Levi 13 - Ndebele Bible (iBhayibhili Elingcwele) 1978

Imilayo emayelana lobulephero

1INkosi yathi kuMose loAroni:

2Nxa kukhona emzimbeni womuntu ithumba loba inxeba elibhibhidlayo, loba ibala, lokhu kubonakalisa ukuthi umuntu lo ulobulephero emzimbeni wakhe, kalethwe kuAroni umpristi ingabe kwenye yamadodana akhe angabapristi.

3Umpristi uzakukhangela isifo esisemzimbeni walowomuntu; uba uboya obukhona sebuphendukile baba mhlophe, lesifo sesitshonile enyameni yakhe, kuyisifo sobulephero. Umpristi esemhlolile uzakutsho ukuthi ungcolile.

4Kodwa uba ibala elisemzimbeni wakhe limhlophe, lingabonakali ukuthi litshonile, loboya obukhona bungaphendukanga baba mhlophe, umpristi uzakumvalela olesifo insuku eziyisikhombisa.

5Ngosuku lwesikhombisa umpristi uzakumhlola; uba kubonakala kuye ukuthi isifo sisemi, singandanga emzimbeni wakhe, umpristi uzamvalela ezinye insuku eziyisikhombisa.

6Ngosuku lwesikhombisa umpristi abuye amhlole; uba ibala lifiphele, lesifo singandanga emzimbeni, umpristi uzakutsho ukuthi usehlambulukile; kulibala nje. Kagezise ingubo zakhe, ahlambuluke.

7Kodwa uba ibala lisanda emzimbeni wakhe emva kokuzibonakalisa kwakhe kumpristi ngokuhlambuluka kwakhe, kabuye azibonakalise kumpristi futhi,

8umpristi amhlole; uba ibala landile emzimbeni, umpristi uzakutsho ukuthi ungcolile, ngoba kuyisifo sobulephero.

9Lapho umuntu elobulephero, uzakulethwa kumpristi,

10umpristi amhlole; uba kukhona emzimbeni wakhe ithumba elimhlophe, eliphendule uboya baba mhlophe, futhi uba ithumba lilomlomo,

11kuyibulephero obudala emzimbeni wakhe; umpristi uzakutsho ukuthi ungcolile, angamvaleli ngoba engcolile.

12Uba ubulephero busanda emzimbeni, buze bube semzimbeni wonke womuntu olesifo, kusukela ekhanda kuze kufike enyaweni, njengokubona kompristi,

13umpristi uzakumhlola; uba wonke umzimba wakhe ulobulephero, umpristi uzakutsho ukuthi uhlambulukile; ngoba konke kuphendukile kwaba mhlophe, uhlambulukile.

14Kodwa nxa kubonakala kuye inyama ebomvu, uzakuba ngongcolileyo.

15Umpristi uzakuhlola inyama ebomvu, atsho ukuthi ungcolile; inyama ebomvu ingcolile, ngoba iyibulephero.

16Kodwa uba inyama ebomvu iphenduka ibe mhlophe, uzakuya kumpristi,

17umpristi amhlole; uba inyama ebomvu iphendukile yaba mhlophe, umpristi uzakutsho ukuthi olesifo uhlambulukile; uhlambulukile sibili.

18Nxa kukhona emzimbeni womuntu ithumba eselipholile,

19besekubonakala endaweni yethumba ibala elimhlophe lelibomvu loba elinye ithumba elimhlophe, kakutshengiswe umpristi,

20umpristi amhlole; uba libonakala ukuthi litshonile, lokuthi uboya obukhona buphendukile baba mhlophe, umpristi uzakutsho ukuthi ungcolile; kuyisifo sobulephero, sivele ethunjeni.

21Kodwa uba umpristi ebona ukuthi uboya obukhona kabumhlophe, lokuthi kalitshonanga kodwa lifiphele, umpristi uzamvalela insuku eziyisikhombisa.

22Uba lisanda emzimbeni, umpristi atsho ukuthi ungcolile, ngoba kuyisifo.

23Kodwa uba ibala limi endaweni yalo, lingandi, kulithumba eselipholile; umpristi atsho ukuthi uhlambulukile.

24Uba kukhona emzimbeni inxeba elenziwa yikutshiswa, lenyama ebomvu iphendukile yaba libala elimhlophe loba ibala elimhlophe lelibomvana,

25umpristi kalihlole; uba uboya obukhona buphendukile baba mhlophe, libonakala ukuthi litshonile, kuyibulephero; buvele enxebeni elenziwa yikutshiswa; umpristi uzakutsho ukuthi ungcolile, ngoba kuyibulephero.

26Kodwa uba umpristi ebona ukuthi uboya obukhona kabumhlophe, lokuthi kalitshonanga kodwa lifiphele, umpristi uzamvalela insuku eziyisikhombisa.

27Ngosuku lwesikhombisa umpristi uzakumhlola; uba lisanda emzimbeni, umpristi uzakutsho ukuthi ungcolile, ngoba kuyibulephero.

28Kodwa uba ibala limi endaweni yalo, lingandi emzimbeni, kodwa lifiphele, kulinxeba elenziwa yikutshiswa; umpristi atsho ukuthi uhlambulukile, ngoba kulinxeba lokutshiswa.

29Nxa owesifazana loba owesilisa elesilonda ekhanda loba esilevini,

30umpristi uzakuhlola isilonda; uba sibonakala ukuthi sitshonile, lezinwele lendevu ezikhona zimpofana zingakhuli, umpristi uzakutsho ukuthi ungcolile; ngoba eloqweqwe olulumayo oluyibulephero ekhanda loba esilevini.

