Isa 63 - Ndebele Bible (iBhayibhili Elingcwele) 1978

Usuku lokuphindisela kweNkosi

1Ngubani lo ovela eEdoma,

evela eBozira egqoke ingubo ezibomvu,

lo ocecileyo ngezingubo zakhe,

ehamba ngobukhulu bamandla akhe na?

Yimi engikhuluma ngokulunga,

engilamandla okusiza.

2Kungani izigqoko zakho zibomvu,

lezambatho zakho zinjengezonyathela esikhamelweni sewayini na?

3Ngisinyathele ngedwa isikhamelo sewayini,

kwakungekho loyedwa ebantwini kanye lami;

ngibanyathele ekuthukutheleni kwami,

ngabafihliza olakeni lwami;

legazi labo lachaphakela ezambathweni zami,

ngingcolisile ingubo zami zonke.

4Ngoba ngizimisele ukwenza usuku lokuphindisela,

lomnyaka wokuhlenga abantu bami usufikile.

5Ngakhangela, kodwa kwakungekho osizayo,

ngamangala, kodwa kwakungekho osekelayo;

ngakho nganqoba ngeyami ingalo,

lolaka lwami lwangisekela.

6Ngasenginyathela abantu ekuthukutheleni kwami,

ngabadakisa ngolaka lwami,

ngachithela igazi labo phansi.

Ukulunga kweNkosi kuIsrayeli

7Ngizalandisa ngothando olungapheliyo lweNkosi, ngiyidumise,

ngakho konke iNkosi esenzele khona,

lobuhle obukhulu ebenzele indlu kaIsrayeli,

esenzele bona ngomusa wayo,

langobukhulu bothando lwayo olungapheliyo.

8Yathi: Impela bangabantu bami,

bangamadodana angakhohlisiyo;

yaba nguMsilisi wabo

9ekuhluphekeni kwabo konke.

Kabakhululwanga yisigijimi loba yisithunywa,

kodwa yabasilisa yona uqobo;

ngothando lwayo langesihawu sayo yabahlenga,

yabaphakamisa, yabathwala zonke insuku zakuqala.

10Kodwa bayivukela, badabukisa umoya wayo ongcwele;

yaphenduka yaba yisitha sabo, yalwa labo.

11Basebekhumbula insuku zakuqala zikaMose inceku yayo.

Bathi: Ungaphi lowo owakhupha olwandle abelusi bomhlambi wakhe na?

Ungaphi lowo owathela umoya wakhe ongcwele kubo,

12owasebenzisa amandla akhe,

wenza izinto ezimangalisayo ngoMose,

owahlukanisa amanzi phambi kwabo

ukuba azenzele ibizo elingakhohlakaliyo,

13owabadabulisa olwandle njengebhiza lidabula inkangala,

ukuze bangakhubeki na?

14Bahamba bengawi njengenkomo ezehlela esigodini.

Umoya weNkosi wabahola.

Wabahola ngokunjalo abantu bakho,

ukuze uzenzele ibizo elilodumo.

Umkhuleko wokucela isihawu losizo

15Khangela phansi usezulwini ubone,

usendaweni yakho engcwele yobukhosi.

Kungaphi ukutshiseka kwakho lamandla akho?

Ukuvutha kwenhliziyo yakho lesihawu sakho kugodliwe.

16Ngoba wena ungubaba, lanxa uAbrahama engasazi

loIsrayeli engasivumi;

wena Nkosi ungubaba,

ibizo lakho linguMhlengi wethu kusukela endulo.

17Nkosi, usiyekelelani siduhe ezindleleni zakho,

lokuba senze inhliziyo zethu zibe lukhuni,

ukuba singakwesabi na?

Buyake ngenxa yezinceku zakho,

lesizwe sakho.

18Kungani abantu ababi besenza indlu yakho ibe yinhlekisa na?

Kungani izitha zethu zingcolisa indawo yakho engcwele na?

19Sinjengalabo ongazanga ubabuse,

lanjengabangabizwanga ngebizo lakho.