2 Kho 7 - Ndebele Bible (iBhayibhili Elingcwele) 1978

1Kodwa uElisha wathi: Zwanini ilizwi leNkosi uNkulunkulu; ithi: Ngalesisikhathi kusasa ingxenye yegokoko lempuphu ecolekileyo izathengiswa ngeshekeli, legokoko elilodwa lamabele lithengiswe ngeshekeli esangweni laseSamariya.

2Induna inkosi eyayibambelele engalweni yayo yathi emuntwini kaNkulunkulu: Uba iNkosi uNkulunkulu uqobo ingavula amawindi phezulu, kungenzeka lokhu na? Kodwa yena wathi: Uzakukubona ngawakho amehlo, kodwa kawuyikudla lutho lwakho.

3Kwakukhona amadoda amane esangweni ayelobulephero, akhulumisana esithi: Sihlaleleni lapha size sife na?

4Uba singena phakathi komuzi, kulendlala khona, sizafela khona. Uba sihlala lapha, sizakufa futhi. Asihambeni siye ezihonqweni zamaSiriya; uba engasibulali, sizaphila; uba esibulala, sizabe sifile njalo.

5Asebesuka kusahwalala ukuba aye ezihonqweni zamaSiriya; nxa efika ekucineni kwezihonqo kawabonanga muntu khona.

6Ngoba iNkosi yenza impi yamaSiriya ukuba izwe umsindo ongathi wenqola zokulwa wamabhiza lempi enkulu; akhulumisana esithi: Inkosi yakoIsrayeli isisibizele amakhosi amaHethi lamakhosi aseGibithe ukusihlasela.

7Asesuka ebaleka kusahwalala, atshiya amathente awo lamabhiza awo labobabhemi bawo; atshiya izihonqo lokhu zinjalo abaleka ukuba aphephe.

8Nxa lababantu abalobulephero befika ekucineni kwezihonqo, bangena kwelinye ithente, badla banatha, bazithathela isiliva legolide lezigqoko, bayakufihla; babuya bangena kwelinye ithente, bazithathela izinto kilo, bayazifihla.

9Basebekhulumisana besithi: Esikwenzayo kakulunganga. Lolu lusuku lwezindaba ezinhle, kodwa siyazithulela nje. Uba sihlala kuze kuse, sizakuba lecala. Asihambeni khathesi siyebikela abendlu yenkosi lezizindaba.

10Basebesiza, bamemeza kubalindi bamasango omuzi besithi: Sifike ezihonqweni zamaSiriya, kasibonanga muntu khona, kasizwanga lutho, sibone amabhiza labobabhemi kuphela kukhulekiwe, lamathente etshiyiwe enjalo.

11Abalindi bamasango basebezimemezela izindaba, kwabikelwa abendlu yenkosi.

12Inkosi yavuka ebusuku, yathi encekwini zayo: Ngingalitshela ukuthi amaSiriya alungise ukwenzani kithi. Bayazi ukuba silambile, ngakho basukile ezihonqweni zabo ukuyacatsha egangeni besithi: Bazaphuma emzini, sibabambe bephila, besesingena phakathi.

13Enye yezinceku zayo yathi: Abanye abantu kabathathe amabhiza amahlanu aseleyo, ngoba lawo azakufa njengamanye; asibathume, sibone.

14Bathatha abantu ababili lezinqola, inkosi yabathuma ukulandela impi yamaSiriya yathi: Hambani, libone.

15Basebewalandela, baze bafika eJordani; bafica indlela yonke igcwele izingubo lezikhali ezazilahlwe ngamaSiriya ekubalekeni kwawo. Izithunywa zabuyela, zayibikela inkosi.

16Abantu basebephuma beziphanga izihonqo zamaSiriya. Ingxenye yegokoko lempuphu ecolekileyo laselithengiswa ngeshekeli, legokoko elilodwa lamabele lathengiswa ngeshekeli, njengokutsho kwelizwi leNkosi uNkulunkulu.

17Inkosi yayibeke induna eyayibambelele engalweni yayo ukuba ilondoloze isango. Abantu bayinyathela esangweni yaze yafa, njengokutsho komuntu kaNkulunkulu ekufikeni kwenkosi kuye.

18Ngoba kwathi umuntu kaNkulunkulu esithi enkosini: Igokoko elilodwa lamabele lizathengiswa ngeshekeli, lengxenye yegokoko lempuphu ecolekileyo ngeshekeli ngalesisikhathi kusasa esangweni laseSamariya,

19induna yamphendula umuntu kaNkulunkulu yathi: Uba iNkosi uNkulunkulu uqobo ingavula amawindi phezulu, kungenzeka lokhu na? Kodwa yena wathi: Uzakukubona ngawakho amehlo, kodwa kawuyikudla lutho lwakho.

20Kwaba njaloke, abantu bamnyathela esangweni waze wafa.