Dute 9 - Ndebele Bible (iBhayibhili Elingcwele) 1978

INkosi izakuchitha izizwe zaseKanani

1Zwana, Israyeli; uzakuchapha iJordani lamuhla, ungene uthumbe ilizwe lezizwe ezinkulu lezilamandla kulawe, lemizi emikhulu ebiyelwe ngemithangala efika phezulu.

2Zona zingabantu abakhulu labade, amadodana amaAnaki owaziyo, uzwile kuthiwa: Ngubani ongema phambi kwamadodana kaAnaki?

3Ngakhoke yazi lamuhla ukuthi yiNkosi uNkulunkulu wakho echapha ngaphambi kwakho enjengomlilo oqothulayo; yona izakubachitha, ibanqobe phambi kwakho; uzakubaxotsha, ubabhubhise masinyane, njengokukuthembisa kwayo.

4Lapho iNkosi uNkulunkulu wakho isibaxotshile phambi kwakho, ungabokutsho enhliziyweni yakho ukuthi: Kungenxa yokulunga kwami okwenze iNkosi ingingenise elizweni leli ukulithumba. Kodwa kungenxa yobubi balezizizwe iNkosi ezixotsha phambi kwakho.

5Kakusikho ngenxa yokulunga kwakho lobuqotho benhliziyo yakho ukuthi ungene elizweni lazo ukulithumba; kodwa kungenxa yobubi balezizizwe iNkosi uNkulunkulu wakho ezixotsha phambi kwakho, futhi lokuba iqinise ilizwi eyalifunga kubokhokho bakho oAbrahama loIsaka loJakobe.

6Yazike ukuthi iNkosi uNkulunkulu wakho kayikuniki lelilizwe elihle ukuba libe ngelakho ngenxa yokulunga kwakho; ngoba uyisizwe esilenhliziyo elukhuni.

AbakoIsrayeli bayivukela iNkosi enkangala

7Khumbulani, lingakhohlwa, ukuthi lathukuthelisa iNkosi uNkulunkulu wenu enkangala; layivukela kusukela osukwini elaphuma ngalo eGibithe laze lafika kulindawo.

8LaseHorebe layithukuthelisa, yaze yafisa ukulichitha ngenxa yokuthukuthela kwayo okukhulu.

9Sengikhwele entabeni ukwamukela amatshe esivumelwano iNkosi eyasenza lani, ngahlala entabeni insuku ezingamatshumi amane lobusuku obungamatshumi amane, ngingadli kudla, nginganathi manzi.Eks 24:18

10INkosi yanginika amatshe amabili alotshiwe ngomunwe kaNkulunkulu, okwakulotshwe kuwo wonke amazwi iNkosi eyayiwakhulume kini entabeni, iphakathi komlilo ngosuku lokuhlangana.

11Kwathi seziphelile insuku ezingamatshumi amane lobusuku obungamatshumi amane, iNkosi yangipha lawomatshe amabili, amatshe esivumelwano.

12Yasisithi kimi: Phangisa wehle lapha, ngoba abantu bakho owabakhupha eGibithe bonile, baphambukile masinya endleleni engabalaya yona, bazenzela isithombe esibunjiweyo.

13INkosi yaphinda yathi kimi: Ngibonile ukuthi lababantu bangabantu abanhliziyo zilukhuni.

14Ngiyekela ukuba ngibabhubhise, ngiqede ibizo labo emhlabeni; ngizakukwenza wena ube yisizwe esikhulu lesilamandla kulabo.

15Ngasengiphenduka ngisehla entabeni, intaba yayivutha umlilo; ngangiphethe amatshe amabili esivumelwano.

16Ngabona ukuthi lonile eNkosini uNkulunkulu wenu, lokuthi lizenzele ithole elibunjiweyo, liphambukile masinyane endleleni iNkosi eyayililayele.

17Ngakhoke ngathatha amatshe amabili, ngawaphosela phansi, ngawabulala phambi kwamehlo enu.

18Ngaziwisela phansi phambi kweNkosi njengakuqala, insuku ezingamatshumi amane lobusuku obungamatshumi amane, ngingadli kudla, nginathi manzi ngenxa yaso sonke isono senu elisenzileyo, lenza okubi emehlweni eNkosi, layithukuthelisa.

19Ngoba ngangisesaba ukuthukuthela lolaka lwayo okwakuvutha ngenxa yenu yaze yafuna ukulibhubhisa; kodwa yangilalela langalesosikhathi.Heb 12:21

20INkosi yamthukuthelela kakhulu uAroni yaze yathanda ukumbhubhisa; ngamkhulekela loAroni ngalesosikhathi.

21Ngasengilithatha ithole, leyonto embi elaliyenzile, ngalitshisa ngomlilo, ngalichoboza, ngalichola laze laba yimpuphu; ngayiphosela leyompuphu esifuleni esasisehla entabeni.

22Layithukuthelisa futhi iNkosi eTabera, laseMasa, laseKiribothi‐Hathava.Nani 11:3, 34; Eks 17:7

23Kwathi lalapho iNkosi elithuma lisuka eKadeshi‐Barneya isithi: Hambani, lithumbe ilizwe engilinike lona; lahlamuka emlayweni weNkosi uNkulunkulu wenu, kaliyikholwanga, kalilalelanga lelizwi layo.Nani 13:25—14:38; Dute 1:21, 26; Heb 3:16

24Liyivukele iNkosi kusukela osukwini engaliqabuka ngalo.

25Ngaziwisela phansi phambi kweNkosi kulezonsuku ezingamatshumi amane lobusuku obungamatshumi amane, ngoba iNkosi yathi izakulichitha.

26Ngakhuleka eNkosini ngathi: Nkosi Nkulunkulu, ungabachithi abantu bakho abayisizwe sakho obakhulule ngobukhulu bakho, wabakhupha eGibithe ngesandla esilamandla.

27Khumbula inceku zakho oAbrahama loIsaka loJakobe, ungakhangeli inkani yalababantu lobubi babo lesono sabo,

28funa abantu balelolizwe owasikhupha kilo bathi: Kungenxa yokuba iNkosi yehluleka ukubangenisa elizweni eyabathembisa lona, langenxa yokuba ibazonda, yabakhupha ukuba ibabulalele enkangala.

29Ngoba bangabantu bakho abayisizwe sakho, owabakhupha ngamandla akho amakhulu langengalo yakho elamandla.