Dute 2 - Ndebele Bible (iBhayibhili Elingcwele) 1978

Inkulumo kaMose isaqhubeka

1Sasesiphenduka, saqonda enkangala ngendlela eya oLwandle oluBomvu, njengokutsho kweNkosi kimi; sazula entabeni yaseSeyiri insuku ezinengi.Nani 21:4

2INkosi yasikhuluma kimi isithi:

3Sekuyisikhathi eside lizula entabeni lezi; phendukani, liye ngasenyakatho.

4Balaye abantu uthi: Selizakudabula ilizwe lezihlobo zenu, abantwana bakaEsawu abakhileyo eSeyiri. Bazakulesaba, ngakho linanzelele,Gen 36:8

5ukuba lingalwi labo; kangisoze ngilinike ilizwe labo, atshi bo! ngitsho lendawo elingana lonyawo nje, ngoba ngimnikile uEsawu intaba zaseSeyiri zibe ngezakhe.

6Lizakuthenga ukudla kubo ukuba lidle, lithenge kubo lamanzi ukuba linathe.

7Ngoba iNkosi uNkulunkulu wenu ilibusisile emsebenzini wonke wezandla zenu; ililondolozile ekuhambeni kwenu kulinkangala enkulu. INkosi uNkulunkulu wenu ibe lani liminyaka engamatshumi amane, kaliswelanga lutho.

8Ngakhoke saqhubeka, sadlula izihlobo zethu, abantwana bakaEsawu abakhileyo eSeyiri, satshiya indlela yaseAraba esuka eElathi leEziyoni‐Geberi.

Saphenduka, sahamba ngendlela eya enkangala yaseMowabi.

9INkosi yasisithi kimi: Ungabakhathazi abaseMowabi, ungalwi labo; ngoba kangisoze ngikunike ilizwe labo libe ngelakho, ngoba ngibanikile abantwana bakaLoti iAri ibe yindawo yabo.Gen 19:37

10— Kwakuhlala khona endulo amaEmi, abantu abanengi, abakhulu, labade njengamaAnaki;

11njengamaAnaki laba kwakuthiwa ngamaRefa, kodwa abaseMowabi bababiza ngokuthi ngamaEmi.

12LamaHori ayehlala eSeyiri endulo, kodwa abantwana bakaEsawu bawaxotsha, bawachitha phambi kwabo, bakha endaweni yawo, njengokwenza kukaIsrayeli elizweni lakubo elaliyilifa abalinikwa yiNkosi. —

13Sukanike, liwele umfula iZeredi. Ngakhoke sawela umfula iZeredi.

14Kwasekudlule iminyaka engamatshumi amathathu lesificaminwembili kusukela ekusukeni kwethu eKadeshi‐Barneya kuze kube sekuweleni kwethu umfula iZeredi, kwaze kwaphela sonke isizukulwana samadoda empi ezihonqweni, njengokufunga kweNkosi kuwo.Nani 14:28–35

15Ngoba impela isandla seNkosi sasimelene lawo, sawachitha ezihonqweni, aze aphela.

16Kwathi esefile amadoda empi wonke phakathi kwabantu,

17iNkosi yathi kimi:

18Lamhlanje uzakweqa umkhawulo waseMowabi eAri,

19lapho usufikile elizweni labantwana bakaAmoni, ungabakhathazi, ungalwi labo, ngoba kangisoze ngikunike ilizwe labo ukuba libe ngelakho, ngoba ngibanikile lona abantwana bakaLoti.Gen 19:38

20— Lalelo kuthiwa yilizwe lamaRefa, ngoba wona ayehlala khona endulo, kodwa abaseAmoni bawabiza ngokuthi ngamaZamuzumu;

21ayengabantu abanengi, abakhulu, labade njengamaAnaki; kodwa iNkosi yawachitha phambi kwabo, labantwana bakaAmoni bawaxotsha, bakha endaweni yawo,

22njengalokho eyakwenzela abantwana bakaEsawu abakhileyo eSeyiri, yawachitha amaHori phambi kwabo, bawaxotsha, bakha endaweni yawo kuze kube lamuhla.

23LamaAvi lawo, ayehlala emizaneni eyayiseduze leGaza, anqotshwa ngamaKafitori avela eKafitori, akha endaweni yawo. —

24Sukanike, lihambe lichaphe umfula iArinoni. Khangelani, nginikele ezandleni zenu uSihoni umAmori, inkosi yaseHeshiboni, kanye lelizwe lakhe; qalani ukulinqoba ilizwe, lilwe laye.

25Kusukela lamhla ngizakwenza abantu bonke abangaphansi komthunzi welanga batshaywe luvalo, balesabe, lokuthi lapho besizwa ngani bathuthumele, baqhaqhazele ngenxa yenu.

26Ngasengithuma izigijimi kuSihoni inkosi yaseHeshiboni, zisuka enkangala yaseKedemothi, zilamazwi okuthula, ngathi:

27Akungivumele ukuba ngidabule phakathi kwelizwe lakho; ngizahamba ngomgwaqo, ngingaphambukeli ngakwesokunene loba ngakwesokhohlo.

28Uzakungithengisela ukudla ukuba ngidle, ungithengisele lamanzi ukuba nginathe; ungivumele ukuba ngidlule nje kuphela,

29njengalokhu benza njalo abantwana bakaEsawu abakhileyo eSeyiri labaseMowabi abakhileyo eAri, ngizachapha iJordani, ngingene elizweni esinike lona iNkosi uNkulunkulu wethu.

30Kodwa uSihoni inkosi yaseHeshiboni kayisivumelanga ukuba sidlule; ngoba iNkosi uNkulunkulu wenu yenza umoya wakhe waba lukhuni, lenhliziyo yakhe yaba lenkani, ukuze imnikele ezandleni zenu njengalamhlanje.

31INkosi yathi kimi: Khangela, lamhla sengiqalile ukunikela uSihoni lelizwe lakhe kuwe; qala ukuhlasela, ukuba ilizwe lakhe libe ngelakho.

32Kwasekuphuma uSihoni labantu bakhe bonke ukusihlasela eJahazi.

33INkosi uNkulunkulu wethu yamnikela kithi: samnqoba yena lamadodana akhe labantu bakhe.

34Ngalesosikhathi sathumba yonke imizi yakhe, sayichitha yonke, sabulala abesilisa labesifazana labantwana; kasitshiyanga muntu;

35sathumba inkomo kuphela, zaba yimpango yethu; saphanga lemizi esayinqobayo.

36Kusukela eAroweri eliseduze lesihotsha saseArinoni, lasemzini osesihotsheni, kuze kube seGileyadi kwakungekho muzi owasahlula ngenxa yokuphakama kwawo. INkosi uNkulunkulu wethu yayinikela yonke ezandleni zethu.

37Kodwa kasisondelanga elizweni labantwana bakaAmoni, lasezinkunjini zomfula iJaboki, lasemizini yasezintabeni, lalapho iNkosi uNkulunkulu wethu eyasinqabela khona.