Jer 17 - Ndebele Bible (iBhayibhili Elingcwele) 1978

Isono sakoJuda

1Isono sakoJuda silotshiwe ngepheni yensimbi; ngomcijo wendayimana sibhaliwe enhliziyweni yabo lasezimpondweni zama‐altare abo,

2abantwana babo besakhumbula ama‐altare abo, lensika zabo ezimiselwe unkulunkulukazi uAshera eziphansi kwazo zonke izihlahla eziluhlaza, lasemaqaqeni aphakemeyo,

3laphezu kwezintaba eziselizweni. Imfuyo yenu layo yonke inotho yenu ngizayinikela ibe yimpango yokuhlawulela izono zenu kulo lonke ilizwe lakini.

4Uzaliyekela ngokwakho ilizwe lakho engakunika lona, ngikwenze ukuba usebenzele izitha zakho elizweni ongalaziyo, ngoba ekuthukutheleni kwami kuphembeke umlilo ozavutha kuze kube nininini.

5INkosi ithi: Uqalekisiwe umuntu othemba abantu,

othemba emandleni abantu, olenhliziyo edela iNkosi.

6Unjengesihlahlana enkangala,

kayikubona okuhle lokukodwa.

Uzahlala endaweni ezomileyo enkangala,

elizweni eligcwele itshwayi, elingahlalwa muntu.

7Ubusisiwe umuntu othemba iNkosi,

othemba lakhe liseNkosini.

8Unjengesihlahla esihlanyelwe ngasemanzini,

esinabisela impande zaso ngasemfuleni,

esingesabi lapho kufika ukutshisa,

lemahlamvu aso ahlala eluhlaza;

kasethuki lasemnyakeni wokubalela kwelanga,

ngoba kasiyekeli ukuthela izithelo.

9Inhliziyo iyakhohlisa ukwedlula izinto zonke,

futhi imbi kakhulu.

Ngubani ongayazi na?

10Mina Nkosi ngiyahlola ingqondo, ngiyilinge inhliziyo,

ukuba nginike wonke umuntu okufanele indlela zakhe,

lokufanele izenzo zakhe.

11Njengenkwali efukamela amatsiyane engawazalanga,

kunjaloke lowomuntu ozuze inotho ngokungalungi;

phakathi kwensuku zakhe izamtshiya,

abe yisithutha ekucineni.

12Indlu yethu engcwele injengesihlalo sobukhosi esilenkazimulo,

esabekwa phezulu kusukela ekuqaleni.

13Wena Nkosi, olithemba likaIsrayeli,

bonke abakudelayo bazakuyangeka,

labakutshiyayo bazaqedwa emhlabeni,

ngoba bayidelile iNkosi engumthombo wamanzi okuphila.

14Ngisilisa, wena Nkosi, ngisile;

ungikhulule ukuba ngikhululwe;

ngoba nguwe engikudumisayo.

15Khangela, bathi kimi: Lingaphi ilizwi leNkosi na?

Kalize phela!

16Kodwa mina kangikukhuthazanga ukuba wenze okubi,

futhi kangilufisanga usuku lokuhlupheka, lokhu uyakwazi;

okwaphuma emlonyeni wami kwakuphambi kwakho.

17Ungabi ngokwesabekayo kimi,

ngoba wena uyisiphephelo sami osukwini olubi.

18Kabayangeke labo abangizingelayo,

kodwa mina kangingayangeki,

kabadideke, kodwa mina kangingadideki;

behlisele usuku olubi, ubabhubhise ngokupheleleyo.

ISabatha limele ukugcinwa

19INkosi yathi kimi: Hamba uyekuma eSangweni lakoBenjamini, angena ngalo amakhosi akoJuda, aphuma ngalo futhi, lakuwo wonke amasango aseJerusalema,

20uthi: Zwanini ilizwi leNkosi, lina makhosi akoJuda, lani lonke bakoJuda, labo bonke abakhileyo eJerusalema abangena ngawo lamasango.

21INkosi ithi: Xwayani ngenxa yokusila kwenu: lingathwali umthwalo ngeSabatha, lingawungenisi ngamasango eJerusalema.Neh 13:15–22

22Futhi lingakhuphi umthwalo ezindlini zenu ngeSabatha, lingasebenzi lutho; kodwa lwenzeni usuku lweSabatha lube ngcwele, njengokubalaya kwami okhokho benu.Eks 20:8–10; Dute 5:12–14

23Kanti kabezwanga, kabalalelanga; baba lenkani kabaze bezwa, belaywa.

24Kodwa uba lina lingilalela, kutsho iNkosi, lingangenisi umthwalo ngamasango alumuzi ngosuku lweSabatha, kodwa lilenze iSabatha libe ngcwele, lingasebenzi ngalo,

25kuzangena ngamasango alumuzi amakhosi ahlala esihlalweni sobukhosi sikaDavida, ekhwele inqola zokulwa, egade amabhiza, wona lezikhulu zawo, labantu bakoJuda, labakhileyo eJerusalema; bahlale kulumuzi kuze kube nininini.

26Abantu bazavela emizini yakoJuda lakuzo zonke indawo ezizingelezele eJerusalema, bavele elizweni lakoBenjamini, laseShefela, laselizweni lamaqaqa, laseNegebi, beletha iminikelo yokutshiswa lemihlatshelo, leminikelo yempuphu lenhlaka, leminikelo yokubonga endlini yeNkosi.

27Kodwa uba lingangilaleli, lingenzi iSabatha libe ngcwele, lingena ngamasango eJerusalema ngosuku lweSabatha, lithwele imithwalo, ngizaphemba umlilo emasangweni alo, ozakutshisa uqothule izindlu zamakhosi zaseJerusalema, ungacimeki.