Isa 53 - Ndebele Bible (iBhayibhili Elingcwele) 1978

1Ngubani owayengakholwa esikuzwileyo na?

Amandla eNkosi ambulelwa bani na?

2Ngoba inceku yakhula njengehlumela phambi kweNkosi,

lanjengempande emhlabathini owomileyo;

yayingelasithunzi lobuhle ukuba siyibuke,

yayingabukeki ukuba siyifune.

3Yadelelwa, yaliwa ngabantu,

yaba ngumuntu wezinhlupheko, ijwayele usizi;

yaba njengomuntu owenza abantu ukuba bangamkhangeli,

yeyiswa, kasiyinanzanga.

4Impela yathwala ezethu izifo,

yathwala ubuhlungu bethu.

Kanti thina sathi itshayiwe,

itshayiwe nguNkulunkulu, ihlutshiwe.

5Yebo, yalinyazwa ngenxa yeziphambeko zethu,

yachotshozwa ngenxa yobubi bethu,

kwehliselwa phezu kwayo ukutshaywa okusilethela ukuthula,

langamanxeba ayo siyasiliswa thina.

6Thina sonke siduhile njengezimvu;

lowo lalowo wahamba ngendlela yakhe;

iNkosi yehlisela phezu kwayo ububi bethu sonke.

7Yacindezelwa, yahlutshwa,

kanti kayivulanga umlomo wayo

yalethwa ekuhlatshweni njengewundlu,

lanjengemvu ethuleyo phambi kwabagundi bayo

kayivulanga umlomo wayo.

8Yabotshwa yathonisiswa, yasiwa ekufeni;

ngubani owananza isiphetho sayo,

lokuthi yasuswa njani elizweni labaphilayo,

itshaywa ngenxa yeziphambeko zabantu bami na?

9Bayingcwabela phakathi kwababi,

ekufeni kwayo yayilomuntu onothileyo,

lanxa yona ingenzanga okubi,

kungekho inkohliso emlonyeni wayo.

10Kanti iNkosi yathanda ukuyichoboza kabuhlungu.

Uba inikela ukuphila kwayo kube lihlawulo ngesono,

izakubona inzalo yayo, iphile insuku ezinengi,

lentando yeNkosi ipheleliswe ngayo.

11Lapho ukuhlupheka kwayo sekuphelile,

izakubona ukukhanya, yaneliswe;

ngokwazi kwayo inceku yami elungileyo

izalungisisa abanengi, ithwale izono zabo.

12Ngakhoke ngizayabela kanye labakhulu,

yahlukaniselane impango labalamandla;

ngoba yazinikela ekufeni, yabalwa kanye lezoni;

yathwala izono zabanengi,

yakhulekela izoni.