2 Kho 11 - Ndebele Bible (iBhayibhili Elingcwele) 1978

UAthaliya uzibeka abe ngumbusi

1Kwathi uAthaliya unina kaAhaziya esebonile ukuthi indodana yakhe ifile, wabulala bonke abantwana benkosi.2 Lan 22:10—23:21

2Kodwa uJehosheba indodakazi kaJoramu, udadewabo kaAhaziya, wathatha uJowashi indodana kaAhaziya, wamkhupha emadodaneni enkosi ayebulawa, wamfihla kanye lomlizane wakhe endlini yokulala. Wamfihla ngokunjaloke uAthaliya ukuba angabulawa;

3wahlala laye iminyaka eyisithupha ecatshile ethempelini, uAthaliya esabusa elizweni.

4Ngomnyaka wesikhombisa uJehoyada wabiza izinduna zamakhulu, ezamaKariti kanye lezabalindi, zeza kuye ethempelini. Wenza isivumelwano lazo khona, wazifungisa, wazitshengisa indodana yenkosi,

5wazilaya wathi: Nanku elizakukwenza; abesithathu benu abalinda ngeSabatha bazalinda isigodlo, abaseleyo benu bazalinda ethempelini,

6abesithathu esangweni laseSuri labanye abesithathu esangweni ngemva kwabalindi.

7Amaxuku enu amabili angalindiyo ngeSabatha azalinda ithempeli,

8azingelezele inkosi bonke behlomile; losondelayo emzileni abulawe. Libe lenkosi kuzo zonke indawo.

9Induna zamakhulu zenza konke ezakulaywa nguJehoyada umpristi, yileyo laleyo yeza labantu bayo abangayikulinda ngeSabatha kanye lalabo ababezalinda ngeSabatha, zafika kuJehoyada umpristi.

10Umpristi wazinika imikhonto lezihlangu ezazingezenkosi uDavida zisethempelini.

11Abalindi bema bonke behlomile kusukela ngaseningizimu kwendlu kusiya enyakatho, bezingelezele ialtare lethempeli, inkosi iphakathi kwabo.

12UJehoyada waseyikhupha indodana yenkosi, wayithwalisa umqhele, wayinika icence; bayibeka yaba yinkosi, bayigcoba, baqakeza izandla zabo besithi: Bayethe, nkosi!

13Kwathi uAthaliya esizwa umsindo wabalindi lowabantu waya ethempelini ebantwini;

14wabona inkosi imi ngasensikeni njengomkhuba, lezinduna labakhalisi bezimpondo beseceleni kwayo, labo bonke abantu belizwe bethokoza bekhalisa impondo. UAthaliya wadabula izigqoko zakhe, wamemeza wathi: Umvukela! Umvukela!

15UJehoyada umpristi waselaya izinduna zamakhulu wathi: Mkhupheleni ngaphandle, limbulale omlandelayo. Ngoba umpristi wathi: Lingambulaleli ethempelini.

16Basebembamba, bamkhupha, bamusa esigodlweni ngendlela yeSango leBhiza, bambulalela khona.

17UJehoyada wenza isivumelwano phakathi kweNkosi uNkulunkulu lenkosi labantu ukuba babe ngabantu beNkosi uNkulunkulu; wenza isivumelwano laphakathi kwenkosi labantu bayo.

18Bonke abantu baya endlini kaBali, bayidilizela phansi, badiliza lama‐altare akhe lezithombe zakhe, babulala uMathani umpristi kaBali phambi kwama‐altare. UJehoyada wabeka abalindi ethempelini.

19Wathatha izinduna zamakhulu lamaKariti labalindi labo bonke abantu belizwe, bayikhupha inkosi ethempelini bangena esigodlweni ngesango labalindi. Yahlala esihlalweni samakhosi.

20Bonke abantu belizwe bathokoza. Umuzi waba lokuthula ngemva kokubulawa kukaAthaliya esigodlweni.

Ukubusa kukaJowashi koJuda

21UJowashi wayeleminyaka eyisikhombisa lapho eqalisa ukubusa.