Zaga 25 - Ndebele Bible (iBhayibhili Elingcwele) 1978

Ezinye izaga zikaSolomoni

1Nanzi ezinye izaga zikaSolomoni ezagwalwa ngabantu bakaHezekiya inkosi yakoJuda.

2Udumo lukaNkulunkulu luyikufihla izinto,

kodwa udumo lwamakhosi luyikuveza izindaba.

3Njengalokhu izulu liphakeme kakhulu.

lomhlaba ujulile kakhulu,

kunjalo lengqondo yenkosi kayilakuqedisiswa.

4Nxa sekususwe amanyele esiliveni,

umkhandi angabumba isitsha ngaso;

5nxa sekususwe ababi phambi kwenkosi,

umbuso wayo uzakumiswa ngokulunga.

6Ungaziphakamisi phambi kwenkosi,

ungazenzi isikhulu;

7ngoba kungcono ukuba kuthiwe kuwe: Woza ngapha;

kulokuba wehliswe phambi kwesikhulu.

8Ungaphangisi ukulandisela umthonisi lokho okubonileyo;

ngoba uzakwenza njani ekucineni lapho omunye esetshengisa ukuthi wena uphambanisile na?

9Lungisa indaba yakho lomakhelwana wakho uqobo lwakhe,

ungavezi imfihlo yomunye,

10funa okuzwayo akuyangise,

ulahlekelwe libizo lakho.

11Ilizwi elikhulunywa ngesikhathi esifaneleyo linjengemikhemeswane yegolide

ebekwe embuleni lesiliva.

12Umuntu okhuza ngokuhlakanipha

unjengesongo legolide loba isiceco segolide kolalelayo.

13Isithunywa esithembekileyo siyamvuselela osithumileyo

njengamanzi aqandayo esikhathini sokutshisa ngosuku lokuvuna.

14Umuntu othembisa iziphiwo, kanti ongaziphi,

unjengamayezi lomoya okungalethi izulu.

15Ngokubekezela umbusi angancengwa aze avume,

lelizwi elithambileyo lingahlula amandla.

16Uba uthola izinyosi, dlana okwanele wena,

ngoba uba usidla kakhulu uzakuzihlanza.

17Ungamethekeleli kanengi umakhelwana wakho,

funa umdine akuzonde.

18Umuntu ofakaza amanga ngomakhelwana wakhe

unjengesagila lomkhonto lomtshoko obukhali.

19Ukuthemba umuntu ongathembekanga ngesikhathi sokuhlupheka

kunjengezinyo elixegayo lonyawo olwenyeleyo;

20futhi kunjengomuntu okhupha ibhatshi ngosuku lwamakhaza.

Ukuhlabelela umuntu olenhliziyo edabukileyo

kunjengokufaka okumunyu esilondeni.

21Uba isitha sakho silambile, siphe ukudla,

uba somile, sinathise;

22ngoba ngokwenza njalo uzakumenza ayangeke kakhulu,

leNkosi izakukunika umvuzo.

23Njengomoya wasenyakatho uletha izulu,

ngokunjalo ukunyeya kuletha ulaka.

24Kungcono ukuhlala ophahleni

kulokuhlala endlini lowesifazana ohluphayo.

25Indaba enhle evela elizweni elikhatshana

injengamanzi aqandayo kuye owomileyo.

26Olungileyo odedayo phambi komubi

unjengomthombo odungekileyo lomgodi wamanzi angconileyo.

27Kakulunganga ukudla inyosi kakhulu;

ngokunjalo kakulunganga ukudinga ukudunyiswa ngabantu.

28Umuntu ongazithintiyo unjengomuzi odilikelwe ngumthangala wawo.