Hab 3 - Ndebele Bible (iBhayibhili Elingcwele) 1978

Umkhuleko kaHabakuki

1Nanku umkhuleko kaHabakuki umprofethi.

2Wathi:

Nkosi, ngizwile umbiko ngawe, ngiyesaba izenzo zakho.

Ziphinde futhi kuliminyaka, wenze ukuba zaziwe kuliminyaka;

ukhumbule umusa lanxa ulolaka.

3UNkulunkulu wavela eTemani,

oNgcwele wavela entabeni yaseParani.

Inkazimulo yakhe yasibekela amazulu,

umhlaba wagcwala indumiso yakhe.

4Ukucwazimula kwakhe kwakunjengokukhanya,

imisebe yavela esandleni sakhe,

efihla lapho amandla akhe.

5Isifo sahamba phambi kwakhe,

lomkhuhlane walandela eduze.

6Ekusukumeni kwakhe umhlaba wanyikinyeka,

ekukhangeleni kwakhe kwathuthumela izizwe;

intaba zasendulo zahlakazeka,

amaqaqa angelakuphela atshona.

Indlela zakhe zazinjengasendulo.

7Ngabona amathente akoKushani ephansi kosizi,

lamakhetheni elizwe laseMidiyani ethuthumela.

8Nkosi, ulaka lwakho lwaluvuthela imifula na?

Wawuthukuthelele imifula yini,

lentukuthelo yakho yayivuthela olwandle lapho ugade amabhiza akho,

ukhwele phezu kwenqola yakho yokunqoba na?

9Idandili lakho livele obala, lambuliwe,

ufakile imitshoko yakho entanjeni.

Waqhekeza umhlaba ngemifula.

10Intaba zakubona wena, zathuthumela,

lezikhukhula zamanzi zedlula;

amanzi amanengi akhupha ilizwi lawo,

aphakamisela izandla zawo phezulu.

11Ilanga lenyanga kwema endaweni yakho

ekukhanyeni kwemitshoko yakho egijimayo,

lasekuphazimeni komkhonto wakho ocwazimulayo.

12Wadabula umhlaba ngokuthukuthela,

wanyathela isizwe ngentukuthelo.

13Waphumela ukukhulula abantu bakho,

ukukhulula ogcotshiweyo wakho.

Ubhidlizele phansi indlu yomubi,

waquphula lezisekelo zayo.

14Ngemitshoko yakho ucibile umkhokheli wamabutho akhe,

afika njengesivunguzane ukusichitha,

ethokoza kungathi azakudla abahluphekayo ekusithekeni.

15Wanyathela ulwandle ngamabhiza akho,

kwavubana amanzi amanengi.

16Ngiyezwa, kuthuthumela umzimba wami,

indebe zami ziqhaqhazele ngenhlokomo;

ukubola kungena emathanjeni ami,

kutshayane amadolo ami.

Ngizakulindela ngokuthula ukuba usuku lokuhlupheka lufike phezu kwalabo abasihlaselayo.

17Loba umkhiwa ungavezi impoko,

loba kungekho izithelo evinini leoliva liphuthe ukuthela,

amasimu angavezi ukudla,

izimvu zichithwe esibayeni,

kungabi khona inkomo esibayeni,

18kanti mina ngizathokoza ngeNkosi,

ngijabule ngoNkulunkulu wokukhululwa kwami.

19UNkulunkulu, iNkosi, ungamandla ami.

wenza inyawo zami zibe njengezempala,

engenze ukuba ngihambe endaweni zami eziphakemeyo.