1 Kho 2 - Ndebele Bible (iBhayibhili Elingcwele) 1978

Ukulaywa kukaSolomoni nguDavida

1UDavida esezakufa walaya uSolomoni indodana yakhe wathi:

2Sengizalandela abaphansi. Ngalokhoke qina, ube yindoda,

3ugcine umlayo weNkosi uNkulunkulu wakho, uhambe ngezindlela zayo, ugcine izimiso zayo lemithetho yayo lezilayezelo zayo, lamazwi ayo, njengokulotshiweyo emlayweni kaMose, ukuba uphumelele kukho konke okwenzayo lalapho uya khona,

4ukuze iNkosi iqinise ilizwi layo eyalikhuluma mayelana lami isithi: Uba amadodana akho eqaphelisa indlela zawo, ehamba ngobuqotho phambi kwami ngenhliziyo yonke langomoya wonke, kawuyikuswela muntu wokubusa uIsrayeli.

5Futhi wena uyakwazi okwenziwa kimi nguJowabi indodana kaZeruya, lokuba waziphatha kanjani izinduna ezimbili zezimpi zakoIsrayeli, uAbineri indodana kaNeri loAmasa indodana kaJetheri; wababulala ngesikhathi sokuthula ephindisela igazi elachitheka empini, engcolisa ibhanti elisokhalweni lwami lamanyathelo asezinyaweni zami ngegazi elingelacala.USolomoni uqinisa umbuso wakhe

13UAdonija indodana kaHagithi weza kuBathisheba unina kaSolomoni; yena wathi: Uze ngokuhle na? Wathi: Yebo, ngokuhle.

14UAdonija wasesithi: Kukhona engithanda ukukutsho kuwe. UBathisheba wathi: Khuluma.

15Wasesithi: Uyazi ukuba umbuso wawungowami, lokuba abakoIsrayeli bonke babethembe ukuba ngizabusa; kodwa umbuso wangiphunyuka, waba ngowomfowethu, ngoba wawunikwa yiNkosi uNkulunkulu.

16Ngilolutho olulodwa engilucela kuwe, ungali. UBathisheba wathi kuye: Ufunani?

17Yena wathi: Ngincengela inkosi uSolomoni, kayizukwala kuwe, ukuthi inginike uAbishagi waseShunami abe ngumkami.

18UBathisheba wathi: Kulungile; ngizakukukhulumela enkosini.

19Ngakho uBathisheba wasesiya enkosini uSolomoni ukukhulumela uAdonija. Inkosi yasukuma yamhlangabeza, yakhothama kuye. Yasihlala esihlalweni sayo sobukhosi, yathi kakulethelwe unina wenkosi isihlalo, yena wahlala ngakwesokunene kwayo.

20Wasesithi: Ngilolutho oluncinyane engilucela kuwe, ungali. Inkosi yathi kuye: Cela, mama, ngoba kangiyikwala.

21Wasesithi: Ake unike uAdonija umfowenu uAbishagi waseShunami abe ngumkakhe.

22Inkosi uSolomoni yamphendula unina yathi: Ucelelani uAbishagi waseShunami ukuba anikwe uAdonija na? Umcelele lombuso, ngoba ungumnewethu, loAbiyatha umpristi loJowabi indodana kaZeruya bangakuye.

23Inkosi uSolomoni yasifunga ngeNkosi isithi: UNkulunkulu angihlanekele ngokwengezelelweyo uba lesisicelo singambulalisi uAdonija.

24Ngakhoke ngifunga iNkosi engimisileyo yangibeka esihlalweni sobukhosi sikaDavida ubaba, yangenzela indlu yobukhosi njengokuthembisa kwayo, uAdonija uzabulawa lamhla.

25Inkosi uSolomoni yasithuma uBenaya indodana kaJehoyada owamtshaya wambulala uAdonija.

26Inkosi uSolomoni yasisithi kuAbiyatha umpristi: Hamba uye eAnathothi endaweni yakho, ngoba wena ufanele ukufa; kodwa kangiyikukubulala ngoba wawuthwala umtshokotsho weNkosi uNkulunkulu phambi kukababa uDavida, wahlupheka kanye lobaba kuzo zonke inhlupheko zakhe.

