Dan 4 - Ndebele Bible (iBhayibhili Elingcwele) 1978

Iphupho lesibili lobuhlanya bukaNebukadineza

1Inkosi uNebukadineza wathi kubo bonke abantu lezizwe lezindimi ezisemhlabeni wonke: Ukuthula kakwande phakathi kwenu!

2Kube kuhle kimi ukutshengisa izibonakaliso lezimangaliso uNkulunkulu oPhezukonke angenzele zona.

3Yeka ubukhulu bezibonakaliso zakhe,

lamandla ezimangaliso zakhe!

Umbuso wakhe ungumbuso ongelakuphela,

lokubusa kwakhe kungokwezizukulwana zonke.

4Mina Nebukadineza, ngangichelesile endlini yami, ngiphumelela esigodlweni sami.

5Ngaphupha iphupho elangethusayo, ngisalele embhedeni wami imicabango lemibono yengqondo yami yangethusa.

6Ngasengikhupha isimemezelo sokuthi bonke abahlakaniphileyo baseBabiloni balethwe phambi kwami ukuze bangitshele incazelo yephupho.

7Zasezifika izanuse lezangoma lamaKaladiya labafunda okutshiwo zinkanyezi; ngabatshela iphupho, kodwa behluleka ukungitshela incazelo yalo.

8Ekucineni uDaniyeli wafika kimi, lowo owathiwa ibizo likankulunkulu wami lokuthi uBeliteshazari, yena olomoya wabonkulunkulu abangcwele; ngamtshela iphupho ngathi:

9Wena Beliteshazari, nduna yezanuse, ngoba ngiyazi ukuba ulomoya wabonkulunkulu abangcwele, lokuba kakulamfihlakalo ekwahlulayo, nanti iphupho engiliphuphileyo; ngitshela incazelo yalo.

10Nansi imibono eyafika engqondweni yami ngisalele embhedeni.

Ngabona isihlahla phakathi komhlaba, sasiside kakhulu.

11Isihlahla sakhula, saqina,

isicholo saso safinyelela ezulwini,

sabonakala emhlabeni wonke.

12Amahlamvu aso ayemahle, lezithelo zaso zazinengi,

kukhona kiso ukudla kwabo bonke.

Inyamazana zeganga zafumana umthunzi ngaphansi kwaso,

lenyoni zaphezulu zahlala engatsheni zaso,

lakho konke okuphilayo kondliwa kiso.

13Ngabona emibonweni yengqondo yami lapho ngilele embhedeni isithunywa

esilindayo sisehla sivela ezulwini.

14Samemeza sathi: Sigamuleleni phansi isihlahla,

liqume ingatsha zaso, lisiphundle amahlamvu,

lichithachithe izithelo zaso.

Izinyamazana kazibaleke ngaphansi kwaso,

lenyoni engatsheni zaso.

15Kodwa litshiye isidindi sigxumeke ngempande emhlabathini,

sibotshiwe ngebhanti lensimbi lethusi

phakathi kwamahlungu otshani beganga.

Kathanjiswe yena ngamazolo aphezulu,

ahlale otshanini lezinyamazana.

16Kasayikuba lengqondo yomuntu,

uzakuba lengqondo yenyamazana iminyaka eyisikhombisa.

17Lesisigwebo siyisimemezelo sezithunywa ezilindayo,

isiqumo selizwi lazo,

ukuze abaphilayo bazi ukuba oPhezukonke

uyabusa umbuso wabantu,

awunike lowo athanda ukumnika,

amise phezu kwawo abantukazana.

18Leliphupho ngaliphupha mina nkosi uNebukadineza. Wenake, Beliteshazari, wangitshela incazelo yalo, ngoba bonke abahlakaniphileyo embusweni wami bengelamandla ukungitshela incazelo yalo; kodwa wena ulawo, ngoba umoya wabonkulunkulu abangcwele ukuwe.

19Ng’khona uDaniyeli obizo lakhe lalinguBeliteshazari wamangala okwesikhatshana, lemicabango yakhe yamethusa. Inkosi yasisithi: Beliteshazari, ungethuswa liphupho lencazelo yalo. UBeliteshazari waphendula wathi: Nkosi yami, iphupho kalibe ngelalabo abakuzondayo, lencazelo yalo ibe ngeyezitha zakho.

