Nani 14 - Ndebele Bible (iBhayibhili Elingcwele) 1978

Abantu bayivukela iNkosi

1Lonke ibandla laseliphakamisa ilizwi lalo, lakhala kakhulu; abantu bakhala inyembezi ngalobobusuku.

2Bonke abakoIsrayeli babasola oMose loAroni; lonke ibandla lathi kubo: Kungathi ngabe safela elizweni laseGibithe, ingabe enkangala!

3INkosi isilethelani kulelilizwe ukuze sibulawe ngomkhonto na? Omkethu labantwana bethu bazakuba yimpango; bekungebe ngcono ukuba sibuyele eGibithe na?

4Bakhulumisana besithi: Asikhethe omunye abe yinduna, sibuyele eGibithe.

5UMose loAroni bathi mbo ngobuso phansi phambi kwalo lonke ibandla labakoIsrayeli.

6UJoshuwa indodana kaNuni loKalebi indodana kaJefune ababephakathi kwalabo abahlola ilizwe, badabula ingubo zabo,

7bathi kulo lonke ibandla labakoIsrayeli: Ilizwe esadabula kulo ukuba silihlole yilizwe elihle kakhulu.

8Uba iNkosi isithanda, izakusingenisa elizweni lelo eligcwele uchago lenyosi, isinike lona.

9Kodwa lingayivukeli iNkosi; futhi lingesabi abantu balelolizwe, ngoba sizabadla sibaqede. Kabaselaso isivikelo; iNkosi ilathi; ngakho lingabesabi.Heb 3:16

10Kodwa lonke ibandla lathi kabakhandwe ngamatshe. Inkazimulo yeNkosi yahle yabonakala ethenteni lokuhlangana kubo bonke abakoIsrayeli.

11INkosi yathi kuMose: Koze kube nini lababantu bengidelela na? Koze kube nini bengangithembi, lanxa ngenze izibonakaliso ezinengi phakathi kwabo na?

12Ngizakubehlisela umkhuhlane, ngibafulathele, ngikwenze wena ube yisizwe esikhulu lesilamandla kulabo.

13UMose wathi eNkosini: Kodwa amaGibithe azakuzwa lokhu; nguwe owakhupha lababantu phakathi kwawo ngamandla akho.Eks 32:11–14

14Azakutshela abantu balelilizwe. Bezwile labo ukuthi wena Nkosi uphakathi kwalababantu, lokuthi babonana lawe, lokuthi iyezi lakho liphezu kwabo, uhamba phambi kwabo usensikeni yeyezi emini lasensikeni yeyezi ebusuku.

15Uba ubulala lababantu ubaqede, izizwe ezizwe ngodumo lwakho zizakuthi:

16INkosi yahluleka ukungenisa lababantu elizweni eyafunga ukubanika lona, ngakho ibabulele enkangala.

17Ngakhoke, Nkosi, kakubonakaliswe ubukhulu bamandla akho njengokutsho kwakho, ngoba wena wathi:

18INkosi iyaphuza ukuthukuthela, igcwele uthando olungapheliyo, ithethelela ububi leziphambeko, kodwa kayiyikubayekela abalecala, kodwa yehlisela ububi baboyise phezu kwabantwana besizukulwana sesithathu lesesine.Eks 20:5–6; 34:6–7; Dute 5:9–10; 7:9–10

19Ake ubathethelele labobantu ububi babo njengobukhulu bothando lwakho olungapheliyo, lanjengalokho ubathethelele lababantu kusukela eGibithe kuze kube khathesi.

UNkulunkulu uthi uzakutshaya abakoIsrayeli

20INkosi yasisithi: Yebo, sengibathethelele njengelizwi lakho;

21kodwa impela, njengalokhu ngiphila, lanjengalokhu wonke umhlaba uzakugcwala inkazimulo yeNkosi,Heb 3:18

22bonke abantu ababone inkazimulo yami lezibonakaliso zami engazenza eGibithe lasenkangala, abangilingileyo izikhathi ezilitshumi bengezwanga ilizwi lami,

23kabayikubona ilizwe engafunga ukulinika oyise; futhi labo abangidelelayo kabayikulibona.

24Kodwa inceku yami uKalebi ulomoya owahlukileyo, wangilandela ngokupheleleyo; ngakho ngizamngenisa elizweni aya kilo; lizakuba ngelenzalo yakhe.Josh 14:9–12

25AmaAmaleki lamaKanani ahlala esigodini. Kusasa phendukani, liye enkangala ngendlela eya oLwandle oluBomvu.

26INkosi yathi kuMose loAroni:

27Koze kube nini lelibandla elibi lingisola na? Ngizwile ukusola kwabantu bakoIsrayeli abakwenza ngami.

28Tshono kibo uthi: Ngiyazifunga, kutsho iNkosi, ukuthi lokho elikukhulume ngisizwa ngizakukwenza kini.

29Izidumbu zenu zizagcwala inkangala le, lina lonke elabalwayo elileminyaka engamatshumi amabili lengaphezulu, elangisolayo.Heb 3:17

30Kakuyikungena loyedwa nje elizweni engafunga ukulihlalisa kulo, ngaphandle kukaKalebi indodana kaJefune loJoshuwa indodana kaNuni.

31Kodwa abantwana benu elatsho ngabo ukuthi bazakuba yimpango, ngizakubangenisa kulo, bazithokozise ngalo.

32Linake, izidumbu zenu zizagcwala kulinkangala.

33Abantwana benu bazakuba zinzulane enkangala iminyaka engamatshumi amane, bahlawule ukungathembeki kwenu, kuze kufe lowokucina wenu.Seb 7:36

34Lahlola ilizwe insuku ezingamatshumi amane; usuku luzalingana lomnyaka, ngakho lizathwala ububi benu iminyaka engamatshumi amane, lize lazi ukuthi kunjani nxa lingidelela.

35Mina Nkosi ngikhulumile. Impela ngizakwenza lokhu kulo lonke lelibandla elibi elimelene lami; kulinkangala bazakufa, baphele nya.

Ukubulawa kwabahloli ababi abalitshumi

36Lawomadoda athunywa nguMose ukuhlola ilizwe, kwathi ekubuyeni kwawo avusa lonke ibandla ukumsola ngokubika umbiko omubi mayelana lelizwe,

37abulawa ngumkhuhlane phambi kweNkosi.

38Kodwa uJoshuwa indodana kaNuni loKalebi indodana kaJefune, ababehamba lalawomadoda ukuyahlola ilizwe, basala.

AbakoIsrayeli banqotshwa eHorma

39UMose wababikela lamazwi bonke abakoIsrayeli; abantu balila kakhulu.

40Bavuka ekuseni kakhulu, bakhwela engqongeni zezintaba, bathi: Khangelani, sesizakuya endaweni iNkosi eyithembisileyo; sivumile ukuthi sonile.

41Kodwa uMose wathi: Lephulelani umlayo weNkosi? Kaliyikuphumelela.

42Lingayi phambili, funa lichithwe yizitha zenu, ngoba iNkosi kayiphakathi kwenu.

43Ngoba kukhona lapho amaAmaleki lamaKanani ngaphambi kwenu; lizakubulawa empini ngoba liyitshiyile iNkosi; kayiyikuba lani.

44Kodwa bakhwela engqongeni zezintaba ngokuziqhenya, lanxa umtshokotsho wesivumelwano seNkosi loMose engaphumanga ezihonqweni.

45AmaAmaleki lamaKanani ayehlala kulezozintaba ehla, abanqoba, axotshana labo kwaze kwaba seHorma.