1Mina Pawuli uqobo ngiyalincenga ngobumnene langothando lukaKristu, mina engithobileyo nxa ngikhona phakathi kwenu, njengokutsho kwenu, kodwa engilesibindi nxa ngingekho.
2Ngiyalincenga ukuthi, nxa ngifikayo, kungadingeki ukuba ngibasukele ngesibindi engizimisele ukuba laso kwabanye abatshoyo ngathi ukuthi sihamba ngokomhlaba.
3Ngoba lanxa sikhona emhlabeni kasilwi impi yasemhlabeni;
4ngoba izikhali zokulwa kwethu kayisizo zasemhlabeni, kodwa zilamandla kaNkulunkulu okubhidliza izinqaba.
5Sichitha inkani, lakho konke okuziphakamisela ukumelana lokumazi uNkulunkulu, lemicabango yonke siyithumbela ukumlalela uKristu;
6futhi silungele ukutshaya ukungalaleli konke, nxa ukulalela kwenu sekuphelele.
7Khangelani iqiniso eliphambi kwenu. Uba umuntu ezithemba yena ukuba ungokaKristu, kanakane ukuthi, njengoba yena engokaKristu, sinjalo lathi.
8Loba ngingaze ngizincome ngaphezudlwana ngamandla ethu eyasinika wona iNkosi ukuba lakhiwe lingachithwa ngawo, kangiyikuyangeka.
9Kangithandi ukuba kube njengokungathi ngiyalethusa ngencwadi zami.
10Ngoba kuthiwa: Incwadi zakhe zinzima, zibukhali; kodwa nxa ekhona ngomzimba, ubuthakathaka, lokukhuluma kwakhe kudelelekile.
11Abanjalo kabanakane ukuthi lokhu esikutshoyo ngencwadi nxa singekho, sizakukwenza nxa sesikhona.
12Kasilasibindi sokuzilinganisa lokuzifanisa labathile babo abaziqhenyayo. Kodwa bona bazilinganisa omunye ngomunye bazifanisa bona uqobo lwabo, kabalakuqedisisa.
13Kodwa thina kasiyikuzincoma ngokudlula indawo yethu, kodwa sizakuzincoma ngendawo uNkulunkulu asimisele yona ukuba ibe yindawo yethu, indawo ehamba ize ifike lakini.
14Ngoba kasizeluli ngokweqileyo ngokungathi kasizanga sifinyelele kini, ngoba yithi abokuqala ukufika kini levangeli likaKristu.
15Kasizincomi ngokudlulayo ngomsebenzi owenziwe ngabanye, kodwa silethemba lokuthi ngokukhula kokukholwa kwenu indawo yomsebenzi wethu izakukhuliswa phakathi kwenu,
16size sitshumayele ivangeli lasendaweni ezingaphambili kwenu, singazincomi ngomsebenzi osuwenziwe endaweni yomunye.
17Kodwa ozincomayo kazincome ngeNkosi.Jer 9:24
18Ngoba kasuye ozincomayo ovunywayo, kodwa yilowo onconywa yiNkosi.
Who We AreWhat We EelieveWhat We Do
2025 by iamachristian.org,Inc All rights reserved.
