Levi 10 - Ndebele Bible (iBhayibhili Elingcwele) 1978

Isono sikaNadabi loAbihu

1UNadabi loAbihu, amadodana kaAroni, bathatha imiganu yabo yokutshisela impepha, bafaka umlilo kiyo, babeka kiyo impepha, banikela ngomlilo ongafanele eNkosini eyayingabalayanga wona.

2Kwavela umlilo eNkosini, wabaqothula, bafela phambi kweNkosi.

3UMose wasesithi kuAroni: Yikho lokhu iNkosi eyakutsho isithi: Ngizakuzibonakalisa ukuthi ngingcwele ngalabo abaseduze lami, futhi ngizakuba lodumo phambi kwabantu bonke. UAroni wathula.

4UMose wabiza uMishayeli loElizafani, amadodana kaUziyeli isihlobo sikaAroni wathi kibo: Sondelani, libasuse abafowenu ngaphambi kwendlu engcwele, libakhuphele ngaphandle kwezihonqo.

5Basondelake, babathwala bembethe amabhatshi abo, babakhuphela ngaphandle kwezihonqo, njengokutsho kukaMose.

Imisebenzi yabapristi

6UMose wathi kuAroni lakuEleyazare loIthamari, amadodana akhe: Lingayekeli ukuba inwele zamakhanda enu zithukuluke, lingadabuli ingubo zenu ekukhaleni kwenu, funa life, lolaka lukaNkulunkulu lwehlele phezu kwebandla lonke. Kodwa abakini, yonke indlu kaIsrayeli, bangakhala ngokutshisa okwenziwe yiNkosi.

7Lingaphumi ngomnyango wethente lokuhlangana ukuba lingafi, ngoba amagcobo okugcoba kweNkosi aphezu kwenu. Benzake njengelizwi likaMose.

8INkosi yakhuluma kuAroni yathi:

9Unganathi iwayini lotshwala, wena lamadodana akho, nxa lingena ethenteni lokuhlangana ukuba lingafi. Lokhu kuzakuba yisimiso esingelakuphela ezizukulwaneni zenu.

10Lizakwehlukanisa okungcwele lokungangcwele, lokuhlambulukileyo lokungahlambulukanga;

11lifundise abantu bakoIsrayeli zonke izimiso iNkosi ezikhulume kubo ngoMose.

12UMose wathi kuAroni lakuEleyazare loIthamari, amadodana akhe aseleyo: Thathani umnikelo wempuphu oseleyo eminikelweni eyenzelwe iNkosi ngomlilo, liwudle ungelamvubelo ngaseceleni kwealtare, ngoba ungcwele kakhulu;Levi 6:14–18

13liwudlele endaweni engcwele, ngoba uyisabelo sakho lesabelo samadodana akho, esivela eminikelweni eyenzelwe iNkosi ngomlilo; ngoba ngiyalaywa kunjalo.

14Kodwa isifuba esizunguzwayo lomlenze onikelwayo lizakukudlela endaweni ehlambulukileyo, wena lamadodana akho, lamadodakazi akho; ngoba kunikwe ukuba yisabelo sakho lesabelo samadodana akho, kuvela emihlatshelweni yeminikelo yokuthula yabantu bakoIsrayeli.Levi 7:30–34

15Umlenze onikelwayo lesifuba esizunguzwayo bazakukuletha kanye leminikelo yamahwahwa eyenziwe ngomlilo, ukuze kuzunguzwe, kube ngumnikelo wokuzunguzwa phambi kweNkosi, kube yisabelo sakho lesamadodana akho kokuphela, njengokulaya kweNkosi.

16UMose wabuzisisa ngembuzi yomnikelo wesono, wabona ukuthi yayitshisiwe. Wathukuthelela uEleyazare loIthamari, amadodana kaAroni aseleyo, wathi:

17Kalidlanga ngani umnikelo wesono endaweni yendlu engcwele, ngoba ungcwele kakhulu, futhi liphiwe wona ukuba lithwale ububi bebandla, libenzele indlela yokubuyisana phambi kweNkosi na?Levi 6:24–26

18Khangelani, igazi lawo kalingeniswanga endlini engcwele. Ngabe liyidlile endlini engcwele njengokulaya kwami.

19UAroni wathi kuMose: Khangela, lamhla sebenikele umnikelo wabo wesono lomnikelo wabo wokutshiswa eNkosini, kantike ngehlelwe yilokhu mina! Uba bengidlile umnikelo wesono lamuhla, bekuzakwamukeleka emehlweni eNkosi na?

20Esezwile lokho uMose wathaba.