Josh 10 - Ndebele Bible (iBhayibhili Elingcwele) 1978

Ukunqotshwa kwamaAmori

1Kwathi nxa uAdonizedeki inkosi yaseJerusalema esezwile ukuthi uJoshuwa ulithumbile iAyi, walichitha laphela nya, wenza kilo lasenkosini yalo lokho akwenza eJeriko lasenkosini yalo, lokuthi abaseGibeyoni bavumelene ngokuthula labakoIsrayeli, sebehlala phakathi kwabo,

2watshaywa luvalo kakhulu, ngoba iGibeyoni lalingumuzi omkhulu njengomuzi wenkosi, lilikhulu kuleAyi, lamadoda akhona wonke engamaqhawe.

3Ngakho uAdonizedeki inkosi yaseJerusalema yasithumela ilizwi kuHohamu inkosi yaseHebroni, lakuPiramu inkosi yaseJarimuthi, lakuJafiya inkosi yaseLakishi, lakuDebiri inkosi yaseEgiloni, wathi:

4Wozani lingisize, silihlasele iGibeyoni; ngoba lenzile isivumelwano sokuthula loJoshuwa labakoIsrayeli.

5Ngakhoke amakhosi amahlanu amaAmori, inkosi yaseJerusalema leyaseHebroni leyaseJarimuthi leyaseLakishi leyaseEgiloni, ahlanganisa izimpi zawo, aphuma ayamisa maqondana leGibeyoni, alihlasela.

6Amadoda aseGibeyoni asethumela ilizwi kuJoshuwa ezihonqweni zaseGiligali esithi: Siyizinceku zakho, ungasilahli; woza masinyane usisize, ngoba amakhosi wonke amaAmori ahlala ezintabeni ayasihlanganyela.

7Ngakho uJoshuwa wasesuka eGiligali lawo wonke amadoda empi, wonke amaqhawe alamandla.

8INkosi yathi kuJoshuwa: Ungabesabi, ngoba ngibanikele esandleni sakho; kakukho loyedwa wabo ozakumelana lawe.

9UJoshuwa wabajuma, ehambe ubusuku bonke esuka eGiligali.

10INkosi yabachithachitha phambi kwabakoIsrayeli abababulala abanengi eGibeyoni, baxotshana labo baze bafika emqansweni waseBeti‐Horoni, bababulala kwaze kwaba seAseka leMakeda.

11Kwathi besabalekela uIsrayeli besehla emqansweni waseBetiHoroni, iNkosi yabehlisela isiqhotho esikhulu esivela phezulu kwaze kwaba seAzeka, bafa. Babebanengi ababulawa yisiqhotho ukwedlula ababulawa nguIsrayeli.

12UJoshuwa wasekhuluma eNkosini mhla iNkosi inikela amaAmori kwabakoIsrayeli, wathi phambi kukaIsrayeli:

Wena langa, mana eGibeyoni,

lawe nyanga ume esihotsheni saseAjaloni,

13Ilanga lema lenyanga yahlala, abantu baze baphindisela ezitheni zabo. Lokhu kulotshiwe ogwalweni lukaJashari. Ilanga lema phakathi komkhathi, kalaze laphangisa ukutshona okosuku lonke.2 Sam 1:18

14Kaluzanga lube khona usuku olunjalo ngaphambili loba ngasemva kwalo lapho iNkosi yalilalela khona ilizwi lomuntu, ngoba iNkosi yamlwela uIsrayeli.

15UJoshuwa wasebuyela ezihonqweni eGiligali kanye labo bonke abakoIsrayeli.

16Lawomakhosi abaleka, acatsha obhalwini lwaseMakeda.

17Kwabikwa kuJoshuwa ukuthi: Amakhosi amahlanu afunyanwe acatshile obhalwini lwaseMakeda.

18UJoshuwa wasesithi: Giqelani amatshe amakhulu emlonyeni wobhalu, libeke amadoda kulo awalinde;

19kodwa lingahlali khona lina. Xotshanani lezitha zethu, lizihlasele ngasemuva, lingaziyekeli zingene emizini yazo, ngoba iNkosi uNkulunkulu wenu izinikele ezandleni zenu,

20Kwathi uJoshuwa labakoIsrayeli sebebabulele babaqeda ngaphandle kwabalutshwana nje ababaleka bangena emizini ebiyelweyo,

21bonke abantu babuyela ezihonqweni kuJoshuwa eMakeda, kungekho loyedwa olimeleyo.

