Hubo 105 - Ndebele Bible (iBhayibhili Elingcwele) 1978

Izi mangaliso zeNkosi eyazenzela abakoIsrayeli

1Bongani iNkosi, litshumayele ibizo layo,

lizazise phakathi kwabantu izenzo zayo.

2Hlabelani kuyo, liyihubele amahubo,

likhulume ngezenzo zayo zonke ezimangalisayo.

3Jabulani ebizweni layo elingcwele;

kazithokoze inhliziyo zabo abafuna iNkosi.

4Funani iNkosi, amandla ayo,

liyidinge yona njalonjalo.

5Khumbulani izenzo zayo ezimangalisayo eyazenzayo,

izimangaliso zayo lezahlulelo zomlomo wayo,

6lina nzalo kaAbrahama inceku yayo,

lina bantwana bakaJakobe abakhethiweyo bayo.

7Yona iyiNkosi uNkulunkulu wethu;

iyawahlulela wonke umhlaba.

8Iyakhumbula isivumelwano sayo kuze kube nininini,

ikhumbula ilizwi eyalitsho yaliqinisa kuzo izizukulwana eziyinkulungwane,

9isivumelwano eyasenza loAbrahama,

isithembiso eyasenza kuIsaka;

10yasiqinisa kuJakobe saba yisimiso,

lakuIsrayeli saba yisivumelwano esingapheliyo,

11yathi: Ngizakukunika ilizwe laseKanani

libe yisabelo sakho.

12Obaba babeyingcosana,

yebo, babebalutshwana, beyizihambi kulo;

13bazula kuzizwe ngezizwe,

besuka komunye umbuso besiya kwabanye abantu;

14kodwa iNkosi kayivumelanga muntu ukubahlupha;

yakhuza amakhosi ngenxa yabo,

15isithi: Lingathinti abagcotshiweyo bami,

lingoni abaprofethi bami.

16Yathuma indlala elizweni,

yaqeda ukudla konke.

17Yathuma indoda phambi kwabo,

uJosefa owathengiswa waba yisigqili.

18Inyawo zakhe zalinyazwa yizibopho,

wafakwa isongo entanyeni,

19kwaze kwagcwaliseka ilizwi lakhe.

Ilizwi leNkosi lamlinga.

20Inkosi yaseGibithe yathuma yamthukulula,

umbusi wabantu wamkhulula;

21yamenza waba ngumpathi wendlu yayo

lenduna yemfuyo yayo yonke,

22ukuba alaye izikhulu zayo njengokuthanda kwakhe,

afundise abadala bomphakathi ukuhlakanipha.

23UIsrayeli wasefika eGibithe;

uJakobe wahlala elizweni lakoHamu.

24INkosi yandisa kakhulu abantu bayo,

yabenza baba lamandla kulezitha zabo.

25Yaphendula inhliziyo zezitha ukuba zizonde abantu bayo,

ziphathe inceku zayo ngobuqili.

26Yasithuma uMose inceku yayo,

loAroni ebimkhethile.

27Bazenza izibonakaliso zayo phakathi kwamaGibithe,

lezimangaliso elizweni lakoHamu.

28Yathuma umnyama, ilizwe laba mnyama;

kodwa amaGibithe kawalalelanga amazwi ayo.

29Yaphendula amanzi awo aba ligazi,

yabhubhisa inhlanzi zawo.

30Ilizwe lawo lagcwala amaxoxo

lasezindlini zamakhosi awo.

31Yakhuluma, kwavela izibawu

lobudununu phakathi kwelizwe lawo.

32Yabanika imvimbi yesiqhotho,

lombane wabaneka elizweni lawo.

33Yatshaya amavini lemikhiwa yawo,

yaphula izihlahla zelizwe lawo.

34Yakhuluma, kwavela isikhongwane

lezintethe ezingelakubalwa,

35ezadla yonke imibhida elizweni lawo,

zaqeda izithelo zomhlabathi wawo.

36Yabulala amazibulo elizweni lawo,

ingqabutho yamandla awo.

37Yasibakhupha abakoIsrayeli bephethe isiliva legolide,

kwakungekho lamunye owakhubekayo phakathi kwezizwe zabo.

38IGibithe lathokoza ekuphumeni kwabo,

ngoba latshaywa luvalo ngabo.

39Yandlala iyezi lokubasibekela,

lomlilo wokukhanyisa ebusuku.

40Bacela, yabanika izagwaca,

yabasuthisa ngesinkwa sasezulwini.

41Yaqhekeza idwala, kwampompoza amanzi,

ageleza enkangala njengomfula.

42Ngoba yakhumbula isithembiso sayo esingwele loAbrahama inceku yayo.

43Yaphumisa abantu bayo ngokuthokoza,

labakhethiweyo bayo behlabela.

44Yabanika amazwe abezizwe;

badla izithelo zomsebenzi wabantu,

45ukuba bagcine izimiso zayo,

bahambe ngemilayo yayo.

Dumisani iNkosi!