2 Kho 4 - Ndebele Bible (iBhayibhili Elingcwele) 1978

Amafutha omfelwakazi

1Kwakhala kuElisha umfazi womunye umprofethi wathi: Inceku yakho umkami sewafa; uyazi ukuba inceku yakho yayiyesaba iNkosi, sekufikile umuntu esilesikwilidi sakhe ukuba athathe abantwana bami ababili, babe yizigqili zakhe.

2UElisha wathi kuye: Ngingakwenzelani na? Ulani endlini na? Yena wathi: Incekukazi yakho kayilalutho, kuphela igabha lamafutha.

3Wasesithi: Hamba uyekweboleka izimbiza komakhelwana bakho bonke, zibe zinengi zingelalutho.

4Nxa usubuyile uzivalele endlini labantwana bakho, uchathekele amafutha asegabheni kuzo zonke imbiza ezigcweleyo, uzibeke eceleni.

5Owesifazana wasesukake wazivalela endlini labantwana bakhe; bamqhubela izimbiza, wathela amafutha.

6Sezigcwele wathi komunye umntanakhe: Letha enye imbiza. Yena wathi: Kayisekho enye. Amafutha kazabe esaphuma.

7Wasebuyela kumuntu kaNkulunkulu wayamazisa, yena wathi: Hambake uyethengisa lawomafutha, uhlawule izikwilidi zakho; aseleyo uzondle ngawo wena labantwana bakho.

UElisha lowesifazana waseShunema

8Kwathi ngolunye usuku uElisha wadlula eShunemi lapho kwakuhlala khona owesifazana onothileyo owamncenga ukuba ake adle ukudla. Kwakuye kuthi lapho esedlula, aphambukele khona adle ukudla.

9Owesifazana wasesithi kumkakhe: Ngiyabona ukuthi lumuntu ohlala esedlula lapha ungumuntu ongcwele kaNkulunkulu.

10Asimakhele indlwana phezu kophahla, simfakele umbheda letafula lesihlalo lesibane, kuthi lapho efikile kithi ahlale khona.

11Ngolunye usuku uElisha wafika khona, wangena endlwaneni waphumula.

12Wasesithi kuGehazi inceku yakhe: Ngibizela lowowesifazana womShunami. Kwathi esembizile, weza phambi kwakhe.

13UElisha wasesithi kuye: Tshono kuye uthi: Khangela, usenzele konke lokhu, thina singakwenzelani na? Uthanda ukuba sikukhulumele enkosini kumbe enduneni yempi na? Waphendula wathi: Atshi, ngihlala phakathi kwabantu bakithi.

14UElisha wasesithi: Pho, singamenzelani na? UGehazi waphendula wathi: Khangela, kalamntwana, lomkakhe useluphele.

15Wasesithi: Mbize. Esembizile, weza wema emnyango.

16UElisha wathi kuye: Ngalesisikhathi ngomnyaka ozayo uzagona umntwana. Kodwa yena wathi: Atshi, nkosi yami, wena muntu kaNkulunkulu, ungayikhohlisi incekukazi yakho.

17Kodwa owesifazana wakhulelwa, wabeletha umntwana ngalesosikhathi ngomnyaka olandelayo, njengokutsho kukaElisha kuye.

18Kwathi umntwana esekhulile, waya kuyise ngolunye usuku kwabavunayo.

19Wasememeza kuyise esithi: Ngafa likhanda! ngafa likhanda! Uyise wathi encekwini yakhe: Mthwale umuse kunina.

20Isimthwele yamusa kunina, umntwana wahlala emathangazini kanina kwaze kwaba semini, wasesifa.

21Unina wasekhwela esiya phezulu, wamlalisa embhedeni womuntu kaNkulunkulu, waphuma wamvalela khona.

22Wasememeza umkakhe esithi: Ake ungithumele enye inceku lomunye ubabhemi, ukuba ngihambe masinyane ngiye emuntwini kaNkulunkulu, ngibuye futhi.

23Wathi. Ulandani kuye lamhla na? Kakusilo usuku lokuthwasa kwenyanga loba olweSabatha. Yena wathi: Kakusilutho lokho.

