Hubo 67 - Ndebele Bible (iBhayibhili Elingcwele) 1978

Abantu bonke kabambonge uNkulunkulu

1Nkulunkulu, woba lomusa kithi usibusise,

ukhanyise ubuso bakho phezu kwethu,

2ukuze indlela yakho yaziwe emhlabeni,

lokusiza kwakho ezizweni zonke.

3Kabakubonge abantu, Nkulunkulu,

kabakubonge abantu bonke.

4Izizwe kazijabule zihlabele ngokuthokoza,

ngoba wena uyabahlulela abantu ngokulunga,

uyazihola izizwe emhlabeni.

5Kabakubonge abantu, Nkulunkulu,

kabakubonge abantu bonke.

6Umhlaba uthelile izithelo zawo;

uNkulunkulu, uNkulunkulu wethu usibusisile.

7UNkulunkulu usibusisile,

kabamesabe abantu endaweni zonke.