uAmosi 8 - Ndebele Bible (iBhayibhili Elingcwele) 1978

UAmosi utshengiswa izithelo zasehlobo

1INkosi yangitshengisa lokhu, ngabona isitsha sezithelo zasehlobo.

2Yathi kimi: Amosi, ubonani na? Ngathi: Ngibona isitsha sezithelo zasehlobo. INkosi yasisithi kimi:

Ukuphela sekufikile ebantwini bami uIsrayeli;

kangisayikubayekela futhi.

3Izingoma zethempelini zizaphenduka zibe yikukhala

mhlalokho, kutsho iNkosi uNkulunkulu;

izidumbu zizagcwala indawo yonke,

zikhutshelwe phandle. Thulanike!

Ukwahlulelwa kukaIsrayeli sekusondele

4Zwanini lokhu, lina elinyathelela phansi abaswelayo,

elichitha abayanga belizwe,

5elithi: Ukuthwasa kwenyanga kuzadlula nini ukuze sithengise amabele?

leSabatha lizaphela nini ukuze sidingise amabele ethu,

senze isikali sokulinganisa sibe sincinyane,

lemali ibe nengi, sikhohlise ngesilinganiso,

6ukuze sithenge abayanga ngesiliva labaswelayo ngamanyathelo,

sithengise amakhoba amabele na?

7INkosi ifungile ngokuzigqaja kukaJakobe, yathi:

Impela kangiyikuzikhohlwa izenzo zabo kuze kube nininini.

8Kawuyikuqhaqhazela umhlaba wonke ngalokhu,

balile bonke abakhileyo kiwo,

ukhukhumale wonke njengomfula iNile,

uphoseke le lale, ubuye ubohle njengeNile laseGibithe na?

9Ngalolosuku, itsho iNkosi uNkulunkulu,

ngizatshonisa ilanga emini,

ngenze kube mnyama emhlabeni emini ekhanyayo.

10Ngizaphendula imikhosi yenu ibe yikukhala,

lengoma zenu zonke zibe yikulila,

livunule izambatho zokulila, liphuce amakhanda enu,

kube yisililo esinjengesokulilela indodana eyodwa,

kube lusuku olubuhlungu impela.

11Khangelani, insuku ziyeza, kutsho iNkosi uNkulunkulu,

lapho ngizathumela indlala elizweni,

kungabi yindlala yokudla, kungabi ngeyokomela amanzi,

kodwa kube ngeyokuzwa amazwi eNkosi.

12Abantu bazazula kusukela olwandle kuze kube solwandle,

kusukela enyakatho kuze kube sempumalanga,

bagijimele le lale, bedinga ilizwi leNkosi, bangalifumani.

13Ngalolosuku intombi ezinhle lezinsizwa zizaqaleka ngenxa yokoma.

14Abafunga isithombe saseSamariya besithi:

Ukuphila kukankulunkulu wakho, Dani!

lokuthi: Indlela yaseBerisheba;

bazakuwa, bangabe besavuka.