Gal 5 - Ndebele Bible (iBhayibhili Elingcwele) 1978

1UKristu wasikhululela ukuba sibe lenkululeko. Ngakhoke manini liqine, lingabuyi libotshelwe futhi ejogweni lobugqili.

Inkululeko engoKristu

2Khangelani, mina Pawuli ngithi kini: Uba lisoka, uKristu kayikulisiza ngalutho.

3Ngiyaqinisa futhi kumuntu wonke osokayo ukuthi umele ukugcina umlayo wonke.

4Lehlukene loKristu lina elifuna ukulungisiswa ngomlayo; lehlukene lomusa.

5Ngoba thina ngaye uMoya silindele ngokukholwa ithemba lokulunga.

6Ngoba kuKristu kakusizi lutho ukusoka lokungasoki, kodwa kuphela ukukholwa okusebenza ngothando.

7Beligijima kuhle; livinjelwe ngubani ukuba lingalaleli iqiniso na?

8Lokhukuhuga kakuveli kuye owalibizayo.

9Imvubelo eyingcosana ibilisa yonke inhlama.1 Kor 5:6

10Ngilethemba eNkosini ukuba kaliyikunakana okwehlukene lokwami; kodwa lowo olihluphayo uzakuthwala okwakhe ukulahlwa loba engubani.

11Kodwa mina, bazalwane, uba ngisatshumayela ukusoka, ngisazingelelwani na? Ngabe sesisusiwe isikhubekiso sesiphambano.

12Ngalabo abalihluphayo ngingathi kabazithene isibili!

Imisebenzi yomzimba lezithelo zikaMoya

13Lina, bazalwane, labizelwa ekukhululekeni; lingenzi inkululeko yenu ibe lithuba lokukholisa umzimba kodwa ngothando sizanani omunye lomunye.

14Ngoba umlayo wonke ugcwaliseka elizwini linye elokuthi: Wothanda umakhelwane wakho njengalokhu uzithanda wena.Levi 19:18

15Kodwa uba lilumana, lidlana, qaphelani ukuba lingaqedani.

16Ngithi: Hambani ngoMoya lingakholisi inkanuko zomzimba.

17Ngoba inkanuko zomzimba ziphambene lezikaMoya, kanti lenkanuko zikaMoya ziphambene lezomzimba; lezizinto ziphambene ukuze lingenzi lokho elikuthandayo.Roma 7:15–23

18Kodwa uba likhokhelwa nguMoya kalisekho ngaphansi komlayo.

19Imisebenzi yomzimba isobala; yiyo le, ukuphinga, lokungcola, lamanyala,

20lokukhonza izithombe, lokuthakatha, lobutha, lenkani, lomona, lolaka, lokubanga, lokuxabana, lokwahlukana,

21lomhawu, lokudakwa, lokuminza, lokunye okunjalo. Ngiyalitshela njengoba ngalitshela ngaphambili ukuthi abenza okunje kabayikulidla ilifa lombuso kaNkulunkulu.

22Kodwa izithelo zikaMoya ziluthando, lokuthokoza, lokuthula, lokubekezela, lobubele, lokulunga, lokuthembeka,

23lobumnene, lokuzithinta; kokunje kakulamlayo.

24AbakaKristu Jesu babethele umzimba kanye lokuhugeka lezinkanuko zawo.

25Uba siphila ngoMoya, asihambe ngoMoya.

26Kasingazikhukhumezi, siqalane, sifelane umona.