Isa 13 - Ndebele Bible (iBhayibhili Elingcwele) 1978

Ilizwi ngeBabiloni

1Leli yilizwi ngeBabiloni aliboniswayo uIsaya indodana kaAmozi.

2Entabeni eligceke misa uphawu, ubamemeze abebutho,

ubaqhwebe ngesandla ukuba bangene emasangweni ezikhulu.

3Mina uqobo ngibalayile abakhethiweyo bami,

ngibizile amaqhawe ami ukugcwalisa intukuthelo yami,

amaqhawe ami azikhukhumezayo.

4Zwana ukuxokozela entabeni kungathi ngokwabantu abanengi.

Zwana umsindo wemibuso, umsindo wezizwe ezibuthanayo,

INkosi yamabandla iyahlomisa impi yayo.

5Bavela elizweni elikhatshana, emikhawulweni yezulu,

iNkosi kanye lezikhali zentukuthelo yayo,

ukuba bachithe ilizwe lonke.

6Lilani, ngoba usuku lweNkosi lusondele;

njengokuchitheka okuvela kuSomandla luzakufika.

7Ngakhoke izandla zonke zizakuxega,

lenhliziyo yakhe wonke umuntu iphelelwe ngamandla,

8batshaywe luvalo, behlelwe yibuhlungu lokudabuka,

bafuthelwe njengowesifazana ohelelwayo,

bakhangelane ngokumangala, benyukumele.

9Khangelani, usuku lweNkosi luyeza lulobuhlungu lokufutheka lolaka oluvuthayo,

ukuba luchithe umhlaba, lubhubhise izoni ezikuwo.

10Inkanyezi zezulu kaziyikukhanya;

ilanga lizakuba mnyama ekuphumeni kwalo,

lenyanga kayisayikukhanya.

11Ngizakuwutshaya umhlaba ngenxa yobubi bawo,

lababi ngenxa yezono zabo,

ngiqede ukuzigqaja kwabazikhukhumezayo,

ngithobise ukuzikhukhumeza kwabalesihluku.

12Ngizakwenza ukuba abantu basweleke ukudlula igolide elihle,

basweleke ukudlula igolide laseOfiri.

13Ngakhoke ngizakwenza iphezulu linyikinyeke,

lomhlaba unyakaziswe endaweni yawo,

ngokuthukuthela kweNkosi yamabandla,

osukwini lokuvuthwa kolaka lwayo.

14Kuzakuthi njengempala exotshwa ngumzingeli,

lanjengezimvu ezingaqoqwa muntu,

bonke abantu babuyele kwabakibo,

bonke babalekele elizweni lakibo.

15Bonke abazafunyanwa bazagwazwa,

bonke abazabanjwa bazakubulawa ngomkhonto.

16Izingane zabo zizachotshozwa phambi kwabo,

kuphangwe lezindlu zabo, omkabo babanjwe.

17Khangela, ngibavusela amaMede angakhathaleli isiliva,

angathokozi langegolide.

18Imitshoko yawo izabulala izinsizwa;

kawayikuba lesihawu lenzalo yabantu,

kawayikuhawukela abantwana.

19IBabiloni, udumo lwemibuso

ubucwazicwazi lokuziqhenya kwamaKaladiya,

lizakuchithwa nguNkulunkulu njengeSodoma leGomora.

20Kalisoze libuye lakhiwe,

loba kuhlalwe kulo izizukulwana zonke;

amaArabiya kawayikumisa amathente awo kulo,

labelusi kabayikwelusela izimvu zabo kulo.

21Kodwa izilo zeganga zizalala khona,

lezindlu zalo zizagcwala izilo ezikhonyayo;

izintshe zizalala khona,

lamagogo aqolotshe khona.

22Impisi zizakhala ezinqabeni zalo,

lamakhanka ezindlini ezinhle.

Siseduze ukufika isikhathi salo,

lezinsuku zalo kaziyikwandiswa.