uEzra 4 - Ndebele Bible (iBhayibhili Elingcwele) 1978

Izitha zabakoJuda ziyabahlupha ekwakheni kwabo

1Kwathi lapho izitha zakoJuda lezakoBenjamini sezizwile ukuthi abantu ababuyileyo ekuthunjweni babesakhela iNkosi uNkulunkulu kaIsrayeli ithempeli,

2baya kuZerubabeli loJeshuwa lezinhloko zezindlu bathi kibo: Sivumeleni sakhe lani, ngoba sikhonza uNkulunkulu wenu njengani, sinikele imihlatshelo kuye kusukela ensukwini zikaEsarihadoni inkosi yaseAsiriya owasiletha lapha.

7Ensukwini zokubusa kukaAtakisekisi inkosi yasePerisiya oBishilamu loMithiredathi loTabeyeli labanye abakibo bagwalela uAtakisekisi incwadi eyayilotshwe ngesiAramu.

8URehuma induna loShimishayi umbhali babhalela inkosi uAtakisekisi bemangalela iJerusalema bathi:

9Nansi incwadi yaboRehuma induna loShimishayi umbhali kanye labanye, abehluleli, lababusi, lezinduna zamaPerisiya, labantu baseEreki labaseBabiloni labaseSusa, abathiwa ngabaseElamu,

10labezinye izizwe ezathunjwa nguAshuribanipali omkhulu lodumileyo wazihlalisa emizini yaseSamariya lakulo lonke ilizwe elingaphetsheya komfula iYufrathi.

11Nanka amazwi encwadi yabo: Nkosi Atakisekisi, thina zinceku zakho, abantu bendawo engaphetsheya kweYufrathi, siyakubingelela.

12Siyayazisa inkosi ukuthi abaJuda abafika lapha bevela kuwe sebeyile eJerusalema. Sebewakha lowomuzi oxhwalileyo lomubi; balungisile izisekelo, sebeqedisa imiduli.

13Siyayazisa inkosi ukuthi uba lumuzi usakhiwa lemiduli iphele, kabasayikuthela imithelo, futhi kuzadumaza amakhosi ekucineni.

14Njengoba zisondliwa yinkosi kakusifanelanga ukuba sibone ihlazo lenkosi, ngakhoke siyayibikela inkosi

15ukuze kuhlolisiswe ezingwalweni zezindaba zabokhokho bakho. Uzakubona ezingwalweni ukuba lumuzi ungumuzi ohluphayo, uyingozi emakhosini lemazweni awo, uhlala uvukela amakhosi lokhu kwasukela endulo. Yikho okwenza ukuba lumuzi uchithwe.

16Siyayibikela inkosi ukuthi uba lumuzi usakhiwa, lemiduli yawo iphele, kayisayikuba lesikhundla elizweni elingaphetsheya kweYufrathi.

17Inkosi yasiphendula isithi: KuboRehuma induna loShimishayi umbhali lakwabanye benu abahlala eSamariya lakulo lonke ilizwe elingaphetsheya komfula iYufrathi ngiyabingelela.

18Incwadi elingithumele yona ifundiwe kuhle kimi.

19Ngenze umthetho, ukuba kuhlolisiswe, kwabonakala ukuba lokho kusukela endulo lumuzi uhlala uvukela amakhosi, umvukela lokuhlamuka kuhlala kukhona.

20Amakhosi alamandla ake aba khona eJerusalema abusa ilizwe lonke elingaphetsheya komfula iYufrathi, kwathelwa kuwo imithelo.

21Ngakhoke yenzani umthetho ukuba lababantu bamiswe ukuba lumuzi ungakhiwa ngize ngenze umthetho mina.

22Qaphelisani ukuthi kaliyekethisi kulindaba ukuba kungabi khona okudumaza amakhosi.

23Kwathi incwadi yenkosi uAtakisekisi isifundiwe kuboRehuma loShimishayi umbhali lababelabo, baya masinyane kubaJuda abaseJerusalema, babamisa ngamandla ukwakha.

24Wasusimake umsebenzi wokwakha indlu kaNkulunkulu eseJerusalema; wema kwaze kwaba ngumnyaka wesibili wokubusa kukaDariyu inkosi yasePerisiya.