31Uba umpristi ebona ukuthi isilonda esilumayo kasitshonanga, lokuthi kakukho inwele ezimpofana kuso, umpristi uzamvalela lowomuntu olesilonda insuku eziyisikhombisa.

32Ngosuku lwesikhombisa umpristi uzakuhlola isilonda; uba uqweqwe olulumayo lungandanga, futhi kungekho kuso inwele ezimpofana, loqweqwe lubonakala ukuthi kalutshonanga,

33umuntu uzakuziphuca, kodwa angaziphuci lapho kukhona uqweqwe, umpristi amvalele olesilonda lesi ezinye insuku eziyisikhombisa.

34Ngosuku lwesikhombisa umpristi uzakukhangela uqweqwe olulumayo; uba lungandanga emzimbeni, futhi lubonakala ukuthi kalutshonanga, umpristi uzakutsho ukuthi uhlambulukile, agezise ingubo zakhe, ahlambuluke.

35Kodwa uba uqweqwe lusanda emzimbeni emva kokuhlanjululwa kwakhe,

36umpristi uzakumhlola; uba uqweqwe lwandile emzimbeni, umpristi kangadingi inwele ezimpofana; ungcolile.

37Kodwa uba kubonakala kuye ukuthi uqweqwe lusemi, lenwele ezimnyama sezimilile khona, uqweqwe selupholile, lowomuntu uhlambulukile; umpristi katsho ukuthi usehlambulukile.

38Nxa owesilisa loba owesifazana elamabala amhlophe emzimbeni wakhe,

39umpristi uzakumhlola; uba amabala emhlotshana nje, kuyimpunza equbukileyo; uhlambulukile.

40Uba inwele zekhanda lomuntu seziphelile, ulempabanga, kodwa uhlambulukile.

41Uba inwele ziphelile ebunzini lomuntu lasemaceleni, ulempabanga, kodwa uhlambulukile.

42Kodwa uba kukhona ekhanda elisubukileyo loba ebunzini elisubukileyo ibala elimhlophe lelibomvana, kuyibulephero obuqubukile ekhanda lakhe loba ebunzini lakhe.

43Umpristi uzakumhlola; uba ebona ithumba elimhlophe lelibomvana ekhanda lakhe elisubukileyo loba ebunzini lakhe elisubukileyo, libonakale ukuthi lifanana lobulephero emzimbeni,

44ungumuntu olobulephero, ungcolile; umpristi katsho ukuthi ungcolile, ngoba elobulephero ekhanda.

45Umuntu olesifo sobulephero kagqoke ingubo ezidabukileyo, lenwele zakhe zithukuluke, ambomboze indebe yakhe yangaphezulu, akhale athi: Ngingcolile, ngingcolile!

46Uzakuhlala engcolile sonke isikhathi sesifo sakhe; ungcolile, ngakho uzakuhlala yedwa endaweni engaphandle kwezihonqo.

47Uba kukhona isibhadlu sokubola engutsheni yoboya bemvu, loba engutsheni yelembu elihle,

48loba elenjini elalukiweyo, loba esikhumbeni, ingabe entweni eyenziwe ngesikhumba,

49futhi uba sona siluhlaza loba sibomvu engutsheni, loba elenjini elalukiweyo, loba esikhumbeni, ingabe entweni eyenziwe ngesikhumba, kuyikubola okumele kutshengiswe umpristi.

50Umpristi uzakuhlola lokho okulokubola, akuvalele insuku eziyisikhombisa.

51Ngosuku lwesikhombisa uzakukuhlola; uba isibhadlu sokubola siqhelile engutsheni, loba elenjini elalukiweyo, loba esikhumbeni, loba kuyini okusetshenzwa ngesikhumba, singesokubola okubi; ngakho leyonto ingcolile.

52Uzakutshisa ingubo, lelembu elalukiweyo, loboya, lelembu elihle, lento yesikhumba, konke okulesibhadlu sokubola; ngoba kubola kakutshiswe ngomlilo.

53Uba umpristi ebona ukuthi isibhadlu kasiqhelanga engutsheni, loba elenjini elalukiweyo, loba entweni yesikhumba,

54umpristi uzakulaya ukuba lokho okulokubola okunje kugeziswe, akuvalele ezinye insuku eziyisikhombisa,

55akuhlole sekugezisiwe. Uba ebona ukuthi isibhadlu sokubola kasiphendukanga umbala waso, lanxa singaqhelanga, kungcolile. Kakutshiswe ngomlilo, loba isibhadlu sokubola sibonakala ngaphakathi loba ngaphandle.

56Kodwa uba umpristi ebona ukuthi isibhadlu sokubola siphelile sekugezisiwe, kasuse isibhadlu esisengutsheni, loba esikhumbeni, loba elenjini elalukiweyo.

57Uba sibuya sibonakale futhi engutsheni loba elenjini elalukiweyo loba entweni yesikhumba, lokhu kutsho ukuthi siyaqhela; kakutshiswe ngomlilo lokho okulokubola.

58Uba kugeziswa ingubo lelembu elalukiweyo lento yesikhumba, kuphele isibhadlu sokubola, kakugeziswe futhi okwesibili, kuzahlambulukake.

59Lowo ngumlayo omayelana lesibhadlu sokubola esisengutsheni yoboya bemvu, loba engutsheni yelembu elihle, loba elenjini elalukiweyo, loba entweni yesikhumba, okuzabonwa ngawo ukuthi kuhlambulukile ingabe kungcolile.