20Isihlahla owasibonayo esakhula saqina, lesicholo saso safinyelela phezulu, sabonakala emhlabeni wonke,

21silamahlamvu amahle lezithelo ezinengi, silokudla kwabo bonke, lezinyamazana zeganga zafumana umthunzi ngaphansi kwaso, lenyoni zaphezulu zahlala engatsheni zaso,

22singuwe, wena nkosi, osukhulile waqina. Ubukhulu bakho sebukhulile, bafinyelela phezulu, lokubusa kwakho kwafinyelela ekucineni komhlaba.

23Njengokuba inkosi yabona isithunywa esilindayo sisehla sivela ezulwini sisithi: Gamulelani phansi isihlahla, lisiqede, kodwa litshiye isidindi sigxumeke ngempande emhlabathini sibotshwe ngebhanti lensimbi lethusi emahlungwini otshani beganga; yena athanjiswe ngamazolo aphezulu, ahlale lenyamazana zeganga, kuze kudlule iminyaka eyisikhombisa.

24Yiyo le incazelo, nkosi. Iyisimemezelo soPhezukonke ngenkosi yami

25sokuthi uzaxotshwa ebantwini, uhlale lenyamazana zeganga. Uzakudla utshani njengenkomo, uthanjiswe ngamazolo aphezulu okweminyaka eyisikhombisa, uze wazi ukuthi oPhezukonke uyabusa umbuso wabantu, awunike lowo athanda ukumnika.

26Njengokuba kwalaywa ukuba kutshiywe isindindi sesihlahla silempande, umbuso wakho uzaqina kusukela esikhathini ozakwazi ngaso ukuthi uNkulunkulu uyabusa.

27Ngakhoke, wena nkosi, akuzwe iseluleko sami; yekela izono zakho, wenze ukulunga, uyekele leziphambeko zakho ngokutshengisa isihawu kwabacindezelweyo, ukuba mhlawumbe ungahlala uchelesile okwesikhathi eside.

28Konke lokhu kwayehlela inkosi uNebukadineza.

29Ekupheleni kwenyanga ezilitshumi lambili inkosi yayihambahamba ophahleni lwendlu yenkosi eBabiloni,

30yathi: Kakusilo yini leliBabiloni elikhulu engalakha ngamandla ami amakhulu, laba ngumuzi wenkosi, laba lodumo lobukhosi bami na?

31Kwathi inkosi ingakaqedi ukukhuluma, kwezwakala ilizwi livela ezulwini lisithi: Wena nkosi Nebukadineza, kutshiwo kuwe ukuthi: Ubukhosi bususiwe kuwe;

32uzaxotshwa ebantwini, uhlale lenyamazana zeganga, udle utshani njengenkomo okweminyaka eyisikhombisa ukuba wazi ukuthi oPhezukonke uyabusa umbuso wabantu, awunike lowo athanda ukumnika.

33Lahle lagcwaliseka lelolizwi kuNebukadineza. Waxotshwa ebantwini, wadla utshani njengenkomo, lomzimba wakhe wathanjiswa ngamazolo aphezulu, lezinwele zakhe zakhula zaze zalingana lensiba zelinqe, lenzipho zakhe zafanana lenzipho zenyoni.

34Ekupheleni kweminyaka emisiweyo mina Nebukadineza ngaphakamisela amehlo ami phezulu, lengqondo yami yabuya kimi; ngambonga oPhezukonke, ngamdumisa, ngamphakamisa yena ohlala kuze kube nininini.

Ngoba ukubusa kwakhe kakulakuphela,

lombuso wakhe ungowezizukulwana zonke;

35bonke abakhileyo emhlabeni batshaywa ize,

uyenza akuthandayo ebandleni laphezulu;

kakho ongavimbela isandla sakhe,

loba athi kuye: Wenzani na?

36Ngasona lesosikhathi yabuya kimi ingqondo yami, lobukhosi bami kanye lodumo lwami kwabuyiselwa kimi, lodumo embusweni wami. Abeluleki bami lezikhulu zami zangidinga, ngabuyiselwa embusweni wami, kwengezelelwa ubukhulu bami.

37Ngalokhoke mina Nebukadineza ngiyayibonga ngiyiphakamise ngiyidumise iNkosi yaphezulu; ngoba yonke imisebenzi yayo ilungile, lendlela zayo zinhle. Labo abazigqajayo uyabathobisa.