Dan 11 - Ndebele Bible (iBhayibhili Elingcwele) 1978

1Minake, ngomnyaka wokuqala kaDariyu umMede, ngema ukumqinisa ukuba abe lamandla.

Inkosi yasenyakatho leyaseningizimu

2Khathesi ngizakukutshela. Kusezakuvela amakhosi amathathu ePerisiya; eyesine izanotha ukwedlula wonke. Kuthi lapho isiqinile ngenxa yenotho yayo, izimisele ukulwa lombuso wamaGriki.

3Besekuvela inkosi elamandla ezabusa umbuso omkhulu, yenze ekuthandayo.

4Izakwanela ukuvela nje, umbuso wayo uchithwe wahlukaniswe izigaba ezine, kodwa unganikwa inzalo yayo, ungabuswa njengokubusa kwayo. Ngoba umbuso wayo uzasitshunwa, unikwe abanye ngaphandle kwalaba.

5Inkosi yaseningizimu izakuba lamandla, kodwa omunye wababusi bayo uzakuba lamandla ukuyedlula, abe lombuso omkhulu.

6Emva kweminyaka izakwenza isivumelwano, inkosi yaseningizimu yendisele indodakazi yayo enkosini yasenyakatho ukuba enze isivumelwano sokuthula; kodwa kasiyikuma, yona kanye lezinceku zayo eyafika lazo, lomntwana wayo, lomkayo bazabulawa.

7Ngalezozikhathi kuzavela olihlumela empandeni zaleyondodakazi athathe indawo yenkosi. Uzakuyihlasela impi yenkosi yasenyakatho, angene enqabeni yayo, alwe labantu bayo, abehlule.

8Uzakuthumbela eGibithe onkulunkulu babo, lezithombe zabo zensimbi, lezitsha zabo eziligugu ezesiliva lezegolide. Okweminyaka eminengi kayikuba asayihlasela inkosi yasenyakatho.

9Yonake ibisihlasela umbuso wenkosi yaseningizimu, kodwa ibuyele futhi elizweni layo.

10Amadodana ayo azahloma abuthe izimpi ezinkulu; enye izakhukhula yedlule, ilwe ize ifike enqabeni yayo.

11Inkosi yaseningizimu izakuthukuthela, iphume ukulwa lenkosi yasenyakatho, ibuthe impi enkulu, kodwa izanikelwa esandleni sesitha sayo.

12Lapho impi isithunjiwe, inhliziyo yayo izaziphakamisa, ibulale amatshumi ezinkulungwane, kodwa kayiyikunqoba.

13Inkosi yasenyakatho ibuye ibuthe futhi impi enkulu kuleyokuqala; kuthi ngemva kweminyaka ethile ifike lempi enkulu lempahla ezinengi.

14Ngalezozikhathi abanengi bazayivukela inkosi yaseningizimu. Abantu abalesihluku phakathi kwabantu bakini bazakuvuka ukuba bagcwalise umbono, kodwa behluleke.

15Inkosi yasenyakatho ibisifika, yakhe idundulu lokuvimbezela, iwuthathe umuzi obiyelweyo. Impi yaseningizimu izakwehluleka ukulwa kanye lamabutho ayo akhethiweyo, izaswela amandla.

16Kodwa ehlaselayo izakwenza ekuthandayo, kungabi khona loyedwa oyimelayo. Izakuma elizweni elihle, lonke libe sesandleni sayo.

17Izakuzimisela ukunqoba wonke umbuso wenkosi yaseningizimu, yenze isivumelwano layo, iyendisele indodakazi yayo ukuze kuchitheke umbuso wayo; kodwa lokhu kakuyikuphumelela.

18Emva kwalokho izaphendukela ngasemazweni angasolwandle, iwanqobe amanengi awo; kodwa induna yezizweni izakukuqeda lokhu ukuzikhukhumeza kwayo, ikuphendule kube lihlazo.

19Izaphenduka ibuyele ezinqabeni zelizwe layo, kodwa izakwahlulwa, ingaphindi ibonwe futhi.

20Esikhundleni sayo kuzavela enye inkosi ezathuma umthelisi ukuthelisa abantu abacindezele; kodwa ngensuku ezilutshwana izabulawa, kungesikho obala loba empini.

21Esikhundleni sayo kuzavela umuntu odelelekileyo ongabunikwanga ubukhosi, afike kungananzelelwe, awuthathe umbuso ngokukhohlisa.

22Izimpi uzazikhukhula phambi kwakhe, azibhubhise, kanye lesikhulu sesivumelwano.

23Kusukela esikhathini sokwenziwa kwesivumelwano laye uzasebenza ngobuqili, aqine abe lamandla elabantu abalutshwana.