24Eselungisiwe ubabhemi, wathi encekwini yakhe: Mtshaye ahambe, ungamyekeli adonde uba ngingakutsheli.

25Wahambake, wayafika emuntwini kaNkulunkulu entabeni iKarmeli. Kwathi umuntu kaNkulunkulu embona esiza, wathi kuGehazi inceku yakhe: Khangela, nanguyana owesifazana womShunami;

26gijima masinyane umhlangabeze, uthi kuye: Kunjani? Lomkakho unjani? Umntwana uyaphila kuhle na? Owesifazana waphendula wathi: Konke kulungile.

27Kwathi esefikile entabeni kumuntu kaNkulunkulu wadumela inyawo zakhe. UGehazi wasondela ukumsusa. Kodwa umuntu kaNkulunkulu wathi: Myekele, ngoba ulosizi olukhulu, leNkosi ingifihlele lokhu, kayingitshelanga.

28Owesifazana wathi: Ngangicelile umntwana enkosini yami na? Kangitshongo yini ukuthi ungangikhohlisi na?

29UElisha wasesithi kuGehazi: Khwica izigqoko zakho, uthathe lodondolo lwami, uhambe. Uba uhlangana lomuntu ungambingeleli, uba umuntu ekubingelela ungamphenduli; ubeke loludondolo lwami ebusweni bomntwana.

30Unina womntwana wasesithi: Ngifunga iNkosi uNkulunkulu kanye lawe uqobo, kangiyikukutshiya. Wasesukuma emlandela.

31UGehazi wahamba ngaphambili, walubeka udondolo ebusweni bomntwana, kodwa kakubanga khona ilizwi loba ukudikiza. Wasebuyelake ukuhlangabeza uElisha, wathi kuye: Umntwana kavukanga.

32Kwathi uElisha esengenile endlini, wambona umntwana elele embhedeni efile.

33Wasengena ngaphakathi, wazivalela khona, wakhuleka eNkosini.

34Wasekhwela embhedeni elala phezu komntwana, ebeka umlomo wakhe kowomntwana lamehlo akhe kwawakhe lezandla zakhe kwezakhe; kwathi esacambalele phezu kwakhe, umzimba womntwana wakhudumala.

35Wasevukake, wahambahamba kanye endlini, wabuya wakhwela embhedeni, wacambalala phezu komntwana; umntwana wathimula kwaze kwaba kasikhombisa, wasevula amehlo akhe.

36UElisha wabiza uGehazi wathi kuye: Akumbize lowowesifazana womShunami. Wasembizake. Kwathi esefikile, uElisha wathi kuye: Thatha, nangu umntanakho.

37Weza wawela ngasezinyaweni zakhe, wakhothamela phansi, wasethatha umntanakhe ephuma.

Izimangaliso zikaElisha

38UElisha wasefika futhi eGiligali lapho kwakukhona indlala khona. Kwathi ixuku labaprofethi lihlezi phambi kwakhe, wathi encekwini yakhe: Beka imbiza enkulu eziko, uphekele abaprofethi ukudla.

39Omunye wabo wasesiya ukukha imibhida egangeni, wabona intandela yeganga, wakha izithelo zayo, wagcwalisa uphiko lwengubo yakhe, waziqobela embizeni yokudla engazi ukuthi ziyini.

40Kwaphakululwa ukuba badle; kodwa besadla ukudla bamemeza bathi: Wena muntu kaNkulunkulu, kulokufa embizeni. Kabazabe besakudla.

41Wasesithi: Lethani impuphu. Waseyithela embizeni wathi: Baphakululeleni abantu, badle. Kwakungaselangozi embizeni.

42Kwafika umuntu othile evela eBali‐Shalisha elethela umuntu kaNkulunkulu ukudla kwezithelo zokuqala, izinkwa zebhali ezingamatshumi amabili, lezikhwebu zamabele amatsha emgodleni wakhe. UElisha wathi: Banike abantu ukuba badle.

43Kodwa inceku yakhe yathi: Ngizakubanika njani lokhu abantu abalikhulu na? Wasephinda esithi: Banike abantu ukuba badle, ngoba iNkosi ithi: Bazakudla, kuze kusale.

44Yasibanika inceku, badla kwaze kwasala, njengelizwi leNkosi.