22UJoshuwa wasesithi: Vulani umlomo wobhalu, likhuphele kimi lawomakhosi amahlanu.

23Basebesenza njalo, bawakhupha obhalwini lawomakhosi amahlanu, inkosi yaseJerusalema leyaseHebroni leyaseJarimuthi leyaseLakishi leyaseEgiloni.

24Kwathi sebewakhuphile lawomakhosi bawaletha kuJoshuwa; wabiza bonke abakoIsrayeli, wathi ezinduneni zempi ezaziphume laye: Sondelani, linyathele lamakhosi ezintanyeni. Zasezisondela, zawanyathela ezintanyeni.

25UJoshuwa wasesithi kuzo: Lingesabi litshaywe luvalo; qinani lime isibindi, ngoba iNkosi izakwenza nje kuzo zonke izitha zenu elilwa lazo.

26Ngemva kwalokho uJoshuwa wasewatshaya wawabulala, wawalengisa ezihlahleni ezinhlanu; alenga ezihlahleni kwaze kwahlwa.

27Ngesikhathi sokutshona kwelanga uJoshuwa waselaya ukuba bawethule ezihlahleni, bawaphosele obhalwini ayecatshe kulo, bagiqele amatshe amakhulu emlonyeni walo, asekhona lawomatshe kuze kube lamhla.

28UJoshuwa wathumba iMakeda ngalolosuku, walichitha kanye lenkosi yalo ngomkhonto, waqeda nya bonke abantu ababekilo, katshiyanga muntu. Wenza enkosini yaseMakeda lokho akwenza enkosini yaseJeriko.

29UJoshuwa wasedlula eMakeda kanye laye wonke uIsrayeli, baya eLibina, balihlasela iLibina;

30iNkosi yalinikela lalo kanye lenkosi yalo esandleni sikaIsrayeli, owalichitha ngomkhonto labo bonke abantu ababekilo; katshiyanga muntu kilo, wenza enkosini yalo lokho akwenza enkosini yaseJeriko.

31UJoshuwa wasedlula eLibina kanye laye wonke uIsrayeli, baya eLakishi, balivimbezela, balihlasela;

32iNkosi yalinikela iLakishi esandleni sikaIsrayeli owalithumba ngosuku lwesibili, walichitha ngomkhonto labo bonke abantu ababekilo, njengokwenza kwakhe eLibina.

33UHoramu inkosi yaseGezeri weza ukusiza iLakishi; kodwa uJoshuwa wamchitha labantu bakhe, kaze atshiya loyedwa.

34UJoshuwa wasedlula eLakishi kanye laye wonke uIsrayeli, baya eEgiloni, balivimbezela, balihlasela,

35balithumba ngalolosuku, balichitha ngomkhonto, babaqeda bonke abantu ababekilo ngalolosuku, njengokwenza kwabo eLakishi.

36UJoshuwa wasesuka eEgiloni kanye laye wonke uIsrayeli, baya eHebroni, balihlasela,

37balithumba, balichitha ngomkhonto, inkosi yalo kanye lemizi yalo labo bonke abantu ababekilo; kabatshiyanga muntu, njengokwenza kwabo eEgiloni, baqeda bonke abantu ababekilo.

38UJoshuwa kanye laye wonke uIsrayeli babuyela eDebiri, balihlasela,

39balithumba kanye lenkosi yalo layo yonke imizi yalo, balichitha ngomkhonto, baqeda bonke abantu ababekilo; kabatshiyanga loyedwa. Njengokwenza kwabo eHebroni laseLibina lenkosini yalo benza njalo eDebiri lenkosini yalo.

40UJoshuwa walinqoba lonke ilizwe, elalisezintabeni leNegebi leShefela lamaqaqa lawo wonke amakhosi akhona; katshiyanga loyedwa, waqeda konke okuphilayo, njengokulaya kweNkosi, uNkulunkulu kaIsrayeli.

41UJoshuwa wabanqoba kusukela eKadeshi‐Barneya kwaze kwafika eGaza, lalo lonke ilizwe laseGosheni, kwaze kwafika eGibeyoni.

42UJoshuwa wathumba wonke lamakhosi lamazwe awo ngasikhathi sinye, ngoba iNkosi uNkulunkulu kaIsrayeli yamlwela uIsrayeli.

43UJoshuwa wasebuyela ezihonqweni eGiligali kanye laye wonke uIsrayeli.