24Uzanqoba izindawo ezinothileyo zombuso, enze okungenziwanga ngokhokho bakhe, abele abalandeli bakhe impango lokuthunjiweyo lempahla; enze amacebo okuhlasela inqaba, kodwa kube ngokwesikhatshana nje.

25Uzasukela inkosi yaseningizimu ngamandla langesibindi elempi enkulu; inkosi yaseningizimu ilwe laye ilempi enkulu elamandla; kodwa kayiyikuma, ngoba abantu bazakuyenzela amacebo.

26Lalabo abadla ukudla kwayo okumnandi bazayibhubhisa, impi yayo ikhukhulwe, kubulawe abanengi.

27Amakhosi amabili esidla ndawonye azakwenza amacebo, akhohlisane, kodwa kungawasizi. Kodwa ukuphela kuzafika ngesikhathi esimisiweyo.

28Uzabuyela elizweni lakhe elempahla enengi, kodwa inhliziyo yakhe imelane lesivumelwano esingcwele, enze akufunayo, abesebuyela elizweni lakhe.

29Ngesikhathi esimisiweyo uzabuya ahlasele iGibithe; kodwa kakuyikuba njengakuqala.

30Imikolo yamaRoma izakumhlasela, abesesesaba, abuyele emuva; uzabuyela ethukuthele, asukelane lesivumelwano esingcwele. Uzabuya asekele labo abadele isivumelwano esingcwele.

31Izimpi zakhe zizafika zingcolise ithempeli lenqaba, zisuse umnikelo otshiswa insuku zonke, zimise amanyala aletha ukuchitheka.Dan 9:27; 12:11; Mat 24:15; Mark 13:14

32Uzakubakhohlisa ngokubabamba amehlo labo abephula isivumelwano; kodwa abantu abamaziyo uNkulunkulu wabo bazakuma baqine, balwe.

33Abahlakaniphileyo babantu bazafundisa abanengi, lanxa bezabulawa empini langomlilo, babanjwe, bathunjwe okwensuku ezithile.

34Ekubulaweni kwabo bazasizwa kancinyane, loba abanengi balabo abazihlanganisa labo bengelaqiniso.

35Abanye babahlakaniphileyo bazabulawa ukuze abanye bahlolwe, bahlanjululwe, benziwe babe mhlophe, kuze kufike isikhathi sokuphela, ngoba kungokwesikhathi esimisiweyo.

36Inkosi izakwenza ekuthandayo; izaziphakamisa izikhulise ngaphezu kwabo bonke onkulunkulu, ikhulume okumangalisayo ngoNkulunkulu, iphumelele kuze kuphelele intukuthelo, ngoba okumisiweyo kuzakwenziwa.2 Tes 2:3–4; Isam 13:5–6

37Kayiyikunanza onkulunkulu babokhokho bayo lonkulunkulu othandwa ngabesifazana; kayiyikunanza loyedwa unkulunkulu, ngoba izazikhulisa ibe phezu kwabo bonke.

38Izadumisa unkulunkulu wezinqaba; unkulunkulu owayengaziwa ngokhokho bakhe izamdumisa ngegolide langesiliva, langamatshe amahle, langeziphiwo ezibiza imali enengi.

39Izagcwalisa inqaba zayo eziqinileyo ngabantu bezizweni, abantu abakhonza unkulunkulu wezizweni; labo abayivumayo ibanike udumo, ibenze ababusi phezu kwabanengi, ibanike umvuzo wamazwe.

40Ngesikhathi sokuphela inkosi yaseningizimu izakuyihlasela; kodwa inkosi yasenyakatho izayisukela njengesivunguzane ilezinqota zokulwa, labagadi bamabhiza, lemikolo eminengi, ihlasele amazwe, ikhukhule, idlule.

41Izangena elizweni elihle, ibulale amatshumi azinkulungwane; kodwa iEdoma leMowabi lengxenye enkulu yabaseAmoni bazaphunyuka esandleni sayo.

42Izaphakamisela isandla sayo emazweni, lelizwe laseGibithe kaliyikuphepha.

43Izathatha inotho yegolide leyesiliva lazo zonke izinto eziligugu zaseGibithe; amaLibiya lamaEtiyopiya azayikhonza.

44Kodwa izakwethuswa yimibiko evela empumalanga lasenyakatho, iphume ngokuthukuthela okukhulu ukuqeda lokubhubisa abanengi, baphele nya.

45Izamisa amathente ayo obukhosi phakathi kolwandle lentaba enhle engcwele. Kodwa izakufa, kungekho ongayisiza.