Hez 1 - Ndebele Bible (iBhayibhili Elingcwele) 1978

Umprofethi ubona isihlalo sobukhosi sikaNkulunkulu

1Kwathi ngomnyaka wamatshumi amathathu, ngosuku lwesihlanu lwenyanga yesine, lapho ngangiphakathi kwabathunjiweyo ngasemfuleni iKebari, lavuleka iphezulu, ngabona imibono kaNkulunkulu.Isam 19:11

2Ngosuku lwesihlanu enyangeni, ngomnyaka wesihlanu wokuthunjwa kwenkosi uJehoyakini,2 Kho 24:10–16; 2 Lan 36:9–10

3ilizwi leNkosi lafika kimi uHezekeli umpristi, indodana kaBuzi, elizweni lamaKaladiya ngasemfuleni iKebari. Isandla seNkosi saba phezu kwami lapho.

4Kwathi lapho ngikhangela, ngabona umoya wesivunguzane ovela enyakatho, leyezi elikhulu elicwazimulayo, lomlilo ovuthayo njalonjalo, phakathi komlilo kwakukhona okungathi lithusi elikhazimulayo.

5Phakathi kwalo kwavela umfanekiso wezidalwa ezine eziphilayo. Izimo zazo zazinje, zazifana labantu,Isam 4:6

6kodwa yileso laleso silobuso obune lempiko ezine.

7Imilenze yazo yayiqondile, lamangqina azo ayefanana lawenkonyane, ecwazimula njengethusi elilolongiweyo.

8Zazilezandla zomuntu ngaphansi kwempiko zazo enhlangothini zazo ezine. Izidalwa zozine zazilobuso lempiko.

9Impiko zazo zazithintana, zazingaphenduki ekuhambeni kwazo. Kwaba yileso laleso sahamba saqonda phambili.

10Izimo zobuso bazo zazinje; zozine zazilobuso bomuntu ngaphambili, zilobuso besilwane ngakwesokunene, zilobuso benkabi ngakwesokhohlo, zilobuso belinqe ngemuva.Hez 10:14; Isam 4:7

11Babunjaloke ubuso bazo. Impiko zazo zazivulekile ngaphezulu. Kuyileso laleso isidalwa silempiko ezine, ezimbili zazithintana lezezinye izidalwa, lezimbili zigubuzele umzimba wazo.

12Zaqonda zonke phambili, zaya lapho umoya uzisa khona, zingaphenduki ekuhambeni kwazo.

13Phakathi kwezidalwa eziphilayo kwakukhona okunjengamalahle omlilo ovuthayo, kunjengezibane ezihambahamba phakathi kwazo. Umlilo wawukhazimula, lasemlilweni kwakuphuma umbane.Isam 4:5

14Izidalwa eziphilayo zazigijima zisiya le lale, njengokuphazima kombane.

15Ngisakhangele izidalwa eziphilayo ngabona amavili ngaphansi, ivili elilodwa liseceleni kwaleso laleso isidalwa.Hez 10:9–13

16Amavili ayecwazimula njengelitshe elihle elithiwa yitopazi, wonke ayefanana; izimo zawo lokusebenza kwawo kwakufana levili eliphakathi kwevili.

17Ekuhambeni kwawo aqonda loba kuluphi lwezinhlangothi zawo zozine, engaphenduki.

18Amavili womane ayelemiphetho lezipoko, imiphetho yawo yayigcwele amehlo.Isam 4:8

19Lapho izidalwa eziphilayo zihamba, lamavili ahamba eceleni kwazo; lalapho izidalwa eziphilayo zisuka emhlabathini, lamavili aphakama.

20Lapho umoya wawuthanda ukuya khona, zaya khona lazo, lamavili aphakama, ngoba umoya wezidalwa eziphilayo wawusemavilini.

21Ekuhambeni kwazo lawo ahamba; ekumeni kwazo lawo ema; ekuphakameni kwazo emhlabeni aphakama lamavili kanye lazo; ngoba umoya wezidalwa eziphilayo wawusemavilini.

22Ngaphezu kwamakhanda ezidalwa eziphilayo kwakukhona okunjengomkhathi kucwazimula njengelitshe elihle elithiwa yikristali, kwendlaliwe ngaphezu kwamakhanda azo.Isam 4:6

23Ngaphansi komkhathi impiko zazo zazinatshululiwe zithintana, yileso laleso isidalwa silempiko ezimbili ezembese umzimba waso.

24Lapho ziphapha, ngezwa umsindo wempiko zazo unjengomdumo wamanzi amanengi, unjengomdumo kaSomandla, unjengokuxokozela kwexuku. Lapho zisima zehlisa impiko zazo,Isam 1:4–15; 19:6

25kodwa kwakuzwakala ilizwi livela emkhathini ongaphezu kwamakhanda azo lalapho sezimi zehlise impiko zazo.

26Ngaphezu komkhathi owawuphezu kwamakhanda azo kwakukhona okunjengelitshe elithiwa yisafire, kunjengesihlalo sobukhosi; ngaphezu kwakho konke kukhona okuhlezi esihlalweni sobukhosi okufanana lomuntu.Isam 10:1; Isam 4:2–3

27Ngabona okunjengethusi okukhanya njengomlilo eziko; kusukela okhalweni lwakhe kusiya phezulu, kusukela okhalweni lwakhe kusiya phansi ngabona okunjengomlilo okuvutha indawo zonke.Hez 8:2

28Ukukhanya lokho okuvuthayo kwakunjengomchilo‐wamakhosikazi emayezini lapho izulu lisina; kunjengokubonakala kobukhosi beNkosi.

Lapho ngibona lokho, ngathi mbo ngobuso phansi, ngezwa ilizwi likhuluma lami.