28Kwathi lapho kufika umbiko kuJowabi — ngoba uJowabi wayesekele uAdonija lanxa wayengamsekelanga uAbisalomu — wabalekela ethenteni leNkosi uNkulunkulu, wabamba impondo zealtare.

29Nxa kubikelwa inkosi uSolomoni ukuthi uJowabi usebalekele ethenteni lokuhlangana, useceleni kwealtare, uSolomoni wathuma uBenaya indodana kaJehoyada esithi: Hamba uyemtshaya umbulale.

30Ngakho uBenaya wasesiya ethenteni, wathi kuye: Inkosi uSolomoni ithi: Phuma! Kodwa yena wathi: Atshi, ngizafela khonapha. UBenaya waseyibikela inkosi amazwi kaJowabi.

31Inkosi yamphendula yathi: Yenza njengokutsho kwakhe, umtshaye umbulale, umngcwabe; ngalokho ususe kimi lendlini kababa icala legazi uJowabi alichitha ngaphandle kwecala.

32INkosi uNkulunkulu izakwehlisela ekhanda lakhe izenzo zakhe zokuchitha igazi, ngoba kwathi ubaba uDavida engazi, wahlasela wabulala amadoda amabili ayelungile engcono kulaye, ngitsho uAbineri indodana kaNeri induna yempi yakoIsrayeli, loAmasa indodana kaJetheri induna yempi yakoJuda.

33Ngakho igazi labo lizaphindiselwa kuJowabi lasenzalweni yakhe kuze kube nininini; kodwa kuDavida lasenzalweni yakhe, lasendlini yakhe, lasembusweni wakhe, kuzakuba lokuthula okuvela eNkosini uNkulunkulu kuze kube nininini.

34Wasesuka uBenaya indodana kaJehoyada, wamtshaya wambulala uJowabi; wangcwatshelwa endlini yakhe enkangala.

35Inkosi yasibeka uBenaya indodana kaJehoyada ukuba yinduna yempi esikhundleni sikaJowabi, yabeka uZadoki umpristi esikhundleni sikaAbiyatha.

36Inkosi uSolomoni yasibiza uShimeyi, yathi kuye: Zakhele indlu eJerusalema, uhlale khona, ungaphumi lapho uye kwenye indawo loba kunjani.

37Ngoba mhla uphumayo, ucaphe isifula iKidroni, wazi impela ukuthi uzakufa, legazi lakho lizakuba phezu kwakho.

38UShimeyi wasesithi enkosini: Lokho okutshoyo kulungile; inceku yakho izakwenza lokho okutshiwo yinkosi yami. UShimeyi wahlala eJerusalema insuku ezinengi.

39Kodwa kwathi ngemuva kweminyaka emithathu izigqili zakhe ezimbili zabalekela kuAkishi indodana kaMahaka inkosi yaseGathi. Kwathi lapho ebikelwa uShimeyi ukuthi izigqili zakhe ziseGathi,

40wasuka, wagada ubabhemi, waya eGathi kuAkishi ukudinga izigqili zakhe; wazifica eGathi, wabuya lazo.

41Lapho uSolomoni ebikelwa ukuthi uShimeyi ubephumile eJerusalema waya eGathi, wabuya,

42wambiza uShimeyi wathi kuye: Kanje kangikufungisanga ngeNkosi uNkulunkulu, ngakulayisisa ngathi: Yazi impela ukuthi mhla uphumayo ukuya lakuyiphi indawo uzakufa na? Wena wathi: Lokho okutshoyo kulungile, ngizakukulalela.

43Phoke, kungani ungasigcinanga isifungo sakho eNkosini lomthetho engakulaya wona na?

44Uyazi enhliziyweni yakho bonke ububi owabenza kubaba uDavida; ngakho iNkosi uNkulunkulu izaphindisela ububi bakho phezu kwakho.

45Kodwa mina nkosi uSolomoni ngizakubusiswa, lombuso kaDavida uzaqiniswa phambi kweNkosi kuze kube nininini.

46Inkosi yasilaya uBenaya indodana kaJehoyada ukuba ambulale, yena waphuma wamtshaya wambulala. Ngakho umbuso waqiniswa kuSolomoni.