1 Sam 24 - Ndebele Bible (iBhayibhili Elingcwele) 1978

UDavida uyekela uSawuli ukuba aphile

1Kwathi uSawuli esebuyile ekuxotsheni amaFilistiya, wabikelwa kwathiwa: UDavida usenkangala yaseEngedi.

2USawuli wasethatha abantu abayizinkulungwane ezintathu abakhethiweyo kuye wonke uIsrayeli, wayadinga uDavida labantu bakhe ngasempumalanga kwamaDwala amagogo.

3Wafika ezibayeni zezimvu ezazisendleleni. Kwakukhona lapho ubhalu; uSawuli wangena kulo ukuba aye ngaphandle. UDavida labantu bakhe babehlezi ngaphakathi kobhalu.

4Abantu bakaDavida bathi kuye: Lufikile usuku iNkosi eyatsho ngalo kuwe isithi: Ngizanikela isitha sakho esandleni sakho, uzakwenza kuso lokho okubona kufanele. UDavida wasenyenya, wasika ensitha umphetho wengubo kaSawuli.

5Ngemva kwalokho uDavida wazisola ngoba wayesike umphetho wengubo kaSawuli.

6Wathi ebantwini bakhe: INkosi uNkulunkulu kayingivimbele ukuba ngingenzi okubi enkosini yami, ogcotshiweyo weNkosi uNkulunkulu.

7UDavida wabehlula ngalawomazwi abantu bakhe, kabavumelanga ukuba bamhlasele uSawuli. USawuli waphuma obhalwini, wahamba.

8Ngemva kwalokho uDavida laye wasuka waphuma obhalwini; wammemeza uSawuli wathi: Nkosi yami! Lapho uSawuli enyemukula, uDavida wathi mbo ngobuso phansi, wakhuleka.

9UDavida wasesithi kuSawuli: Ulalelelani amazwi abantu abathi: UDavida ufuna ukukulimaza?

10Lamuhla uzibonele ukuthi iNkosi ibikunikele esandleni sami obhalwini; abanye bebesithi kangikubulale, kodwa mina ngakuhawukela. Ngathi: Kangiyikuphakamisela isandla sami kuyo inkosi yami, ngoba ingogcotshiweyo weNkosi.

11Khangela, baba, nanku umphetho wengubo yakho usesandleni sami; ngiwusikile, kodwa kangikubulalanga. Ngalokhoke zibonele ukuba kakukho ububi lesiphambeko kimi. Kangikonanga ngalutho, loba wena ungizingela ukuba ungibulale.

12INkosi uNkulunkulu kayahlulele phakathi kwethu; kodwa lanxa ingaphindisela kuwe ngenxa yami, kangiyikuphakamisela isandla sami phezu kwakho.

13Njengesaga sasendulo esithi: Kwababi kuvela okubi; kodwa mina kangiyikuphakamisela isandla sami phezu kwakho.

14Inkosi yakoIsrayeli ilandelana lobani na? Uxotshana lobani na? Uxotshana lenja efileyo, indwebundwebu nje.

15INkosi uNkulunkulu kayibe ngumahluleli, yahlulele phakathi kwethu, ihlole icala lami, ingikhulumele, ingikhulule esandleni sakho.

16Kwathi uDavida eseqedile ukukhuluma lawomazwi kuSawuli, uSawuli wathi: Yilizwi lakho lelo, mntanami, Davida na? USawuli wadazuluka, wakhala.

17Wasesithi kuDavida: Ulungile kulami, ngoba wena ungiphindisele ngokuhle, kodwa mina ngikuphindisele ngokubi.

18Utshengisile lamuhla ukuthi ungenzela okuhle, ngoba kawungibulalanga lapho iNkosi ibinginikele ezandleni zakho.

19Nxa umuntu efica isitha sakhe, uyasiyekela sihambe na? Ngalokhoke iNkosi ikunike umvuzo omuhle ngokwenzileyo kimi lamuhla.

20Manjeke ngiyazi ukuba uzakuba yinkosi impela, lokuba umbuso wakoIsrayeli uzaqiniswa esandleni sakho.

21Ngakhoke funga kimi ngeNkosi ukuba kawuyikuyiqeda inzalo yami emva kwami, lokuba kawuyikulicima ibizo lami endlini kababa.

22UDavida wasefunga kuSawuli. USawuli wabuyela ekhaya; kodwa uDavida labantu bakhe baya enqabeni.