Isa 19 - Ndebele Bible (iBhayibhili Elingcwele) 1978

Ilizwi ngeGibithe

1Leli yilizwe ngeGibithe.

Khangela, iNkosi ikhwele eyezini elilejubane, iza eGibithe;

izithombe zaseGibithe zizathuthumela phambi kwayo,

lenhliziyo yabaseGibithe iphelelwe ngamandla.

2INkosi ithi: Ngizavusa abaseGibithe ukuba balwe labaseGibithe,

lowo lalowo alwe lomfowabo,

lalowo lalowo alwe lomakhelwana wakhe;

umuzi uzakulwa lomuzi, umbuso ulwe lombuso.

3AbaseGibithe bazaphelelwa lithemba,

ngizachitha amacebo abo;

bazabuza ezithombeni, lakubathakathi, lakwabalamadlozi, lezanuseni.

4Ngizakunikeza abaseGibithe esandleni senkosi elukhuni;

inkosi elolaka izakubabusa, kutsho iNkosi yamabandla.

5Amanzi eNile azakucima,

umfula wome utshe,

6lemigelo yalo izakunuka,

lezifudlana zeNile zizakuncipha, zitshe,

kubune imihlanga lebhuma.

7Kuzakuba khona indawo eziligwadule ngaseNile,

ngasokhunjini leNile;

lakho konke okuhlanyelweyo ngaseNile kuzakoma,

kuhlakazwe, kungabe kusaba khona.

8Abagoli benhlanzi bazakukhala balile,

bonke abathiya ngengwegwe eNile;

labathiya ngamambule emanzini bazakukhala.

9Abasebenza ngenxoza bazakudana,

labeluka ngentambo ezimhlophe.

10Labo abelukayo elizweni bazakuchithwa,

lezingcitshi zizakuba losizi.

11Izikhulu zaseZowani ziyizithutha impela,

labeluleki abahlakaniphileyo bakaFaro banika iseluleko sobuthutha.

Lingatsho kanjani kuFaro lithi:

Thina siyinzalo yabahlakaniphileyo leyamakhosi asendulo?

12Pho, bangaphi abahlakaniphileyo bakho, Faro na?

Kabakutshele, bakwazise lokho okumiswe yiNkosi yamabandla ngeGibithe,

13Izikhulu zaseZowani seziphenduke izithutha,

lezikhulu zaseMemfisi zikhohlisekile;

labo abayizikhulu zezizwe zalo baliduhisile iGibithe.

14INkosi ibehlisele umoya ophambeneyo;

benze iGibithe ukuba lidayizele kukho konke elikwenzayo,

njengomuntu odakiweyo edayizela ekuhlanzeni kwakhe.

15Kakuyikuba khona eGibithe okungenziwa ngumuntu, lekhanda lomsila,

ugatsha lomhlanga.

16Ngalolosuku abaseGibithe bazakuba buthakathaka njengabesifazana; bazathuthumela besabe lapho bebona isandla iNkosi yamabandla eselulela ukubatshaya.

17Ilizwe lakoJuda lizakwesabeka kwabaseGibithe. Bonke abaseGibithe bekuzwa lokhu bazathuthumela ngenxa yecebo iNkosi yamabandla elimisileyo mayelana labo.

18Ngalolosuku kuzakuba khona imizi emihlanu elizweni laseGibithe ekhuluma ulimi lwesiHebheru, lethembekileyo eNkosini yamabandla. Omunye wayo uzakuthiwa nguMuzi weLanga.

19Ngalolosuku kuzakuba khona ialtare leNkosi phakathi kwelizwe laseGibithe, lensika yokukhonzela iNkosi emkhawulweni walo.

20Izakuba yisibonakaliso sokuba khona kweNkosi yamabandla elizweni laseGibithe. Lapho bekhala eNkosini ngenxa yabacindezeli, izakubathumela umkhululi ozabavikela, abakhulule.

21INkosi izakuziveza kwabaseGibithe; bona bazakuyazi ngalesosikhathi, bayikhonze ngemihlatshelo langeminikelo yokutshiswa, benze izifungo zabo kuyo, bazigcwalise.

22INkosi izakulitshaya iGibithe, ilitshaye ibuye ilisilise; bazaphendukela kuyo, yona izakuzwa imikhuleko yabo, ibasilise.

23Ngalolosuku kuzakuba khona umgwaqo osuka eGibithe usiya eAsiriya; abaseAsiriya bazakuza eGibithe, labaseGibithe baye eAsiriya, bakhonze ndawonye labaseAsiriya.

24Ngalolosuku uIsrayeli uzakuba ngowesithathu kanye leGibithe leAsiriya, babe yisibusiso phakathi komhlaba.

25INkosi yamabandla izakubabusisa ithi: Ibusisiwe iGibithe abantu bami, leAsiriya umsebenzi wezandla zami, loIsrayeli abantu bami.