Nani 15 - Ndebele Bible (iBhayibhili Elingcwele) 1978

Imilayo emayelana leminikelo

1INkosi yathi kuMose:

2Tshono ebantwini bakoIsrayeli uthi: Lapho lifika elizweni elizakwakha kulo engilinika lona,

3thathani ezinkomeni ingabe ezimvini, linikele eNkosini umnikelo owenziwe ngomlilo, loba kungumnikelo wokutshiswa loba kungumhlatshelo, owokugcwalisa isithembiso, loba owesihle, loba owemikhosi yenu emisiweyo, ukwenza iphunga elimnandi eNkosini.

4Lowo oletha umnikelo wakhe uzanikela eNkosini umnikelo wempuphu, ube yingxenye yehefa lempuphu ecolekileyo ixubene lokwesine kwehini yamafutha;

5alethe lewayini libe ngumnikelo wokuthululwa, enzele lelo lalelo iwundlu okwesine kwehini yewayini, alilungisele umnikelo wokutshiswa loba umhlatshelo.

6Inqamake, lizakuyenzela umnikelo wempuphu, ube yingxenge yehefa lempuphu ecolekileyo ixubene lokwesithathu kwehini yamafutha,

7linikele lokwesithathu kwehini yewayini, libe ngumnikelo wokuthululwa olephunga elimnandi eNkosini.

8Nxa lilungisa inkunzi ibe ngumnikelo wokutshiswa loba ngumhlatshelo, owokugcwalisa isithembiso, ingabe kube yiminikelo yokuthula eNkosini,

9lizanikela kanye lenkunzi umnikelo wempuphu, ube yingxenye yehefa lempuphu ecolekileyo ixubene lengxenye yehini yamafutha,

10linikele lengxenye yehini yewayini, libe ngumnikelo wokuthululwa, kube ngumnikelo owenziwe ngomlilo olephunga elimnandi eNkosini.

11Kuzakwenziwa njalo ngaleyo laleyo inkunzi, loba ngaleyo laleyo inqama, loba ngaleyo laleyo imvu enduna, ingabe ngalelo lalelo izinyane.

12Njengenani lazo elizilungisayo lizakwenza njalo kuzo zonke, loba zingaki.

13Bonke abokuzalwa elizweni bazakwenza lezizinto ngaleyondlela, nxa benikela umnikelo owenziwe ngomlilo, kube liphunga elimnandi eNkosini.

14Owemzini ophakathi kwenu, loba ehlala okwesikhatshana loba ekhona aze afe, uba efisa ukunikela umnikelo ngomlilo, kube liphunga elimnandi eNkosini, uzakwenza njengani.

15Kuzakuba lesimiso sinye kini lakowemzini ohlala phakathi kwenu, isimiso esingelakuphela ezizukulwaneni zenu zonke. Owemzini uzakuba njengani phambi kweNkosi.

16Kuzakuba lomthetho munye kini lakowemzini ophakathi kwenu.

17INkosi yathi kuMose:

18Tshono ebantwini bakoIsrayeli uthi: Lapho lifika elizweni engilisa kulo,

19kuzakuthi nxa lisidla ukudla kwelizwe, linikele umnikelo eNkosini.

20Ngenhlama yenu yokuqala lizakwenza iqebelengwana, lilinikele eNkosini; lizalinikela njengokunikela kwenu umnikelo ovela esibuyeni.

21Inhlama yenu yokuqala lizakuyinikela eNkosini ezizukulwaneni zenu zonke.

22Kodwake uba liduha, lingagcini yonke imilayo le iNkosi eyinike uMose,

23konke iNkosi elilaye khona ngoMose kusukela kulolosuku iNkosi eyalaya ngalo langasemuva ezizukulwaneni zenu,

24kuzakuthi uba kungenziwanga ngabomu, lebandla belingakwazi, lonke ibandla lizanikela ngenkunzi ibe ngumnikelo wokutshiswa, kube liphunga elimnandi eNkosini, kanye lomnikelo wempuphu lomnikelo wokuthululwa okuqondene layo njengomthetho, linikele futhi lempongo ibe ngumnikelo wesono.

25Umpristi uzakwenzela lonke ibandla labakoIsrayeli indlela yokubuyisana, bathethelelwe, ngoba kakwenziwanga ngabomu, futhi sebelethile eNkosini umnikelo wabo owenzelwe iNkosi ngomlilo, lomnikelo wabo wesono, ngenxa yesiphambeko sabo.

26Lalo lonke ibandla labakoIsrayeli lizathethelelwa njalo, lowemzini ohlala phakathi kwabo, ngoba bonke babephambukile.

27Uba umuntu oyedwa esona engoni ngabomu, uzanikela ngesibhuzikazi esilomnyaka munye, sibe ngumnikelo wesono.Levi 4:27–31

28Umpristi uzamenzela lowomuntu indlela yokubuyisana phambi kweNkosi, uba engonanga ngabomu, uzathethelelwa.

29Umlayo wenu uzakuba munye kubo bonke abangoni ngabomu, abakoIsrayeli, labemzini abahlala phakathi kwenu.

30Kodwa lowo owenza okubi ngabomu, loba engowokuzalwa elizweni loba engowemzini, uyahlambaza iNkosi; uzakukhutshwa ebantwini bakibo.

31Ngoba edelele ilizwi leNkosi, wephula umlayo wayo, uzakukhutshwa sibili; ububi bakhe buzakuhlala kuye.

Ukubulawa komuntu othile owatheza inkuni ngeSabatha

32Abantu bakoIsrayeli besesenkangala, bafumana umuntu etheza inkuni ngeSabatha.

33Labo abamfumanayo etheza bamletha kuMose loAroni lakulo lonke ibandla.

34Bamfaka entolongweni ukuba alindwe, ngoba kwakungakatshiwo ukuthi kuzakwenziwani kuye.

35INkosi yathi kuMose: Lowomuntu kabulawe; lonke ibandla kalimkhande ngamatshe ngaphandle kwezihonqo.

36Lonke ibandla lamkhuphela ngaphandle kwezihonqo, lamkhanda ngamatshe waze wafa, njengokutsho kweNkosi kuMose.

Mayelana lentshaka zengubo zabantu

37INkosi yathi kuMose:

38Khuluma ebantwini bakoIsrayeli, ubatshele ukwenza izintshaka emiphethweni yezingubo zabo, bona lezizukulwana zabo zonke, lokuba babophele ezintshakeni intambo eluhlaza.Dute 22:12

39Kuzakuthi lapho likukhangela lokhu, likhumbule yonke imilayo yeNkosi, liyenze, lingalandeli lokho inhliziyo zenu ezikufisayo lamehlo enu akubonayo, okulamandla okuliduhisa.

40Khumbulani yonke imilayo yami, liyigcine, libe ngcwele eNkosini yenu.

41NgiyiNkosi uNkulunkulu wenu owalikhupha elizweni laseGibithe ukuba nguNkulunkulu wenu; ngiyiNkosi uNkulunkulu wenu.