Hez 28 - Ndebele Bible (iBhayibhili Elingcwele) 1978

Ilizwi leNkosi ngenkosi yaseTire

1Ilizwi leNkosi lafika kimi lathi:

2Ndoda tshono kusikhulu saseTire, uthi iNkosi uNkulunkulu ithi:

Ngoba inhliziyo yakho iziphakamisile,

utshilo ukuthi: Mina ngingunkulunkulu,

ngihlezi esihlalweni sabonkulunkulu enzikini zolwandle;

kanti ungumuntu nje, kawusunkulunkulu,

lanxa uzitshaya ohlakaniphileyo njengonkulunkulu.

3Impela uhlakaniphile kuloDaneli,

kakukho okufihlakeleyo kuwe.

4Ngokuhlakanipha kwakho langokuqedisisa kwakho uzinothisile,

wabuthela ezindlini zenotho yakho igolide lesiliva.

5Ngokuhlakanipha kwakho okukhulu ekuthengeni

wandisile inotho yakho,

lenhliziyo yakho isizigqaja ngenotho yakho.

6Ngalokho iNkosi uNkulunkulu ithi:

Ngoba uzitshaya ohlakaniphileyo, njengonkulunkulu,

7ngizakukulethela abezizwe,

ngilethe izizwe ezesabekayo kakhulu;

zizahwatsha imikhonto yazo,

zichithe ubuhle bokuhlakanipha kwakho,

zone udumo lwakho.

8Zizakukuphosela phansi egodini,

ufe kubi enzikini yolwandle.

9Uzakutsho yini uthi: Ngingunkulunkulu mina,

phambi kwalabo abakugwazayo,

lanxa wena ungumuntu ungesuye unkulunkulu,

ezandleni zalabo abakugwazayo?

10Uzakufa njengabangasokanga ngezandla zabezizwe;

ngoba sengikhulumile, kutsho iNkosi uNkulunkulu.

Isililo ngenkosi yaseTire

11Ilizwi leNkosi lafika kimi lathi:

12Ndoda, khala isililo ngenkosi yaseTire, uthi kiyo: INkosi uNkulunkulu ithi:

Wawuyisiboniso sokupheleleyo,

ugcwele ukuhlakanipha, uphelele ngobuhle.

13WawuseEdeni, insimu kaNkulunkulu,

ucecile ngawo wonke amatshe amahle,

ngitsho ikorneliya letopazi lejaspi lekrisolite

leberila leonikse lesafire lerubi le‐emeraldi.

Amahlwayi akho ayengawegolide,

lamasongo owawuwagqizile ayenzelwe wena

ngosuku lokuzalwa kwakho.

14Ngakunika ikherubi lokukulinda,

usentabeni engcwele kaNkulunkulu;

wahamba phakathi kwamatshe avutha umlilo.

15Wawuphelele endleleni zakho,

kusukela osukwini owadalwa ngalo

kwaze kwafunyaniswa ububi kuwe.

16Ngenxa yobunengi bokuthenga kwakho

wagcwala ulunya, wasusona.

Ngakuxotsha njengento engcolileyo entabeni kaNkulunkulu,

lekherubi lokukulinda lakukhupha phakathi kwamatshe avutha umlilo.

17Inhliziyo yakho yaziphakamisa ngenxa yobuhle bakho;

wona ukuhlakanipha kwakho ngenxa yodumo lwakho.

Ngakuphosa phansi, ngakuchaya phambi kwamakhosi

ukuba akukhangele ngamehlo awo.

18Ngobunengi bezono zakho zokukhohlisa kwakho ekuthengiseni

ungcolise indawo zakho ezingcwele;

ngaphemba umlilo phakathi kwakho, wakutshisa du,

ngakutshisa waba ngumlotha emhlabathini

ukuba bonke bakubone.

19Bonke abakwaziyo phakathi kwabantu bamangala ngawe.

Usuchitheke kubi, kawusayikuba khona kuze kube nininini.

Ilizwi leNkosi ngeSidoni

20Ilizwi leNkosi lafika kimi lathi:Jow 3:4–8; Zek 9:1–2; Mat 11:21–22; Luka 10:13–14

21Ndoda, khangela ngakulo iSidoni, utshumayele ngalo,

22uthi: INkosi uNkulunkulu ithi:

Ngimelene lawe, wena Sidoni,

ngizabonakalisa udumo lwami phakathi kwakho.

Bazakwazi ukuba ngiyiNkosi lapho sengilithonisisa,

ngibonakalise ubungcwele bami kilo.

23Ngoba ngizathumela isifo kilo,

kuchitheke legazi endleleni zalo;

abantu bazakufela phakathi kwalo,

bebulawa yimpi elihanqileyo inxa zonke.

Ng’khona bazakwazi ukuba ngiyiNkosi.

24KoIsrayeli kakusayikuba khona ukhula oluhlabayo lameva alimazayo phakathi kwabo bonke omakhelwana babo ababenze inhlekisa. Ng’khona bazakwazi ukuba ngiyiNkosi uNkulunkulu.

25INkosi uNkulunkulu ithi: Nxa sengibutha uIsrayeli ebantwini abachithachithwe kibo, ngizabonakalisa ubungcwele bami kibo phambi kwezizwe; bazahlala elizweni labo engalinika inceku yami uJakobe.

26Bazahlala kilo belondolozekile, bakhe imizi, bahlanyele izivini. Bazahlala belondolozekile nxa sengithonisisa bonke omakhelwana babo ababenze inhlekisa. Ng’khona bazakwazi ukuba ngiyiNkosi uNkulunkulu.