Jer 2 - Ndebele Bible (iBhayibhili Elingcwele) 1978

Ukuhlamuka kukaIsrayeli

1Laselifika kimi ilizwi leNkosi lisithi:

2Hamba uyememezela eJerusalema uthi: INkosi ithi:

Ngiyakhumbula ukuthembeka kwakho usemutsha,

lothando lwakho usengumlobokazi,

lokungilandela kwakho enkangala, elizweni elingahlanyelwanga.

3UIsrayeli wayengcwele eNkosini,

eyizithelo zokuqala zesivuno sayo.

Bonke abazidlayo baba lecala,

behlelwa ngokubi, kutsho iNkosi.

4Zwanini ilizwi leNkosi, lina ndlu kaJakobe,

lani lonke sendo lwendlu yakoIsrayeli.

5INkosi ithi: Yibubi bani okhokho benu ababufumana kimi

ukuze basuke baye khatshana lami,

balandele lokho okuyize, babe yize na?

6Kabatshongo ukuthi: Ingaphi iNkosi

eyasikhupha elizweni laseGibithe,

yasikhokhela enkangala, elizweni elilugwadule lelilemigodi,

elizweni elomileyo elimnyama kakhulu,

elizweni elingahanjwa muntu,

lalapho kungahlali muntu khona na?

7Ngalingenisa elizweni elivundileyo ukuba lidle izithelo zalo lokuhle kwalo.

Kodwa lapho selingenile lalingcolisa ilizwe lami,

lenza ilizwe engalinika lona laba ngamanyala.

8Abapristi kabatshongo ukuthi: Ingaphi iNkosi na?

Lalabo abaphatha umlayo kabangazanga.

Ababusi baphambuka kimi,

labaprofethi batshumayela ngoBali,

balandela izithombe ezingasizi lutho.

9Ngakhoke ngilibeka icala, kutsho iNkosi,

ngizabeka icala labantwana babantwana benu.

10Hambani liye ezihlengeni zaseKuprosi libone,

lithumele abantu eKedari lihlolisise,

libone ukuthi yake yaba khona into enjengale na?

11Isizwe sake santshintsha onkulunkulu baso,

loba bengesibo onkulunkulu balutho na?

Kodwa abantu bami bangintshintshile mina enginguNkulunkulu wabo obalethela udumo ngonkulunkulu ongasizi lutho.

12Mangalani ngalokho, lina mazulu,

lithuthumele, lidane kakhulu, kutsho iNkosi.

13Ngoba abantu bami benzile izinto ezimbi ezimbili;

bangihlamukele, mina mthombo wamanzi okuphila,

bazigebhela imithombo etshayo, engabambi manzi.

14UIsrayeli uyisigqili yini,

wazalwa eyisigqili na?

Pho, waba yimpango kanjani na?

15Izilwane sezimbhongele, zakhonya kakhulu.

Zenza ilizwe lakhe laba yinkangala,

lemizi yakhe ingamanxiwa, kayiselamuntu.

16Futhi labantu baseMemfisi leTahafanesi baphucile ikhanda lakho.

17Wena Israyeli, kawuzehliseli lokhu ngokuhlamuka iNkosi uNkulunkulu wakho

lapho ikukhokhela endleleni na?

18Ngakho uzuzani ngokuya eGibithe,

ukuba unathe amanzi eNile na?

Futhi uzuzani ngokuya eAsiriya, ukuba unathe amanzi eYufrathi na?

19Ububi bakho buzakukutshaya,

lokuhlehlela kwakho emuva kuzakukukhuza.

Yazi, ubone ukuthi kuyinto embi ukuyihlamukela iNkosi uNkulunkulu wakho,

lokuthi ukungesaba kakukho kuwe,

kutsho iNkosi uNkulunkulu wamabandla.

20Wephula ijogwe lakho endulo,

waziqamula izibopho zakho,

wathi wena: Kangizukukukhonza.

Kodwa phezu kwazo zonke intaba,

langaphansi kwezihlahla zonke eziluhlaza,

walala njengesifebe.

21Kukanti mina ngakuhlanyela ulivini elihle,

uyinhlanyelo elungileyo kuphela.

Phoke, usuphenduke kanjani waba mubi,

waba livini elibi na?

22Lanxa ugeza ngesoda, usebenzise isepha enengi,

ububi bakho busekhona phambi kwami,

kutsho iNkosi uNkulunkulu.

23Ungatsho kanjani ukuthi: Kangingcolanga,

kangilandelanga oBali na?

Khangela ukuziphatha kwakho esigodini,

wazi ukuba wenzeni.

Unjengekamela elisikazi elizulazulayo emizileni yalo,

24lanjengobabhemi weganga owejwayele inkangala,

ophembela umoya ekukhanukeni kwakhe.

Ngubani ongavimbela inkanuko yakhe na?

Bonke abamdingayo kabangazikhathazi,

bazamfumana ngesikhathi sokukhwelwa.

25Ungazidinisi ngokuhambahamba ulandela abanye onkulunkulu,

loba uzibulale ngomhawu.

Kodwa wena wathi: Atshi, kangiyekeli,

ngoba ngithandile abezizweni, ngizakubalandela.

26Njengoba isela lilenhloni lapho selibanjiwe,

kunjalo abakoIsrayeli bazakuba lenhloni,

bona kanye lamakhosi abo, lezikhulu zabo,

labapristi babo, labaprofethi babo,

27abathi esihlahleni: Wena ungubaba;

abathi lelitsheni: Wena wasizala.

Ngoba bangifulathela, kabangikhangelanga.

Kodwa ngesikhathi sokuhlupheka kwabo bathi: Vuka, usikhulule!

28Kanti bangaphi onkulunkulu bakho ozenzele bona na?

Kabavuke bona uba bengakukhulula ngesikhathi sokuhlupheka kwakho;

ngoba onkulunkulu bakho banengi njengemizi yakho, wena Juda.

29Lingisolelani na?

Lingihlamukele lonke, kutsho iNkosi.

30Kwaba yize ukubatshaya kwami abantwana benu,

kabakwamukelanga ukulaywa.

Umkhonto wenu ubadlile abaprofethi bakho njengesilwane esichithayo.

31Wena sizukulwana, lalela ilizwi leNkosi.

Benginjengenkangala kuIsrayeli, lelizwe elilomnyama omkhulu na?

Phoke, batsholoni abantu bami ukuthi: Sesikhululekile,

kasisayikuza kuwe futhi?

32Intombi ingazikhohlwa yini iziceco zayo

lomlobokazi izambatho zakhe na?

Kanti abantu bami bangikhohliwe insuku ezingelakubalwa.

33Uyazi kuhle indlela yokudinga amakhwa,

uze wafundisa abesifazana ababi indlela zakho.

34Lasezigqokweni zakho kufunyanwa igazi labayanga abangelacala;

kawubafumananga befohlela.

Kanti kukho konke lokho uthi:

35Kangilacala; ngakho intukuthelo yakhe isukile kimi.

Kodwake ngizakukugweba ngoba uthi: Kangonanga.

36Kulula kuwe kangaka ukuntshintsha indlela yakho.

Uzakuyangiswa yiGibithe, njengoba wayangiswa yiAsiriya.

37Uzaphuma lalapho uthwele imikhono yakho ekhanda,

ngoba iNkosi ibalahlile labo obathembayo,

kawuyikuphumelela ngabo.