Zek 10 - Ndebele Bible (iBhayibhili Elingcwele) 1978

INkosi izabahlenga abantu bayo

1Celani eNkosini izulu ngesikhathi sentwasa,

eNkosini eyenza amayezi eziphepha,

enika abantu izihlambo zezulu,

enika bonke utshani egangeni.

2Ngoba izithombe ezithiwa amaterafi zikhuluma ize,

labalumbi babona okungamanga,

labaphuphi balandisa amaphupho ayinkohliso,

ukududuza kwabo kuyize.

Ngakhoke abantu bayahambahamba njengezimvu,

bahlupheke ngoba bengelamalusi.

3Ukuthukuthela kweNkosi kuyavutha ngabelusi,

izatshaya abakhokheli;

ngoba iNkosi yamabandla iyawukhathalela umhlambi wayo uJuda,

izabenza babe njengebhiza lobukhosi empini.

4Kuzaphuma ilitshe lengonsi kibo,

kuphume isikhonkwane sethente,

kuphume imitshoko yokulwa,

kuphume bonke ababusi.

5Bebonke bazakuba njengamaqhawe ekulweni

anyathela udaka lwezindlela;

bazakulwa ngoba iNkosi ilabo,

bayangise abagadi bamabhiza.

6Mina Nkosi ngizamqinisa uJuda, ngikhulule uJosefa.

Ngizababuyisa ngoba ngilesihawu kibo,

babe njengokungathi kangizanga ngibalahle;

ngoba ngiyiNkosi uNkulunkulu wabo, ngizabaphendula.

7UEfrayimi uzakuba njengeqhawe,

inhliziyo yabo ithokoze njengokungathi ithokoziswa liwayini.

Abantwana babo bazakubona lokho bathabe,

inhliziyo zabo zizajabula eNkosini.

8Ngizabatshayela ikhwelo, ngibabuthe,

ngoba ngibahlengile, babe banengi njengakudala.

9Lanxa ngibachithachithe phakathi kwezizwe,

kanti lemazweni akhatshana bazangikhumbula,

bazakondla abantwana babo babuye.

10Ngizababuyisa ekhaya bevela eGibithe,

ngibaqoqe eAsiriya;

ngizabaletha elizweni laseGileyadi laseLebanoni,

kuze kungasali ndawo.

11Ulwandle luzakwehlelwa yikuhlupheka okukhulu,

lamavinqo olwandle azatshaywa,

kutshe lenziki zonke zeNile;

kwehliswe ukuzigqaja kweAsiriya,

kusuke intonga yobukhosi yaseGibithe.

12Amandla abo azakuba seNkosini,

bahambe bethokoza ebizweni layo, kutsho iNkosi.