2 Lan 8 - Ndebele Bible (iBhayibhili Elingcwele) 1978

Ezinye izenzo zikaSolomoni

1Emva kweminyaka engamatshumi amabili uSolomoni akhile ithempeli lendlu yakhe,

2wabuye wavusa imizi uHuramu ayemnike yona, wahlalisa abakoIsrayeli kiyo.

3Wayahlasela iHamathi‐Zoba, walinqoba.

4Wakha iTadimori enkangala layo yonke imizi yokugcinela amabele ayakha eHamathi.

5Wakha leBeti‐Horoni elingaphezulu leBeti‐Horoni elingaphansi, imizi ebiyelweyo elemithangala lamasango alemigoqo,

6wakha leBalathi, lemizi yonke yokugcinela amabele ayelayo, leyokugcinela izinqola zakhe lamabhiza akhe, loba kuyini ayefisa ukukwakha khona eJerusalema, laseLebanoni, lakulo lonke ilizwe lombuso wakhe.

7Abantu bonke ababesele kumaHethi lakumaAmori lakumaPerizi lakumaHivi lakumaJebusi, ababengeyisibo abakoIsrayeli,

8inzalo yabo eyayisele elizweni abangayibulalanga abakoIsrayeli uSolomoni wababutha izibhalwa; banjalo kuze kube lamhla.

9Kodwa abakoIsrayeli uSolomoni kabenzanga izigqili zomsebenzi, wabenza amabutho, lezinduna zakhe, labaphathi bezinqola zakhe zokulwa, labagadi bamabhiza akhe.

10Laba baba zinduna ezinkulu zenkosi uSolomoni, babengamakhulu amabili lamatshumi amahlanu bephethe abantu.

11USolomoni wasesusa indodakazi kaFaro emzini kaDavida, wayisa endlini ayeyakhele yona ngoba wathi: Umkami kayikuhlala endlini kaDavida inkosi yakoIsrayeli, ngoba izindawo lapho kwakusiwe khona umtshokotsho wesivumelwano seNkosi zingcwele.

12USolomoni wasenikela eNkosini iminikelo yokutshiswa phezu kwealtare leNkosi ayelakhile ngaphambi komkoto,

13njengokumiselwe lolo lalolosuku, wanikela njengokumiswe ngumlayo kaMose ngamaSabatha, langokuthwasa kwenyanga, langemikhosi emithathu yomnyaka, umkhosi wesinkwa esingelamvubelo, umkhosi wamaviki, lomkhosi wamadumba.Nani 28:9—29:29; Eks 23:14–17; 34:22, 23; Dute 16:16

14Ngesimiso sikaDavida uyise wamisa izigaba zabapristi zenkonzo yabo, lezamaLevi zokuhlabelela izindumiso lokusiza abapristi njengokufunekayo ngalolo lalolosuku, lezabalindi bamasango kulelo lalelosango; ngoba wayetsho njalo uDavida umuntu kaNkulunkulu.

15Kaphambukanga kulokho inkosi uDavida eyayikutshilo mayelana labapristi lamaLevi lezindlu zenotho.

16Waphelake wonke umsebenzi kaSolomoni kusukela osukwini lokubekwa kwesisekelo sethempeli laze laphela ukwakhiwa. Kwaphelake ukwakhiwa kwethempeli.

17USolomoni wasesiya eZiyoni‐Geberi laseElathi ngasolwandle elizweni laseEdoma.

18UHuramu wathumela kuye imikolo ephethwe zinduna zakhe, lenceku ezejwayele ulwandle, zaya eOfiri kanye lenceku zikaSolomoni, zalanda khona igolide elingamathalenta angamakhulu amane lamatshumi amahlanu, zaliletha enkosini uSolomoni.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help