Mal 3 - Ndebele Bible (iBhayibhili Elingcwele) 1978

1INkosi yamabandla ithi: Khangelani, ngiyasithuma isithunywa sami ukulungisa indlela phambi kwami. INkosi eliyidingayo izafika masinyane ethempelini layo; isithunywa sesivumelwano elithokoza ngaso siyeza.Mat 11:10; Mark 1:2; Luka 1:76; 7:27

2Kodwa ngubani ongalumela usuku lokufika kwaso, longema ekubonakaleni kwaso na? Ngoba sinjengomlilo wompheki wensimbi, lanjengesepa yomgezisi.Isam 6:17

3Sizahlala esihlalweni saso sincibilikise sihlambulule isiliva, sihlambulule amadodana kaLevi, siwancibilikise njengegolide lanjengesiliva, aze anikele iminikelo efaneleyo eNkosini.

4Ng’khona iminikelo yakoJuda leyaseJerusalema izakuyithokozisa iNkosi njengasensukwini zasendulo laseminyakeni yakuqala. INkosi yamabandla ithi:

5Besengifika kini ukulithonisisa; ngizakuba ngufakazi okhutheleyo mayelana lezangoma, lezifebe, lokufungela amanga, lokucindezela abaqatshiweyo ngamaholo abo, lokucindezela abafelwakazi, lezintandane, lalabo abasunduzela eceleni abezizweni, bengangesabi mina.

Mayelana lokwetshumi

6Ngoba mina Nkosi kangiphenduki; ngalokho lani madodana kaJakobe kalikaqedwa.

7Kusukela ensukwini zabokhokho benu liphambukile ezimisweni zami, kalizigcinanga. Buyani kimi, lami ngizabuyela kini, kutsho iNkosi yamabandla. Kanti lina lithi: Sizabuya kanjani na?

8Umuntu angamphanga uNkulunkulu na? Lina liyangiphanga. Kodwa lina lithi: Sikuphanga kanjani na? Ngithi: Ngokwetshumi kwenu langeminikelo yenu.

9Liqalekisiwe ngesiqalekiso, isizwe sonke siqalekisiwe, ngoba liyangiphanga.

10Lethani konke okwetshumi endlini yenotho ukuba kube khona ukudla endlini yami. Lingihlole ngalokho, kutsho iNkosi yamabandla, libone ukuba kangiyikulivulela iminyango yaphezulu, ngilehlisele izibusiso ezinengi na?Levi 27:30; Nani 18:21–24; Dute 12:6; 14:22–29; Neh 13:12

11Ngizalikhuzela izibungu, ukuze zingadli izithelo zomhlabathi wenu; lamavini enu emasimini kawayikuphutha ukuthela, kutsho iNkosi yamabandla.

12Zonke izizwe zizakuthi libusisiwe, ngoba lizakuba yilizwe elithokozisayo, kutsho iNkosi yamabandla.

Ukwahlukaniswa phakathi kwabalungileyo lababi

13Amazwi enu abelukhuni ngami, kutsho iNkosi. Kanti lina lithi: Sikhulume sathini ngawe na?

14Lithe lina: Kakusizi lutho ukukhonza uNkulunkulu. Kusizani ukugcina imilayo yakhe lokuba sihambe phambi kweNkosi yamabandla njengabakhalayo na?

15Khathesike sithi abaziphakamisayo babusisiwe; abenza okubi yibo abaphumelelayo; lalapho bemlinga uNkulunkulu bayayekelwa.

16Basebekhulumisana labo abayesabayo iNkosi; iNkosi yabalalela, yabezwa. Incwadi yesikhumbuzo yalotshwa phambi kwayo ngabo abayesabayo iNkosi, labahlonipha ibizo layo.

17Bazakuba ngabami, kutsho iNkosi yamabandla, babe yimpahla yami ngosuku lokwenza kwami, ngizabayekela njengalokhu umuntu eyekela indodana emsebenzelayo.

18Beselibuya lisahlukanisa phakathi kwabalungileyo lababi, laphakathi komuntu omkhonzayo uNkulunkulu longamkhonziyo.