;

23bazakuyibulala, kodwa ngosuku lwesithathu izakuvuswa. Badabuka kakhulu.

UJesu uthela umthelo

24Kwathi sebefikile eKapenawume abaqoqi bemali yethempeli beza kuPetro, bathi: Umfundisi wenu uyayithela imali yethempeli na?Eks 30:13; 38:26

25Wathi: Yebo uyayithela. Esengenile endlini uJesu wakhuluma laye kuqala esithi: Uthini na, Simoni? Amakhosi omhlaba amukela kubani imithelo, kumadodana abo ingabe kwabezizwe na?

26UPetro wathi kuye: Kwabezizwe. UJesu wathi kuye: Ngakho amadodana akhululekile.

27Kodwake ukuba singabakhubekisi, yana olwandle, uphose ingwegwe uthathe inhlanzi ebanjwe kuqala; kuzakuthi usuvule umlomo wayo uzakufumana imali; uyithathe ubanike ibe ngumthelo wami lowakho.