2 Sam 9 - Ndebele Bible (iBhayibhili Elingcwele) 1978

UDavida uba lomusa kuMefiboshethi

1UDavida wathi: Kusekhona yini oseleyo endlini kaSawuli ukuba ngimenzele umusa ngenxa kaJonathani na?1 Sam 20:15–17

2Kwakukhona inceku yendlu kaSawuli ibizo layo kuthiwa nguZiba, bambizela kuDavida; inkosi yathi kuye: Nguwe uZiba na? Yena wathi: Inceku yakho nansi.

3Inkosi yasisithi: Kusekhonanje endlini kaSawuli loyedwa engingamenzela umusa njengokuthandwa nguNkulunkulu na? UZiba wathi: Yebo, nkosi; uJonathani uselendodana eyisilima inyawo zombili.2 Sam 4:4

4Inkosi yasisithi kuye: Ingaphi na? UZiba wayiphendula wathi: Ihlala endlini kaMakiri indodana kaAmiyeli eLodebari.

5Inkosi uDavida yasithumela ukuba alandwe endlini kaMakiri indodana kaAmiyeli eLodebari.

6UMefiboshethi indodana kaJonathani kaSawuli wafika kuDavida, wathi mbo ngobuso, wakhuleka. UDavida wathi: Mefiboshethi! Yena waphendula wathi: Ikhona inceku yakho.

7UDavida wasesithi kuye: Ungesabi, ngoba ngizakwenzela umusa ngenxa kayihlo uJonathani; ngizakukubuyisela lonke ilizwe likayihlomkhulu uSawuli, udle njalo etafuleni yami.

8UMefiboshethi wakhuleka, wasesithi: Kambe inceku yakho iyini ukuba ukhangele inja efileyo enjengami na?

9Inkosi yasibiza uZiba, inceku kaSawuli, yathi kuye: Konke okwakungokukaSawuli, lendlu yakhe yonke ngikunike indodana yenkosi yakho.

10Wena lamadodana akho lenceku zakho lizayilimela amasimu, liwavune ukuze indlu yenkosi yakho ibe lokudla; kodwa uMefiboshethi indodana yenkosi yakho uzakudla njalo etafuleni yami. UZiba wayelamadodana alitshumi lanhlanu, lenceku ezingamatshumi amabili.

11UZiba wathi enkosini: Inceku yakho izakwenza konke njengokutsho kwenkosi yami. UMefiboshethi wadla etafuleni yenkosi njengendodana yenkosi.

12UMefiboshethi wayelendodana encinyane ibizo layo linguMika. Bonke ababehlala endlini kaZiba baba zinceku zikaMefiboshethi.

13UMefiboshethi wahlalake eJerusalema, ngoba wadla njalo etafuleni yenkosi. Wayeyisilima inyawo zakhe zombili.