Hubo 148 - Ndebele Bible (iBhayibhili Elingcwele) 1978

Izidalwa zonke kazidumise iNkosi

1Dumisani iNkosi!

Dumisani iNkosi ezulwini,

idumiseni kweliphezulu.

2Idumiseni lina zithunywa zayo zonke.

Idumiseni lina mabandla ayo wonke asezulwini.

3Idumiseni lina langa lenyanga.

Idumiseni lina zinkanyezi zonke ezikhanyayo.

4Idumiseni lina mazulu aphezulu,

lani manzi aphezu kwamazulu.

5Konke kakudumise ibizo leNkosi;

ngoba yalaya, kwenziwa.

6Yakumisa kuze kube nininini;

yakumisela imingcele ukuba kungayeqi.

7Dumisani iNkosi emhlabeni,

lina zilo ezesabekayo zolwandle, lani zinsiki zonke,

8lani mililo lesiqhotho longqoqwane leliqhwa,

leziphepha ezilalela ilizwi layo;

9zintaba lamaqaqa wonke,

zihlahla ezithelayo lezihlahla zomkusu zonke,

10zinyamazana zeganga lezifuyo zonke,

zinto ezihahabayo lenyoni eziphaphayo.

11Lani makhosi omhlaba, lani zizwe zonke,

zikhulu, lani babusi bomhlaba,

12zinsizwa, lani zintombi, maxhegu labantwana.

13Kabadumise ibizo leNkosi,

ngoba ngelayo ibizo lodwa eliphakemeyo;

ubukhosi bayo buphezu komhlaba lezulu.

14Iphakamisile abantu bayo;

ngalokhu abangcwele bayo bayayidumisa,

abantu bakoIsrayeli abaseduze layo.

Dumisani iNkosi!