Hubo 30 - Ndebele Bible (iBhayibhili Elingcwele) 1978

Ukubonga kosilisiweyo ekufeni

1Ngizakukudumisa, Nkosi, ngoba ungiphakamisile,

kawuvumanga ukuba izitha zami zithokoze ngami.

2Nkosi Nkulunkulu wami, ngacela usizo kuwe,

wangisilisa.

3Nkosi, uwukhuphile umphefumulo wami endaweni yabafileyo,

wangikhupha endaweni yabasemgodini.

4Idumiseni iNkosi, lina abangcwele bayo,

libonge ibizo layo elingcwele.

5Ngoba ukuthukuthela kwayo kungokwesikhatshana nje,

kanti umusa wayo ungowokuphila konke.

Ukukhala kungaba khona kusihlwa,

kanti ukuthokoza kuyafika ekuseni.

6Mina ngathi ekuphumeleleni kwami:

Kangiyikunyikinywa.

7Ngomusa wakho, Nkosi, wangiqinisa njengentaba;

wabufihla ubuso bakho, ngaba lokwesaba.

8Ngakhala kuwe, Nkosi;

nganxusa kuwe,

9ngathi: Kuzakukusizani ukufa kwami lokutshona kwami emgodini na?

Abafileyo bazakukudumisa, batshumayele ubuqotho bakho na?

10Zwana, Nkosi, ube lomusa kimi;

Nkosi, woba ngumsizi wami.

11Uphendule ukukhala kwami kwaba yikusina;

ungikhuphile izingubo zami zokulila,

wangambathisa ukuthokoza,

12ukuze umphefumulo wami ukudumise ungathuli.

Nkosi, Nkulunkulu wami, ngizakukubonga kuze kube nini lanini.