Ingoma Yezingoma 3 - Ndebele Bible (iBhayibhili Elingcwele) 1978

1Embhedeni wami ubusuku ngobusuku ngiphupha

ngimdinga lowo othandwa yinhliziyo yami;

ngamdinga, kodwa kangaze ngamfica.

2Ngathi: Ngizakusuka nginqume lomuzi,

ezindleleni zawo lasemagcekeni awo,

ngimdinge yena othandwa yinhliziyo yami.

Ngasengimdinga, kodwa kangimfumananga.

3Abalindi bangifica ekunqumeni kwabo lomuzi,

ngababuza ngathi: Limbonile othandwa yinhliziyo yami na?

4Sengidlule kancinyane ngamfumana yena othandwa yinhliziyo yami.

Ngambamba, kangivumanga ukuba ahambe

ngaze ngamletha endlini kamama,

endlini yakhe owangizalayo.

5Ngiyalifungisa, lina madodakazi aseJerusalema,

ngezimpala langemiziki yeganga,

ukuba lingasiphazamisi lisivuse singakazivukeli isithandwa sami.

6Kuyini lokhuya okuvela enkangala kunjengensika yentuthu,

evela ekutshisweni kwemure lempepha, lokunjengamakha wonke abathengi na?

7Kulithala likaSolomoni,

lilamaqhawe angamatshumi ayisithupha,

amaqhawe alamandla akoIsrayeli,

8wonke ehlomile ngemikhonto ezingwazi zempi,

elungele ukuhlatshwa komkhosi ebusuku.

9Inkosi uSolomoni wazenzela ithala ngezigodo zaseLebanoni.

10Imijabo yalo yaba ngeyesiliva,

iseyamo salo singesegolide,

lesihlalo salo sasilombala oyibubende,

lalenziwe kuhle ngaphakathi ngempondo zendlovu.

11Phumani, lina madodakazi aseJerusalema,

liphume lani, madodakazi aseZiyone,

liyibone inkosi uSolomoni,

ithwele umqhele eyawuthwaliswa ngunina

mhla wosuku lomthimba wayo,

mhla wosuku lokuthokoza kwayo.