Jobe 40 - Ndebele Bible (iBhayibhili Elingcwele) 1978

Impendulo kaJobe

1INkosi yasisithi kuJobe:

2Osolayo uzaphikisana loSomandla na?

Ophikisana loNkulunkulu kaphendule.

3UJobe waseyiphendula iNkosi esithi:

4Khangela, kangisilutho lwalutho,

ngingakuphendula ngithini na?

Ngibamba umlomo wami ngesandla sami.

5Ngikhulumile kanye, kangiyikuphendula futhi;

ngakhuluma okwesibili, kangisayikuqhubeka.

INkosi ibonakalisa amandla ayo

6INkosi yasimphendula uJobe

isesivunguzaneni yathi:

7Qina njengendoda,

ngizakukubuza, lawe ungiphendule.

8Lembala, uzachitha ukwahlulela kwami, ungilahle,

ukuba wena ube ngolungileyo na?

9Ulamandla njengoNkulunkulu na?

Ungaduma ngelizwi elinjengelakhe na?

10Nxa kunjalo, yambatha ubukhosi lobuqotho,

uzambese ngodumo langenkazimulo;

11uthulule ukuvutha kolaka lwakho,

ukhangele bonke abazigqajayo ubathobise.

12Khangela bonke abaziphakamisayo,

ubehlisele phansi,

unyathelele phansi ababi endaweni zabo,

13ubafihle bonke othulini lomhlaba,

ubagoqele, ubafake elibeni elingaziwayo.

14Ng’khonake lami ngizavuma ukuthi isandla sakho sokunene silamandla okukusiza.

15Ake ukhangele imvubu engayenza kanye lawe;

idla utshani njengenkabi.

16Khangela amandla ayo okhalweni lwayo,

lamandla ayo emisipha yesisu sayo.

17Iyenza umsila wayo uqine njengesihlahla somkusu,

lemisipha yemilenze yayo yalukene.

18Amathambo ayo anjengembobo zethusi,

lezitho zayo zinjengemigoqo yensimbi.

19Ingowokuqala wezidalwa zikaNkulunkulu,

yenziwa ibe yingqwele yezinye.

20Intaba ziyayivezela ukudla,

lapho kudlala khona inyamazana zonke zeganga.

21Ilala phansi kwesihlahla esiluhlaza,

ekusithekeni kwemihlanga yasemaxhaphozini.

22Isihlahla esiluhlaza siyayenzela umthunzi,

lemidubu yomfula iyayiphahla.

23Lanxa umfula uphuphuma, kayethuki,

ilesibindi lanxa amanzi ephuphumela emlonyeni wayo.

24Kukhona ongayibamba ngengwegwe,

ayifake umkhala emakhaleni ayo na?