Hubo 51 - Ndebele Bible (iBhayibhili Elingcwele) 1978

Umkhuleko wokucela ukuhlanjululwa esonweni

1Ngihawukela, Nkulunkulu, ngothando lwakho olungapheliyo,

yesula iziphambeko zami ngobubele bakho obukhulu.

2Ungigezise ebubini bami,

ungihlambulule esonweni sami.

3Ngoba ngiyazazi iziphambeko zami,

lezono zami zihlala ziphambi kwami.

4Ngonile kuwe, wena wedwa,

ngenza okubi emehlweni akho,

ukuze kuthiwe ulungile ekukhulumeni kwakho,

kawulacala ngokwahlulela kwakho.

5Khangela, ngazalelwa ebubini,

lomama wangomulela esonweni.

6Khangela, uyathanda inhliziyo eleqiniso;

ngakhoke gcwalisa inhliziyo yami ngokuhlakanipha.

7Ngigezisa ngehisope, ngizakuhlambuluka;

ngigezisa ngibe mhlophe kulongqoqwane.

8Ngigcwalisa ngentokozo lokujabula,

ukuze athabe amathambo owaphulileyo.

9Fihla ubuso bakho ezonweni zami,

wesule zonke izenzo zami ezimbi.

10Nkulunkulu, dala kimi inhliziyo ehlambulukileyo,

ufake kimi umoya omutsha loqotho.

11Ungangiduduli ebusweni bakho,

ungangamuki umoya wakho ongcwele.

12Buyisela kimi intokozo yokusiza kwakho,

ungisekele ngomoya ovumayo.

13Ng’khona ngizakufundisa abaphambukayo indlela zakho,

lezoni zizakuphendukela kuwe.

14Ngikhulula ecaleni legazi, Nkulunkulu wokusizwa kwami,

lolimi lwami luzakuhlabelela ngokulunga kwakho.

15Nkulunkulu, vula indebe zami

ukuze umlomo wami ukudumise.

16Ngoba kawuthandi umhlatshelo;

loba bengizakunika umnikelo wokutshiswa,

ubungayikuthokoza ngawo.

17Umnikelo owamukelekayo kuNkulunkulu ungumoya odabukileyo;

inhliziyo edabukileyo lezisolayo, Nkulunkulu, kawuyideleli.

18Yenzele iZiyone okuhle ngokuthanda kwakho;

uyakhe imiduli yaseJerusalema.

19Ng’khona uzakujabulela iminikelo efaneleyo,

leminikelo yokutshiswa;

njalo kuzakunikelwa ngezinkunzi phezu kwealtare lakho.