1 uTimothi 5 - Ndebele Bible (iBhayibhili Elingcwele) 1978

1Ungayikhalimeli indoda endala kodwa yeluleke njengoyihlo, lamadoda amatsha njengabafowenu,

2labesifazana abadala njengonyoko, labesifazana abatsha njengodadewenu ngokuhlambuluka konke.

UTimothi welulekwa ngokuphatha abafelwakazi ebandleni

3Hlonipha abafelwakazi abangabafelwakazi isibili.

4Uba umfelwakazi elabantwana loba abantwana bomntanakhe, kabafunde kuqala ukuhlonipha indlu yakwabo, benzele abazali babo okufaneleyo; ngoba lokhu kuyabongeka phambi kukaNkulunkulu.

5Lowo ongumfelwakazi isibili osele yedwa uthembele kuNkulunkulu, uhlala ekunxuseni lasekukhulekeni ebusuku lemini;

6kanti lowo ozinikela ekuzithokoziseni ufile lanxa esekhona.

7Laya ngalezizinto ukuze bangasoleki.

8Uba umuntu engabondli abakibo, ikakhulu abendlu yakhe, ukulahlile ukukholwa, mubi kulongakholwayo.

9Kangabalwa umfelwakazi uba engaphansi kweminyaka engamatshumi ayisithupha. Kodwa kabe ngumuntu owayende kanye

10onconywa ngemisebenzi emihle, owondle abantwana bakhe, ongenise izihambi, ogezise inyawo zabangcwele, osize abahluphekayo, okhuthalele umsebenzi wonke omuhle.

11Kodwa abafelwakazi abatsha ubale; ngoba lapho inkanuko zabo sezibahlukanise loKristu bafuna ukwenda;

12balecala lokulahlwa ngoba bachithile ukukholwa kwabo kokuqala.

13Futhi bafunda ukuvilapha, bezula lezindlu, bengavilaphi kuphela kodwa babuye bahlebe bengena kokungesikho okwabo, bekhuluma okungafanelanga.

14Ngakhoke ngithanda ukuba abafelwakazi abatsha bende, bazale abantwana, baphathe kuhle imizi yabo, bangasiniki isitha ithuba lokuthuka.

15Ngoba lakhathesi abanye sebelahlekele kuSathane.

16Uba umuntu okholwayo elezihlobo ezingabafelwakazi kazisize, ukuze ibandla lingasindwa, ukuba lisize abangabafelwakazi isibili.

Mayelana labadala bebandla

17Abadala bebandla abaphatha kuhle kakuthiwe bafanele ukuhlonitshwa ngokuphindiweyo, ikakhulu labo abakhuthalela ukutshumayela lokufundisa.

18Ngoba umbhalo uthi: Ungayifaki isayeke inkabi nxa ibhula amabele. Futhi uthi: Isisebenzi sifanele umvuzo waso. Dute 25:4; Mat 10:10; Luka 10:7

19Ungalamukeli icala lomdala, kuphela ngobufakazi bababili loba babathathu. Dute 17:6; 19:15

20Abonayo ubasole phambi kwabo bonke ukuze besabe labanye.

21Ngiyakulaya phambi kukaNkulunkulu loKristu Jesu lezithunywa ezikhethiweyo ukuba uzigcine lezizinto ngokungaqumi ngaphambili; ungabandlululi muntu.

22Ungaphangisi ukubeka umuntu izandla, futhi ungahlanganyeli ezonweni zabanye; uzigcine wena ube mhlophe.

23Ungabe usanatha amanzi wodwa, kodwa natha lewayini elincinyane ngenxa yesisu sakho lokungaphili kuhle kwakho.

24Izono zabanye abantu zisobala, zandulela ekulahlweni, kanti ezabanye ziyabalandela.

25Ngokunjalo imisebenzi emihle isobala; loba ingenjalo, ingeke ihlale ifihlakele.