Jobe 39 - Ndebele Bible (iBhayibhili Elingcwele) 1978

1Uyasazi yini isikhathi sokuzala kwamagogo na?

Uyaqaphelisa ukuzala kwempala na?

2Ungazibala inyanga eziziqedayo,

uyasazi isikhathi ezizala ngaso,

3nxa zilala phansi zivule izisu zazo,

zizale abantwana bazo na?

4Amazinyane azo ayakhula egangeni aqine,

asuke ahambe, angabuyi futhi.

5Ngubani owakhulula ubabhemi weganga,

wathukulula izibopho zikababhemi olejubane,

6engimnike iganga libe ngumuzi wakhe,

lelizwe letshwayi libe yindawo yakhe yokuhlala na?

7Yena uyaklolodela umsindo womuzi,

angakuzwa ukumemeza komtshayeli;

8uyazula ezintabeni ezilidlelo lakhe,

edinga konke okuluhlaza.

9Inyathi iyavuma ukukusebenzela na?

Izalala esibayeni sakho ebusuku na?

10Ungayibophela ngemichilo,

ingalima imifolo na?

11Ungathembela kuyo ngoba amandla ayo emakhulu,

ungayiyekelela umsebenzi wakho na?

12Ungathemba ukuthi izabuya iletha amabele akho esizeni sakho na?

13Impiko zentshe zimfitshane,

impiko zayo zilensiba ezilutshwana.

14Iyatshiya amaqanda ayo emhlabathini,

akhudunyezwe ngumhlabathi,

15iyakhohlwa ukuba unyawo lungawachoboza,

lokuthi isilo seganga singawanyathela.

16Iwaphatha kalukhuni amatsiyane ayo,

kungathi kawasiwo awayo,

ingakhathali ngokuthi umsebenzi wayo ulize.

17Ngoba uNkulunkulu uyincitshile ukwazi,

kayinikanga ukuqedisisa.

18Lapho ibaleka iyalihleka ulunya ibhiza lomkhweli walo.

19Nguwe Jobe, onika ibhiza amandla alo na?

Uyalifaka umhlonga entanyeni yalo na?

20Uyalenza leqe njengentethe na?

Ukukhala kwalo okukhulu kuyethusa indawo zonke.

21Liyaphanda esihotsheni, lithokoze ngamandla alo,

liphume ukuhlangabeza impi.

22Liyakuhleka ulunya ukwesaba, ngoba kalesabi,

kaliwubalekeli umkhonto.

23Phezu kwalo isamba semitshoko siyakhehlezela,

kuphazime umkhonto lomdikadika.

24Liqhuqhiswa yikufutheka ligijime kakhulu,

kalilakunqandwa nxa lisizwa ukukhala kophondo.

25Nxa uphondo lukhala lithi: Nankoke!

likunuke ukulwa kusekhatshana,

lizwe umsindo wezinduna lokumemeza kwazo.

26Yikuhlakanipha kwakho wena okufundisa ukhozi ukuphapha,

lokuphaphela eningizimu na?

27Nguwe ofundisa ilinqe ukuqonga.

lokwakha isidleke salo engqongeni na?

28Lihlala eliweni, lakhe khona,

isidleke salo sisembalwini zeliwa.

29Lilapho liyakubona ukudla,

amehlo alo ayakubona kukhatshana.

30Amatsiyane alo amunya igazi,

lapho okukhona ababuleweyo likhona lalo.